ژبەرخۆ برنا کورپەلەی ب مەرەم..

ژبەرخۆ برنا کورپەلەی ب مەرەم..

ژبەرخۆ برنا کورپەلەی ب مەرەم..

“بوونا زارۆیان مرنا دایک و بابانە”.. ھیگل.

ژبەرخۆ برنا کورپەلەی، ئانکو دەرکرنا زارۆیەکێ ھێش قۆناغا گەشەکرنێ ل ناڤا رەحمێ دایکێ تەمام نەکری، بەری بھێتە ل ناڤ ھەبوونا جیھانا دەرڤەی زکێ ژنێ. ژبەرخۆبرنێ گەلەک شێواز و جۆر و پێناسەیێن جودا ھەنە، ھەیە ژ بەرخۆبرنا ب مەرەم و ژ بەرخۆ برنا بێ مەرەم، دیسان د دیرۆکا مروڤایەتییێ دا ژ بەرخۆبرنێ مێژوویەکا کەڤن ھەیە، ل قۆناغێن دەسپێکی ژنان ب شێوازێ دەرمانێن سروشتی ئەڤ کریارە دکر، لێ پشتی گەشەکرنا زانستێ پزیشکی شێوازێن ساخلەم و جودا گرتنە بەر!

گرنگە خویابیت کو ھەر ژ کەڤندا ھەڤرکی و گەنگەشە کا زۆر ھەبوویە ل دۆر ڤی بابەتی ل وەلات و دەڤەرێن جودا ل سەر ئاستێ جیھانێ بگشتی، ھەر تاکەک ل دۆر بیروبۆچوون و فەلسەفەیا ژینگەھا خۆ ڤی بابەتی ل چارچوڤەیێ ئەخلاقی و ئاینی و کۆمەلایەتی دا دبینیت، ھەر ژ بەر ڤێ یەکێ ل سەر ئاستێ جوداھییا تێگەھشتنا تاکی دو رەوت دیار بوون، ئالییەک بۆ بەرەڤانێ ژ بەرخۆبرنێ و ب مافێ ژنێ دیت و ھەر ئەڤە بوویە دەست کەفتییێ شۆرەشا ژنێ ل چەرخێ بیستێ. ئالییەک ژی دیار بوو ب توندی دژی ڤی بابەتی ژ بەر سەدەمێن جودا ژ گرنگترین سەدەما ژی سەدەمێ ئاینی کو ب کریارەکا دژی شەریعەتی قەلەم ددەن، نھا ل زۆربەیا وەلاتێن ڕۆژھەلاتی ب تاوان دھێت قەلەم دان. لەورا ئەم دشێن ل ڤێرێ وەسا ببینین کۆ بابەتێ ژ بەرخۆبرنێ بۆ کۆمەکا بۆچوونان، کو پێکھات ژ چەند بیرو باوەران، مژار بەرەڤ ئاراستێ ئەخلاقیەتێ بر! دیسا ژ ئالییەکی دیڤە ل ھندە وەلاتێن مینا وەلاتێ عیراقێ مژار بوو مژارەکا سیاسی و ئاینی و بەرەڤ مایتکرنا حکومەتێ بەرێڤە بوو. ئانکو ل وەلاتێن پێشکەفتی مینا وەلاتێن سویدێ ھەر ل سالا ١٩٣٨ رێ ب ھەمی شێوازێن ژ بەرخۆبرنێ ھاتە دان، ل وەلاتێن ئێکگرتی بابەت بوو بابەتەکێ گرێدای تاکە کەسی یە و سەرەدەری دگەل ھاتەکرن وەک بابەتەکێ گرێدای ئازادییا ژیانا تاکی و ب رژدی ل وەلاتێن ئەورۆپی ب گشتی ل سەر بابەتی راوستیان، ھەتا سالا ٢٠٠١ کار ل سەر ڤێ مژارێ ھاتە کرن، وەک بابەتەک بۆچوونا گشتی ل سەر ھات وەرگرتن و چەندین ئامار ھاتنە خویاکرن، کانێ چەند ژ خەلکێ گشتی دگەل ژ بەرخۆبرنێ نە.

لێ ھەکە ئەم بەرەڤ وەلاتێن پاشکەفتی ڤە بھێن، دێ بینن ھەڤژینی ب خۆ چارەنڤیسێ ھەر مێ یەکێ یە رۆھنتر بێژم ھەر کچەک ل قۆلاچکەکا وەلاتەکێ پاشکەفتی دا یان یا د قۆناغا ھەڤژینێ دا یان ژی چاڤەرێ یە، بکەڤیت د وێ قۆناغێ دا، ئەڤە ژی تێرا ھندێ دکەت ئاستێ ھشیارییا ژنێ ل وێ پارچێ بزانین، پرۆسەیا ھەڤژینێ، ھێش ژ چارچووڤەیێ چاڤ لێکرنێ دەرباز نەبوویە، نەژی ھەستا بەرپرسیاریەتێ ھاتییە دیارکرن، ھەلبەت ھەر ل دەمێ کچ زارۆ ژبلی وێ یەکێ چ دی ل ناڤ مێشکی ناھێتە چاند ل وی دەمێ بیکەکا لاستیکی دانن ناڤ دەستێن وێ دا، دگەل لاندکەکا بچیک ژێ دخوازن چارەنڤیسێ خۆ بزانیت. ئاخر ئاھا ژ وێ خالێ پیرۆزکرنا ئەرکێ دایکینییێ دھێتە چاندن، ھەر پیرۆزییەک ژی تێرا ھندێ ھەیە تو دونیایەکا قۆربانییێ ژ پێخەمەت بدەی، ئەڤە ب خۆ ژی مینا ڕۆژێ یا رۆھنە کا چەند ژنان  پێ ل ھەمی ئاستەنگا دانایە و ھەر تشت گۆری دایکینا خۆ کرییە! لێ پرسیار ئەوە ئەرێ دایکینی بەندایەتی یە؟

ئەگەر ئەم  ڕوویەکێ دیتر یێ بابەتی دیار بکەین، کێ ماف ھەیە بریارێ ل سەر چارەنڤیسێ ھاتن و نەھاتنا زارۆیەکی بدەت، ئەگەر ھەر دایکە قۆربانییێ ددەت؟ وەکی یا خویا ل ناڤ یاسا یا وەلاتێ عیراقێ و ھەرێما کوردستانێ ژ بەرخۆبرن ب تاوان ھاتییە دانان!

ھەمبەری وێ چەندێ ھەر ژئێکەم ڕۆژ ھەردو وەلات ب چ ڕەنگان دبەرھەڤ نین، بچویکترین مافێن وی زارۆی و دایکێ دابین بکەن، بابەت گەلەک مەزنترە ژ تاوان و گونەھێ، بەلکی بابەت ئەوە، ئەرێ بابەت بتنێ تاوان و گونەھە؟ یان بابەت سیاسەت و بازرگانی یە؟ بوچی ژ وی ئالی ڤە بەرێ خۆ  نادەینێ؛ ئەرێ ئەو ژن، ئەو مرۆڤ پێدڤی ب ھێزێ و ھەستان و ڤیانێ و گرنگی پێدانێ یە زێدەباری وی ئالییێ ماددی! ئەڤە ژ لایەکی ڤە، ژ لایێ دی، ئەرێ ئەو ژن یا بەرھەڤە قۆربانییێ ب ژییێ خۆ، حەزێن خۆ، ساخلەمییا خۆ، ھەست و خوشیێن خۆ بدەت؟ ب حەزا خۆ نەک بتنێ کو ئەو یا نەچارە ژ بەرکو بچ رەنگان ئەو یا نەچار نینە!

ئاخر عیراق یا مرۆڤەکێ تەمام و بێ ئەگەر دکوژیت، کەنگی یاسایێ ماف ھەیە باس ل مافێ مرۆڤان بکەت! قۆربانیین ھاتن و چوونێ ل ھەرێما کوردستانێ تێرا ھندێ دکەن باس ل چارەنڤیسێ یێن نەھاتی نەکەت! ژ بەرچ ھەکە ژن یا بەرھەڤ نەبیت، ب چ بھانە بیت زارۆیەکی خودان بکەت، نەچار ببیت پەنایێ ببەتە بەر رێکەکێ ژیانا خۆ بئێخیتە مەترسییێ ژ پێخەمەت یاسایەکا چ بھایێ خۆ نەی و چ رامان نەی، دا وی زارۆی نەینیت؟ ل دەمەکی ئەڤە مافەکێ رەوایێ ھەر ژنەکێ یە ژ وێ زێدە چ کەسەکی ماف نینە بریار ل سەر بدەت.

لەورا دخوازم رێکخراوێن خۆ بەرپرس ژ دۆزا ژنێ دادنن و پەرلەمانتارێن ژن، جارەکا ب تەنێ کارەکی بکەن بێھنا ژنبوونێ ژێبھێت و خزمەتا ژنێ بکەت دویر ژ خۆلێن ھەوە یێن دروینێ! جارەکێ خۆ ب خۆ ھشیار بکەن، بەلکی ھوین بشێن ژنێ ھشیاربکەن، دەمەک بھێـت ھوین بگەھنە وی ئاستێ ھشیارییێ ڤێ یاسایێ بگۆھەرن و رێکخستنا مالباتێ بکەن نەریتەک و پرۆسەیا ھەڤژینێ ژی بکەنە بەرپرسیاری.

بابه‌تێن ب ڤێ مژارێ ڤه‌ گرێدای