چێلا ئیراقێ و بێرىیا ترك

فاضل عمر

ئه‌نجامێن رێفراندۆما كوردستانێ، نه‌ به‌س گۆلا رۆژهه‌لاتا ناڤین له‌قاند، به‌لكو دێمجامه‌ ژ سه‌ر هه‌مى روویان هه‌لدا و هه‌مى راستى باشتر به‌لى كرن. له‌و دیمه‌نێ گشتى بۆ هه‌ركه‌سى، رۆهنتر و ئاشكراتر بوویه‌.

ئیرانێ پێ خوه‌شه‌ فشار لسه‌ر هه‌رێما كوردستانێ زێده‌ ببت و كوردستان نه‌چار ببت رێیه‌كێ ژ دوو‌ان بگرت؛ یان كوردستان خوه‌ هه‌وجه‌ى ئیرانێ و رۆسیا بكه‌ت و بچته‌ ئه‌وى ئالى یان نه‌چار ببت و چه‌نگشكه‌ستى ڤه‌گه‌ڕته‌ به‌غدا… هه‌ردو بژاره‌ بۆ ئیرانێ باشن، چونكى كڤانێ شیعى دێ پێ ته‌مام بت. به‌لگه‌ ژى ئه‌وه‌؛ ئیران وه‌كو یان هندى ئیراقێ و توركیا دژى ئه‌نجامێن رێفراندۆمێ، دژوار نینه‌، به‌س پشته‌ڤانىیێ ل هه‌ردو وه‌لاتان دكه‌ت‌ پتر گڤاشتنێ بكه‌ن.
تشتێ سه‌رنجراكێش، هه‌لوه‌ستێ رێبه‌رێن توركیایه‌. دێ بێژى دخه‌و بوون و كابووسكه‌كى ژخه‌و راكرینه‌. ژ ئالیه‌كىڤه‌ هه‌مان قاونێ كه‌مالیستان لێ دده‌ن، كو نابت كوردان هیچ گیانه‌كێ سیاسى ل هیچ جهه‌كى هه‌بت، ل ئالىیێ دى زاراڤێ باكۆرێ ئیراقێ پتر ژ شۆ‌ڤینىیێن ئه‌ره‌ب بكاردئینن و ئاشكرا دبێژن: پێدڤىیه‌ ئه‌و ده‌نگێن ل رێفراندۆمێ داین، بهێنه‌ ڤه‌گه‌ڕاندن بۆ خودانان!! دێ بێژى ده‌نگ كیلۆیه‌كا نیسكانه‌ دێ بۆ خودانى هێته‌ ڤه‌گه‌ڕاندن.
ئه‌ڤ هه‌لوه‌ستێ ئایدیۆلۆجى به‌رانبه‌ر خه‌لكێ هه‌رێما كوردستانێ كو پارچه‌یه‌كه‌ ژ ده‌وله‌ته‌كا دى، هیچ به‌هه‌ و به‌رژه‌وه‌ندیه‌كا ئابۆرى و سیاسى لبه‌ر چاڤ ناگرت، به‌لكو لسه‌ر بنه‌مایه‌كێ ئایدیۆلۆجى ئاڤا دبت و ئه‌ڤه‌ توركیا ڤه‌دگه‌ڕینته‌ سه‌رده‌مێ كه‌مالیزمێ.
ئه‌ڤجا، ب دیتنا من، پێدڤىیه‌ توركیا تێبگه‌هت كو خه‌له‌تیه‌كا سیاسىیا كوژه‌كه‌ فشاره‌كا دژمنانه‌ ل هه‌رێما كوردستانێ بكه‌ت و نه‌چار بكه‌ت بڕیاره‌كا ڤه‌بڕ دژى به‌رژوه‌ندىیێن وێ بده‌ت. هه‌روه‌سا تێبگه‌هت كو كوردستان چێله‌كا شیردارا بێخودان نینه‌، تركیا ب حه‌زا خوه‌، لسه‌ر ناڤێ ئیراقێ تاپۆ بكه‌ت و بێرىیێن خوه‌ بهنێرت بۆ بدۆشن.
تیر ژ كڤانى ده‌ركه‌ڤتىیه‌! كوردستانیان بڕیارا خوه‌ دایه‌ و مایه‌ ئه‌و بڕیارا تاكه‌كه‌سى، ببته‌ بڕیاره‌كا سیاسىیا گشتى… وه‌خت هاتىیه‌ كو تركیا و ئیران و ئیراق تێبگه‌هن كو زه‌مان هاتىیه‌ گوهاڕتن و هه‌كه‌ر نه‌خوه‌ش بوو، دێ بۆ هه‌میان نه‌خوه‌ش بت.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.