ژناڤبرنا تێگه‌هێ ئۆپۆزسیۆنێ د پرۆسێسا سیاسیدا

غیاسەددین نەقشبەندی* :

سەرەڕایی مژوولییا مە ب داعشێ و بەرەیێن جەنگی، هەڤکێشا هه‌رێمی و جیهانی، پاشەرۆژا مللەتێ کورد و ڕاپرسیێ، وەرگرتنا چەک و پشتگیرییا جیهانی، پێکنەهاتنا مە دگەل بەغدایێ، پرۆسا سیاسەتا ناڤخوه‌یى ل کوردستانێ دێ مینیت جهێ نیگەرانی و ترسێ نەخاسمە هندەک خاڵێن گرنگ کو د پاشەڕۆژەکا نێزیکدا دێ بنە گرێ و چارەسەرکرنا وان هو بساناهی نابیت.
مە دیت پشتی چەندین کۆمبوون و هەولان، پێکهاتنا د ناڤبەرا گۆڕان و پارتیدا جێگیربوو، ئەڤ ڕێکكەڤتنە گەلەک ژ ڕێکكەڤتنا ستراتیجییا ئێکەتی و پارتی شەفافتر و رۆهنتربوو، هەر ئێکسەر خاڵێن وێ هاتنە دیارکرن و خەلکى هەمی دیتن و خواندن و ئاخڤتن لسەرکرن، هەروەسا پێکهاتنا پارتی دگەل ئیسلامییان ئەوژی ب شێوەیەکێ خوه‌ش دەربازبوو و جهێ دلخۆشیێ بوو کو هەمی لایەن لسەر سەرئێخستنا کابینه‌یا هەشت پێکهاتن، و هەستا وان یا نیشتیمانی لسەر بەرژەوەندییان زاڵبوو، ئەڤچەندەژی نیشانا پێشکەڤتنا هزرا سیاسییە ل هەرێمێ، چونکی زەمانێ پێکهاتنێن شێلی و پشتپەردەیان نەما، قۆناغا نهۆ، قۆناغا گوهۆڕینا بارێ سیاسییە و رێزگرتنێ ل مرۆڤی -هەمی مرۆڤان- وەکی تاک د ڤێ جڤاکیدا.
بەلێپا پارتی وەک خۆدان و هه‌ڤپشكا سەرەکییا پرۆسا سیاسی، هزرا خوه‌ د هندێدا کرییە ئەگەر هات و هەمی لایەن ب ئەرێبوون و رازیکرن ئینان ناڤ پرۆسا سیاسی، وەکی نموونه‌یا نەسەرکەڤتییا بەغدایێ، بۆ لێکڤەکرنا پلە و پایەیان، دێ کی بیتە ئۆپۆزسیۆن؟ تێبرنا ئۆپۆزسیۆنێ ب ئاشتی و پێکهاتن، هەرهندی تێبرنا ئۆپۆزسیۆنێیه‌ ب ئاگر و ئاسنى و زیان بۆ پاشەڕۆژا سیاسی هەیه‌، چو جوداهی نینە د ناڤبەرا تێبرنا ئۆپۆزسیۆنێ ب کوشتن و بڕین و دوورئێخستن و پشتگۆههاڤێتن، دگەل هندێ کو ب پێکهاتن و رازیکرن ب پله‌ و خەلاتکرن ئۆپۆزسیۆنێ تێببەی، نزانم چاوا پارتی ئەڤ لێکدانە نەکرییە و هزرا خوه‌ تێدا نەکرییە کو ناچێبیت حوکمەتەک هەبیت بێى ئۆپۆزسیۆن.
ب بۆچوونا من، ئەڤە هەڵەیەکا سیاسییا مەزنە کو ئەنجامێن وێ یێن خراب دێ پشتی دەمەکێ کورت دیاربن، ناچێبیت پارتی وەک خۆدانا سەرەکییا پرۆسا سیاسی و خۆدانا کەلتۆرەکێ دوور و درێژ دخەباتێدا، ب ڤی کارێ خەلەت ڤالاتییەکا سیاسییا مەزن ڤەکەت، دێ هەلێ بۆ دروستبوونا ئۆپۆزسیۆنەکا نەدیار رەخسینیت کو کەس نزانیت دێ چاوا دروستبیت و کی دێ دروستکەت و دێ مە بەرەڤ چى کەندالڤه‌ بەت؟ پێدڤییە پارتی وەک خۆدانا سەرەکییا پرۆسا سیاسی و سه‌ركه‌ڤتییا ئێکێ دهەڵبژارتناندا، مەودایەکێ ئازادییا سیاسی برەخسینیت و دەرزەکێ بهێلیت بۆ ڤاڵاکرنا کەرب و بێزاریێن جەماوەری، داكو بشێت زەمانەتا پاشەڕۆژەکا گەش بکەت و پێکڤەگرێدانا جەماوەری و دەستهەڵاتێ ژێک نەبزدینیت، پێدڤییە پارتی وەکی ئەرکەکێ نیشتیمانی و نەتەوەیی ڤێ دەرزکا ئومێدێ بهێلیتە ڤەکری، نەک هەمی دەرگەهان لسەر خوه‌ دائێخیت و چیێ شیانا گۆتنا (نا) هەبیت، ب شێوەیه‌کی بێدەنگ بکەت داكو کەس نەمینیت یێ نەرازی و کەس نەبێژیت نە‌!
پا دێ چاوا هەڵە و ڤارێبوونێن خوه‌ بینین؟ کی دێ بێژیتە مە دێ چاوا زانین کو حالەتێن ڤارێ یێن هەین و دڤێت بخوه‌دا بچین و خوه‌ چێکەین، چونکی ب ڤێ چەندێ دێ ئیفلیجی و سەقەتییا حوکمه‌تا ففتی/ففتی دوبارەبیتەڤە، بەڵگە بۆ ئاخڤتنا من هاتنا گۆڕانە بۆ ناڤ حوکمەتێ، ئەو جوش و حەماسا جاران نەمایه‌ لسەر رەخنەگرتنێ و لسەر گوهۆڕینێ، ئەگەر وەزیرێ دارایی گۆڕان نەبا، بەس خودێ دزانیت دا چى بسەرێ حوکمەتێ ئینن ژبەر گیروبوونا مه‌هانه‌یان، بەلێپا نهۆ گۆتارا وانژی وەکی گۆتارا حوکمه‌تێیە و کەس ژێدەرناکەڤیت.
پارتی وەک حزبەکا دێرین و خودان ئەزموون، ئەرکەکێ گەلەک گران لسەر ملێن وێ هه‌یه‌، چێنابیت ژبەر رازیکرنا هیچ لایەنەکی ئەرکێ سەرەکی ژ سەر خوه‌ بهاڤێژیتە سەر ملێن حزبێن دی، پارتی ل تەنگاڤى و نەخۆشییا بارێ بەرپرسایەتیێ ژ سەر ملێن خوه‌ نەهاڤێتییە، خێرە ئەڤرۆ دخۆشیێدا حزبێن دی ڕادکێشیتە ناڤ داكو هەمی پێکڤە تێبگلێن و کەس پاشەرۆژێ نەبێژیتێ تە بۆ هوکر! دڤێت پارتی تاقیکرنا خوه‌ یا دوور و درێژ دگەل ئێکه‌تیێ بینیتە بەرچاڤ و چاوا هەمی دامودەزگه‌هـ ئیفلجبوون و چو كار نەدهاتنەکرن و بڕێڤەنه‌دچوون و کوردستان بوو موڵگەهه‌کە ڕپن بۆ مرۆڤێن هەڵپەرست و هەڕفتی و هاڤی و سوود ژ ململانێیا هەردو لایەنان وەردگرت، زیانا ڤێ چەندێ ژی یا لسەر مە هەمییان، ئەم مللەتی هەمی زەرەرمەند دبین، چونکی ڤان هەڵپەرست و گەندەڵان کوردستان بەرەڤ پاشڤەبر و ناڤێ کوردان ب گشتی ل دەرڤەژی زڕاند و وەکی هەر پاراسایدەکی خوینا هەرێما کوردستانێ ب ته‌مامی مێژت.
سەرەڕایی ڤێ هه‌میێ، هەر دێ پارتى بۆ وەختەکێ نەدیار مینیت خۆدانا ئێکەم یا پرۆسا سیاسی، ژبەر هندێ چاکسازی دناڤ پارتیدا گەلەک بساناهیتر و سلامه‌تتره‌ ژ دژایەتیکرنا پارتى، ئانكو بۆ بزاڤا رزگاریخوازا مللەتێ کورد هەر پارتی بیت باشترە ژ ئێکێ لاواز کو کەس نەزانیت دێ پاشەڕۆژا کوردستانێ و هێزا لەشکری و ئابۆرییا وەلاتی بەرەڤ چى کەندالڤە بەت.
*شارەزا د کاروبارێن ستراتیجیدا
[email protected]

بابه‌تێن ب ڤێ مژارێ ڤه‌ گرێدای