چ د قۆناغا گه‌نجاتیێ دا فه‌ره‌ مرۆڤ بكه‌ت؟

چ د قۆناغا گه‌نجاتیێ دا فه‌ره‌ مرۆڤ بكه‌ت؟

وار – دهۆک :

ژیانا هه‌ر مرۆڤه‌كى ده‌ما دگه‌هیته‌ قۆناغا سنێله‌یێ و پشتى هینگێ گه‌نجاتیێ، گه‌له‌ك هه‌ستیار دبیت و گه‌له‌ك گرفت و ئاسته‌نگ و نه‌خوه‌شى دكه‌ڤنه‌ د رێیا مرۆڤى دا، ژبه‌ركو د وێ قۆناغێ دا مرۆڤ ژنوو پێدگه‌هیت و گه‌له‌ك تشتان ب باشى ژێ نزانیت و ئاوایێن سه‌ره‌ده‌ریكرنا دروست باش نزانیت، هه‌ر د ڤێ قۆناغێ دا مرۆڤ به‌رهه‌ڤییان دكه‌ت بۆ ژیانا خوه‌ یا پاشه‌ڕۆژێ، ئێك ژ وان به‌رهه‌ڤییان ژى ئه‌وه‌ كو هه‌ر كه‌سه‌ك دڤێت بۆ خوه‌ خێزانه‌كا نوو ئاڤابكه‌ت، ئه‌ڤجا چو كوڕ بیت یان كچ، ئه‌ڤجا ئه‌ڤ به‌رهه‌ڤییه‌ كو گه‌له‌ك جاران گه‌نجان تووشى شاشییان دكه‌ن، ژبه‌ركو نزانن لسه‌ بنه‌مایێن دروست پێنگاڤێن خوه‌ بهاڤێژن، به‌لكو پترییا گه‌نجان زوو بڕیارێ دده‌ن و ب وێ بڕیارا بله‌ز دبیت مالا خوه‌ وێران بكه‌ن.
د ڤان خالێن خوارێ دا چه‌ند پێزانینه‌ك بۆ گه‌نجان هاتینه‌ دیاركرن بۆ ب لبه‌ر چاڤوه‌رگرتنا وان، دێ پتر د ژیانا خوه‌ دا سه‌ركه‌ڤتى بن، ئه‌و ژى ئه‌ڤه‌نه‌:
ــ بزانە ژیێ ته‌ سه‌رمایێ سه‌ره‌كیێ ژیانا ته‌یه‌، ئه‌ڤجا د تشته‌كى دا ب به‌لاش خه‌رجنه‌كه‌ كو مفا نینه‌.
ــ باشترین هه‌ڤال بۆ خوه‌ هه‌لبژێره‌، خوه‌ دووربگره‌ ژ هه‌ڤالێن خراب و جڤاتێن مرۆڤێن خراب.
ــ خوه‌ ده‌ربازبكه‌ دگه‌ل راستگۆیى و به‌خشین و هه‌ولدانێن به‌رده‌وام، ژبه‌ركو ئه‌ڤه‌ دبنه‌ فاكته‌رێ لابرنا پترین گرفت و به‌لایان.
ــ به‌رده‌وام بزاڤێ بكه‌ د جڤات و روونشتنێن زانستى دا به‌رهه‌ڤبى، داكو ته‌ پێزانین لسه‌ر هه‌ر زانسته‌ك و بیاڤه‌كێ پێشكه‌ڤتنێ هه‌بن.
ــ خوه‌ ب مرۆڤه‌كێ ڤه‌كه‌رى و تێگه‌هشتى دیاربكه‌ و كریارێن ته‌ ژى بلا لسه‌ر وى بنه‌ماى بن و هندى بشێى خوه‌ ژ دفنبلندى و مه‌زنكرنێ دووربكه‌.
ــ گه‌له‌ك خوه‌ دووربكه‌ ژ چاڤپێنه‌رابوونێ (حه‌سوودى)، ژبه‌ركو ئه‌ڤه‌ مرۆڤى ژ هه‌ر هیڤى و ئارمانجه‌كێ دووردئێخیت و د ناڤ جڤاكى ژى دا دبیته‌ مرۆڤه‌كێ بكێرنه‌هاتى و خه‌لك دێ گه‌له‌ك كێم تێكه‌لیێ دگه‌ل مرۆڤى كه‌ن.
ــ گوهدارییا دایبابان خوه‌ بكه‌ و هه‌ر كار و كریاره‌كێ بۆچۆنا وان وه‌ربگره‌.
ــ همبه‌رى هه‌ڤالێن خوه‌ هه‌رده‌م ب گرنژین به‌ و به‌رده‌وام سه‌ره‌دانا هه‌ڤالێن خوه‌ بكه‌ و ژبیرنه‌كه‌ وان.
ــ بۆ هه‌ر كار و تشته‌كێ گرێداى ب ژیانا ته‌ ڤه‌ هه‌ى، زوو بڕیارێ نه‌ده‌، ب تایبه‌ت ده‌ما دخوازى ببیه‌ عاشق و خێزانه‌كا نوو بۆ خوه‌ پێكبینى.

بابه‌تێن ب ڤێ مژارێ ڤه‌ گرێدای