ژن ژ هه‌ستنازكیێ به‌ره‌ڤ بێزاربوونێ

ژن ژ هه‌ستنازكیێ به‌ره‌ڤ بێزاربوونێ

Capture

وار – رەمەزان هەرنی :

ژن پشكه‌كا هەرە مەزن و پێدڤییە د ژیانێ دا، دلنازكییا وێ،‌ دبیتە فاكته‌رێ‌ سەرەكیێ بێزاربوونا وێ و نەشێت د ژیانێ‌ دا بەردەوامبیت، نەرەوشەنبیرییا گشتی، جوداهییا رەگەزی به‌رچاڤدكه‌ت و دبیتە سه‌ده‌مه‌ك ژن ژ خوه‌ بێزاربیت و نەشێت خوه‌ لبه‌ر نەخوه‌شیێن ژیانێ‌ بگریت، ئه‌ڤه‌ هنده‌ك گازنده‌یێن ژنانه‌ كو لدۆر وێ ئێكێ، مه‌ چه‌ند راوبۆچوون وه‌رگرتینه‌.

ئه‌وین به‌كر وەك رۆژنامەڤان وەها دیاركر، ”هەستنازكییا ژنێ‌ دبیتە سه‌ده‌مەكێ‌ سەرەكیێ پەیدابونا بێزاریێ‌ د ژیانا وێ دا، و گه‌له‌ك جاران ژن ب ساناهی باوەریێ‌ ب كەسەكى‌ دئینیت و پێڤە دهێتە گرێدان، لێ‌ دەمێ‌ دیاردبیت، بەرانبەرێ‌ وێ‌ نە لدووڤ وێ‌ باوەریێیە و ئەو هاتییە خاپاندن، وی دەمی كارتێكرن ل دەروونێ‌ وێ‌ دهێته‌كرن، ئەڤە ژی دبیتە سەدەم كو بێزاری لدەف ژنێ پەیداببیت و دبیت ئێدی باوەریێ‌ نەدەتە كەسەكێ‌ دی”. كچا هان گۆتژى، ”نەرەوشەنبیرییا گشتییا كو جوداهیێ‌ د ناڤبەرا رەگەزان دا په‌یدادكەت، بوویه‌ سه‌ده‌م كو ژن وەكو ئالاڤەكێ بهێته‌ دیتن ب تنێ‌ بۆ كاركرنا ناڤمالێ‌ و ئاخڤتنا زەلامی هەردەم لسەر ژنێ ‌زالە”.
ئیمان سندی كچەكا دییه‌ كو بێژەره‌، دبێژیت: ”گه‌له‌ك سه‌ده‌م د جڤاكی دا ب گشتی و ناڤمالێ‌ ب تایبەتی هه‌نه‌ كو ژن پێ بێزاردبیت، ئەڤە ژی ڤه‌دگه‌ریت بۆ وێ‌ ئێكێ،‌ گەلەك جاران د دەروونێ‌ خوه‌ دا تووشی دلتەنگی‌ و نەئارامی‌ و خەمگینیێ‌ دبیت، ئەڤە ژی دبیتە ئێك ژ وان سه‌ده‌مان كو ژن پێ‌ بێزارببیت. یان هه‌كەر تێكنەگەهشتن د ناڤبەرا ئەندامێن خێزانێ‌ دا هەبیت یان ژی ژن دگەل بەرامبەرێ‌ خوە یا ب ئاڕێشە بیت، گه‌له‌ك جاران ژی وەستاندن دبیتە سه‌ده‌ما‌ بێزاریێ‌ لدەف ژنێ, دیسان ژن وەكو زەلامى بهێنفرەهـ نینە و نه‌شێت خوه‌ بگریت هه‌تا ئاڕێشه‌یان بزانیت”.
شۆخان محەمەد جەزا وه‌كو چالاكا بوارێ ژن، وه‌ها دبینیت، ”ژن یا هەستنازكە، دەمێ‌ دڤێت بگەهیتە حەزێن خوە و نەگەهیتێ،‌ بێزاری لدەف پەیدادبیت و گه‌له‌ك باوەری ب هیڤیێن خوه‌ نامینیت، له‌و د مالێ دا نه‌كو ب تنێ دڤێت گرنگى ب حەزێن وێ بهێته‌دان، بەلكو دڤێت رێ ژی لبەر بهێنەڤەكرن، داكو بەرەف هیڤیێن خوە بچیت، ژبه‌ركو دەما ژن دبینیت دەوروبەرێن وێ،‌ ئانكو كەسێن نێزیكی وی پووتەی پێنادەن و دهێتە ژبیركرن، وی دەمی گه‌له‌ك بێزار دبیت و بێزاریا وێ‌ دیاردبیت، لێ‌ نەشێت ب ئاشكرایی خوە دیاربكەت، نەخاسمە ژن بێزاردبیت هه‌كەر ئەو كەسێن كو پووتەی پێنادەن ژلایێ‌ وێ‌ ڤە دگرنگ بن و كەسایەتیا وان بهێز بیت، وی دەمی نە ب تنێ بێزاردبیت، بەلكو د مال‌ و جڤاكی دا هەست ب لاوازیێ‌ ژی دكەت، ئەڤە دبیتە سه‌ده‌م كو ژن د ده‌روونێ خوە دا تووشی خەمەكا گران ببیت و نەشێت دیاركەت، ژبه‌ركو بۆ وێ‌ ب زەحمەتە؛ بێژیت ئەز یابێزارم”.

بابه‌تێن ب ڤێ مژارێ ڤه‌ گرێدای