چوار ژن ب ئاوایه‌كێ جودا دێ هاریكارییا ژن و زاڕۆیێن ئاوارە كه‌ن

چوار ژن ب ئاوایه‌كێ جودا دێ هاریكارییا ژن و زاڕۆیێن ئاوارە كه‌ن

Capture

وار – رێڤینگ ره‌سوول :

دگه‌ل ھاتنا رێژه‌یه‌كا زێده‌یا ئاوارەیان ژ کوردێن شنگال و دەوروبەرێن وێ بۆ ھەرێما کوردستانێ، کەمپین و گرۆپێن ھاریکاریێن ھەمەجۆر بۆ هاریكارییا مرۆڤییا وان ئاواره‌یان هاتنه‌ دروستكرن، لێ چار ژن ب رێیا دروستکرنا کەمپینه‌کێ جودا ژ کەمپینێن دى، وان کەرسته‌یێن مرۆڤى پێشکێشى زاڕۆ و ژنێن ئاوارە دکەن کو د کەمپین و هاریكاریێن دى دا هاتنه‌ پشتگوهخستن.
ھەر ئێک ژ (لازۆ ئازاد-هه‌لبه‌ستڤان، تەرزە جاف-هه‌لبه‌ستڤان، لاڤە ئازاد و تارا جاف سترانبێژ) کەمپینه‌ک بۆ زاڕۆ و ژنێن ئاوارە پێکئینایه‌ و ب (کەمپینا پیرۆزه‌) ناڤكر. د هه‌ڤپه‌یڤینه‌كێ دا دگه‌ل (باس) لازۆ ئازاد باس ل ڤێ كه‌مپینێ و جۆرێن هاریكاریێن وێ كرییه‌.

سه‌باره‌ت ب ناڤكرنا كه‌مپینێ ب (پیرۆزە)، لازۆ ئازاد، دبێژیت: ”ژبۆ كو باسێ ناڤێ کەمپینێ بکەم، پێدڤییە باسێ هزرا دروستبوونێ بکەم، د حەفتییا بۆرى دا پشتى خه‌لكه‌كێ زێده‌ هاتینه‌ باژێڕێن هه‌رێمێ، ئه‌م لدووڤ نووچه‌یێ وێ ئێكێ چووین كا ئه‌و ئاواره‌ ل كیڤه‌ دهێنه‌ ئاكنجیكرن، پشتى مه‌ زانى پترییا وان ل نزیک عەنکاوەنه‌. ل ده‌ستپێكێ ئه‌م بەرەڤ کەمپا به‌حرکێ چووین، گەهشتنا مه‌ بۆ وێرێ هه‌ڤده‌م دگه‌ل ده‌ستپێكا دروستبوونا وێ کەمپێ، ڕێکخراو مژوولى دابینکرنا پێدڤیێن ده‌ستپێكى بوون بۆ ئاوارەیان وه‌كو دانا خیڤه‌ت و بەخشینا خوارنێ. دگه‌ل دیتنا وان خێزان و زاڕۆیان، مه‌ هزر ل وێ ئێكێ كر چاوا دێ شێین هاریكارییا وان مرۆڤان كه‌ین كو مال و جهێن خوه‌ هێلاینه‌ و نوكه‌ ب ڤى ئاواى دژین. له‌و مه‌ بڕیاردا ژ خوه‌ ده‌ستپێبكه‌ین، ئارمانجا سەرەکییا کەمپینا پیرۆزە ژى ھاریکرنا ژن و زاڕۆیانه‌. سەبارەت ب ناڤێ كه‌پینێ ژى، پیرۆزە وەکو ڕەنگه‌کێ ژنانە و جوان، وەکو رەنگێکی هین و ئارامکە. پێدڤییە ئاماژەیێ پێ بکەم، ئه‌ڤ کەمپینه‌ ژبال ٤ ژنان ڤه‌ دامەزرایە و دهێته‌ سەرپەرشتیكرن. بۆ زێده‌تر گەشەکرن و به‌رفره‌هكرنا ڤێ كه‌مپینێ، ئه‌ز و تەرزە جاف ل كوردستانێ كاردكه‌ین و تارا جاف ل بەریتانیا و لاڤە باستان ل سوید ھاریکارییان كۆمدكه‌ن”.
د به‌رسڤا پرسه‌كێ دا كا تا نوكه‌ ئه‌و هاریكارییه‌ د چو ئاسته‌كى دانه‌، هه‌لبه‌ستڤانا هان گۆت: ”ل بیرا مه‌ نەچیت رێژەیا ھاتنا ئاوارەیان رۆژ ب رۆژێ د زێده‌بوونێ دایه‌ و سەرەرای وێ ئێكێ كو جڤاكێ مەدەنی و ڕێکخراوێن جۆراو جۆرێن مرۆڤی یێن بیانی و هاریكارییا ئەو خەلکێ سڤیلێ خوه‌بەخشانە کاردکەن و هاریكارییان دده‌نه‌ ئاواره‌یان، ھێشتا ڤان ئاواره‌یان پێدڤى كار و هاریكاریێن زێده‌تر هه‌یه‌. ئەڤ کەمپینا بچووكا مه‌ د ده‌ستپێكا خوه‌ دایه‌ و هه‌ڤده‌مى وى كارێ مه‌؛ چەندین کەمپینێن جودا ل هه‌رێمێ هاتینه‌ راگه‌هاندن. له‌و دبیت پێشكێشكرنا ھاریکارییان وەکو پێدڤى ل ئاستێ خەونا مه‌ دا نه‌بیت، لێ ھەستدکەین ئەڤە بەرەڤ باشیێ دچیت و خەلکه‌كێ زێده‌تر پشتى گوهـ ل ڤان كه‌مپینان دبیت، دهێن و هاریكارییان پێشكێشدكه‌ن”.
هه‌وه‌ هزرنه‌كرییه‌ كو بۆ كۆمكرنا هاریكاریێن دراڤى پشت ب چالاکیێن ئەدەبی و ھونەری ببەستن؟ د به‌رسڤا ڤێ پرسێ دا لازۆ خانێ گۆت: ”د ڤێ ره‌وشێ دا گه‌له‌ك بله‌ز گۆرانكارى بسه‌ر ھاوکێشەیان دا دهێن و ژیانا مرۆڤان د ئاسته‌کى دایە کو دڤێت دەملدەست کار بۆ بهێته‌كرن. چالاکییا ئەدەبی ژى ده‌م و جهـ و گونجاندنا کەش و ھەوای دڤێت، لێ ته‌ راستى بڤێت، ئه‌ز ب خوه‌ هزر ل ڤێ ئێكێ دكه‌م چاوا ب زووترین ده‌م هاریكارى بگه‌هنه‌ ده‌ستێ من و پێدڤیێن وان ژن و زاڕۆیێن ئاواره‌ پێ دابینبکەم، هه‌ر وەکو وێ ئێكێ كو چاڤەڕێبم ب رێیا کۆڕه‌کێ هه‌لبه‌ستخواندنێ داهاته‌كى بۆ وان ئاواره‌یان كۆمبكه‌م”.
ڤێ هه‌لبه‌ستڤانا ژن ئه‌و ئێكه‌ ژى گۆت: ”وه‌كو مه‌ راگه‌هاندى ئارمانجا سەرەکییا مە ھاریکرنا ژن و زاڕۆیانه‌، ژبه‌ركو ئه‌م وه‌سا دبینین، ئه‌م ھەم وەکو ژن و ھەم وەکو دایک، باشتر پێدڤیێن خوه‌ دزانین، ئه‌ڤجا بۆ ئەو ژنێن ئاوارەبووین و د ناڤ کەمپان دا دژین، ب ساناهیتره‌ داخوازیێن خوه‌ بێژنه‌ ژنه‌کێ هه‌تا زه‌لامه‌كى”.

بابه‌تێن ب ڤێ مژارێ ڤه‌ گرێدای