ژن حه‌ز ژ كیژان هه‌ڤژینى دكه‌ت؟

ژن حه‌ز ژ كیژان هه‌ڤژینى دكه‌ت؟

وار – دهۆک :

پشتی ژن ژ حه‌زژێكرنا به‌ری پێكئینانا هه‌ڤژینیێ‌ ده‌رباز دبیت، كو ژیانه‌كا تژی ئاشۆپه‌ و پشتی ل ده‌مێ‌ ده‌زگریێ ژی ده‌ربازدبیت و گه‌له‌ك سۆز و په‌یڤێن خوه‌ش ل ده‌زگرێ‌ خوه‌ گوهـ لێ‌ دبیت، ئه‌ڤ ده‌مه‌ ژی یێ‌ نێزیكه‌ ژ ئاشۆپێ‌، ڤیان یا زاله‌ لسه‌ر هه‌می تشتان.
پشتی ژن دچیته‌ د ژیانا هه‌ڤژینیێ دا، ژیانا راستی ده‌ستپێدكه‌ت و ئاشۆپ نامینیت، ل ڤێرێ پترییا ژنان دێ‌ ڤێ‌ پرسیارێ‌ كه‌ن، ئه‌رێ‌ هه‌ڤژینێ‌ من هێشتا ڤیان بۆ من هه‌یه‌؟ ئه‌رێ‌ دێ‌ پاشه‌ڕۆژا من چاوابیت دگه‌ل ڤی كه‌سی؟ ئه‌رێ‌ سروشتێ‌ وی یێ‌ چاوایه‌ و دێ‌ دگه‌ل سروشتێ‌ من گونجیت یان نه‌؟
ل ڤێرێ ژی دێ‌ به‌رسڤا پرسیاره‌كێ‌ ده‌ین، ئه‌رێ‌ ژن حه‌زژ چ جۆره‌ هه‌ڤژینان دكه‌ن؟ بێگومان ژن ژی وه‌كو زه‌لامان دجودانه‌، لێ‌ پترییا ژنان حه‌زژ ڤان جۆره‌ هه‌ڤژینان دكه‌ن، یان ژی بێژین حه‌زدكه‌ن هه‌ڤژینێن وان ئه‌ڤ سالوخه‌ته‌ لده‌ف هه‌بن:
1ــ هه‌ڤژینه‌ك بیت گه‌له‌ك گرنگیێ‌ ب هه‌ڤژینا خوه‌ بده‌ت ژهه‌موو لایه‌كیڤه‌، ژبه‌ركو دهێته‌ گۆتن، ژن دشێت هه‌موو تشتان ل هه‌ڤژینێ‌ خوه‌ ببوریت، ب تنێ‌ پشتگوههاڤێتن نه‌بیت.
2ــ هه‌ڤژینی لێبۆرین لده‌ف هه‌بیت به‌رانبه‌ر هه‌ڤژینا خوه‌، ل شاشیێن وێ‌ ببۆریت و هه‌رده‌م لناڤ چاڤان نه‌ده‌ت، ب ره‌نگه‌كێ‌ جوان هان بده‌ت كو وێ‌ شاشیێ‌ دوباره‌ نه‌كه‌ت.
3ــ كه‌سه‌كێ‌ راستگۆ بیت لگه‌ل هه‌ڤژینا خوه‌، ژبه‌ركو هه‌كه‌ر ژنێ‌ دیت هه‌ڤژینێ‌ وێ‌ یێ‌ دگه‌لدا راستگۆ نینه‌، باوه‌ری د ناڤبه‌را وان دا نامینیت و دێ‌ ڕۆژ بۆ ڕۆژێ‌ ژێك دووركه‌ڤن، ڤیان نامینیت و دێ‌ خێزان ژناڤچیت.
4ــ زه‌لام هاریكاربیت دگه‌ل هه‌ڤژینا خوه‌ د په‌روه‌رده‌كرنا زاڕۆیان دا، هه‌روه‌سا هاریكارییا وێ‌ بكه‌ت د كاروبارێن ناڤمالێ دا، ئه‌ڤ چه‌نده‌ دێ‌ ڤیانێ‌ د ناڤبه‌را وان دا زێده‌كه‌ت.
5ــ زه‌لام گرنگیێ‌ ب رێكوپێكییا خوه‌ بده‌ت، بێ‌ گومان ئه‌ڤه‌ بۆ ژنێ‌ ژی یا پێدڤییه‌، بۆ هه‌ڤژینا خوه‌ ژی خوه‌ ب رێكوپێك بكه‌ت، نه‌ ب تنێ بۆ ژده‌رڤه‌ی مالێ‌ و دگه‌ل هه‌ڤالان.
6ــ زه‌لامه‌ك بیت باوه‌رییه‌كا تمام ب هه‌ڤژینا خوه‌ هه‌بیت و زێده‌ی رادده‌ى‌ سروشتی غیره‌تێ لده‌ف نه‌بیت و نه‌گه‌هیته‌ دلپیسیێ‌، ژبه‌ركو دێ‌ دلێ‌ ژنێ‌ شكێنیت و چو جاران بۆ زه‌لامێ‌ ژ ڤی ره‌نگی ڤه‌نابیت.
7ــ یێ‌ مه‌رد و دلڤه‌كری بیت دگه‌ل هه‌ڤژین و زاڕۆیێن خوه‌، لێ‌ د هه‌مان ده‌م دا كه‌سه‌كێ‌ زێده‌ ده‌ستبه‌رداى نه‌بیت.
8ــ گه‌له‌ك گه‌ریان و ده‌كه‌ڤتنان نه‌كه‌ت بێی هه‌ڤژین و زاڕۆیێن خوه‌، ئانكو هندی بشێت گه‌ریان و خوه‌شیێن وی دگه‌ل مالا وى دا بن.
9ــ كه‌سه‌كێ‌ دیكتاتۆر نه‌بیت د بڕیارێن خوه‌ دا، به‌لكو رایا هه‌ڤژینا خوه‌ وه‌ربگریت د هه‌ر كاره‌كى دا و رێزێ‌ ژی ل ڤێ‌ رایێ‌ بگریت.
10ــ ب باشی باسێ‌ وێ‌ بكه‌ت دگه‌ل هه‌ڤال و كه‌سوكاران و په‌سنێن خوارن و كارێ‌ وێ‌ بكه‌ت، ده‌مێ‌ ئه‌ڤ چه‌نده‌ دگه‌هێته‌ گوهێن وێ،‌ دێ‌ گه‌له‌ك كارتێكرن لێ‌ بیت و دێ‌ بزاڤا كارێن باشتر لده‌ف خوه‌ ده‌ت.

 

بابه‌تێن ب ڤێ مژارێ ڤه‌ گرێدای