چه‌كداركرنا پێشمه‌رگه‌ى بۆ شه‌ڕێ تیرۆرا جیهانى

 

مافپه‌روه‌ر
ئه‌حمه‌د عارف ئامێدى :

ئه‌وا ئه‌ڤرۆ ل ئیراقێ و هه‌رێما كوردستانێ دهێته‌دیتن ژ هه‌بوونا كۆم و هێزێن تیرۆرا جیهانى، ژیواره‌كێ نوو ل ناڤخوه‌ییا ئیراقێ و هه‌موو جیهانێ په‌یداكر نه‌خاسمه‌ په‌ڕله‌مانێن جیهانێ ئینانه‌ده‌نگ داكو وانژى په‌یڤا خوه‌ هه‌بیت ل ڤى ژیوارێ بترس، چونكو په‌یدابوونا ڤان هێزێن تاریێ ل ئیراقێ و ده‌ڤه‌رێ، زه‌نگا ترسێیه‌ بۆ ناڤخوه‌ییا وه‌لاتێن رۆژئاڤا ژى، له‌و وانژى دڤێت وه‌لاتێن وان ده‌ست هه‌بیت د ژناڤبرنا ڤێ ئێشا ڤه‌گردا و داكو وێ ژ ره‌هـ و ریشالان هه‌لكێشن.
ئه‌ڤرۆ وه‌لاتێن هه‌موو جیهانێ تێگه‌هشتینه‌ كو مفاوه‌رگرتن ژ ئه‌زموونێن نه‌دوورێن بۆرى، دێ بیته‌ هاریكار كو ئه‌و بهه‌ڤڕا كارى بۆ ژناڤبرنا ڤان هێزێن تاریێ ب تایبه‌تى داعشێ بكه‌ن، له‌و ئه‌م دشێین بێژین كو به‌رى نهۆ، ئه‌و سه‌ره‌دانێن مه‌زنه‌ به‌رپرسێن جیهانى بۆ هه‌رێما كوردستانێ، دانپێدانه‌كا ئاشكرابوو بۆ هه‌ڤپشكییا كوردان د شه‌ڕێ دژى تیرۆرا جیهانیدا، ئانكو سه‌ره‌دانێن وه‌زیر و سه‌رۆك وه‌زیر و سه‌رۆك وه‌لاتێن سه‌ره‌دانا هه‌ولێرێ كری و دگه‌ل نوونه‌رێن جڤاكێ كوردستانى كۆمبووین، هندێ ژى دگه‌هینیت كو ملله‌تێ كورد، ملله‌ته‌كێ ساخله‌م و ئاشتیخوازه‌ و پشته‌ڤانیێ ل ئارامى و ئاساییشا هه‌رێمى و جیهانى دكه‌ت كو ئه‌و یه‌ك دبه‌رژه‌وه‌ندییا هه‌موو ملله‌تێن جیهانێدایه‌.
پڕچه‌ككرنا هێزێن پێشمه‌رگه‌ى ب چه‌كێ نوو ژ لایێ وه‌لاتێن دۆستێن كوردانڤه‌، و مه‌شق و راهێنانكرن ب وان، هه‌روه‌سا پێشكێشكرنا هاریكاریێن لۆجستى كو لدووڤ ژیوارێ نهۆ یێ جیهانى بگونجیت، دێ بیته‌ ئه‌گه‌رێ چێبوونا هیڤییان لجه‌م جڤاكێ كوردستانى و لادانا وێ ترسا به‌رى نهۆ حوكمه‌تێن ئیراقێ ژ ڤى بابه‌تى، چونكو هه‌ر ژ سالا 2003ێ و تاكو نهۆ، حوكمه‌تێن ئیراقى دژى پڕچه‌ككرنا هێزێن پێشمه‌رگه‌ى بوون، لێ پڕچه‌ككرنا هێزێن پێشمه‌رگه‌ى، دێ بیته‌ هاریكار بۆ بهێزبوونا پشكه‌كا گرنگ یا تۆڕا پاراستنا ئیراقى و دێ ئارامیێ لجه‌م هه‌موو وه‌لاتیێن ئیراقێ چێكه‌ت، چونكو ئه‌و ترسا نهۆ لسه‌ر گشت ئیراقێ ژ تیرۆرا داعشێ هه‌یى، گه‌له‌ك یا مه‌زنه‌، ئانكو نابیت حوكمه‌تا ناڤه‌ندى خوه‌ ژ پڕچه‌ككرنا هێزێن پێشمه‌رگه‌ى بترسینیت، چونكو حوكمه‌تا هه‌رێما كوردستانێ پشته‌ڤانییا خوه‌ بۆ حوكمه‌تا نوو یا عه‌بادى دیاركرییه‌ كو ئه‌و نیشانا كاركرنا پێكڤه‌یه‌ دژى تیرۆرێ.
هه‌موو ئه‌و سه‌ره‌دانێن ڤێ دوماهیێ مه‌زنه‌ به‌رپرسێن وه‌لاتێن رۆژئاڤا بۆ هه‌رێما كوردستانێ كرین و ئه‌و كۆمبوونێن دگه‌ل كاربده‌ست و سه‌رۆكێ هه‌رێما كوردستانێ سازكرین، ده‌ربڕین بوون ژ پڕچه‌ككرنا هێزێن پێشمه‌رگه‌ى ب چه‌كێ نوو و كاریگه‌ر، مه‌ره‌م ژى ئه‌وه‌ كو رێ لبه‌ر گه‌شه‌كرنا هێزێن تیرۆرا جیهانى بهێته‌گرتن و لسه‌ر ئه‌ردێ كوردستانێ ئه‌و بهێته‌ ژناڤبرن، له‌و مرۆڤ یێ دبینیت رۆژانه‌ سه‌ركه‌ڤتنێن پێشمه‌رگه‌ى لسه‌ر تیرۆرستین داعشێ پێشچاڤ دبن، لێ ئه‌و سه‌ركه‌ڤتن ژى بێى زیان نینن، چونكو شكاندنا داعشێ ل گه‌له‌ك به‌رۆكێن شه‌ڕى، ب خوونا چه‌ندین شه‌هید و بریندارێن قه‌هره‌مان بوویه‌ كو ل وى وه‌ختێ ملله‌تێ وان ب ئارامى ل مال و لسه‌ر كارێن خوه‌ دئارام، وان ل به‌رۆكێن شه‌ڕى خوونا خوه‌ بۆ وان كرییه‌ قۆربان، ئه‌و قۆربانی ژى، دێ ب بۆرینا سال و زه‌مانان ددل و ده‌روون و مه‌ژیێ كورد و كوردستانییاندا زیندى مینن.
ئه‌ڤرۆ لسه‌رئه‌ردى، ئه‌مریكا و وه‌لاتێن ئۆرۆپى، پشبه‌ستنێ ب هێزێن پێشمه‌رگه‌ى و سۆپایێ ئیراقێ دكه‌ن بۆ ژناڤبرنا داعشێ ل ئیراقێ، داكو ئه‌و رێكخراوا تیرۆرى ل وه‌لاتێن ده‌ڤه‌رێ به‌رفره‌هـ نه‌بیت و ده‌وله‌تا (خیلافه‌تێ) ئاڤانه‌كه‌ت كو ئه‌و یه‌ك ژى ب چو ره‌نگان چێنابیت، لێ ئه‌مریكا و وه‌لاتێن ئۆرۆپى و هنده‌ك وه‌لاتێن ئه‌ره‌بى ژى، ب رێیا ئاسمانى دربێن كوژه‌ك دانانه‌ تیرۆریستێن داعشێ، ئه‌و یه‌ك ژى بوویه‌ هاریكارییه‌كا باش بۆ هێزێن پێشمه‌رگه‌ى و سۆپایێ ئیراقێ.
ئه‌م دشێین بێژین كو ئه‌و تیرۆرا ئه‌ڤرۆ ل ئیراقێ و سووریێ گه‌شێ دكه‌ت، نه‌ دین هه‌یه‌ و نه‌ ژى مه‌زهه‌ب، تنێ دین و مه‌زهه‌بێ وان كوشتنا بێگۆنه‌هانه‌ و ده‌ربه‌ركرنا وان وه‌لاتیێن نه‌ لسه‌ر هزرا وان یا گه‌نى، ئه‌وژى ژناڤبرنا هه‌موو جۆرێن ژیانێ و شارستانییه‌تێیه‌، و سۆتنا ته‌ڕوهشكانه‌ پێكڤه‌.
ل ڤان رۆژێن دوماهیێ، مرۆڤ یێ دبینیت وه‌لاتێن جیهانا ئازاد یێ سۆپاسییا پێشمه‌رگه‌ و خه‌لك و حوكمه‌تا هه‌رێما كوردستانێ دكه‌ن لدۆر خوه‌راگرى و ئه‌و شه‌ڕێ دگه‌ل تیرۆرا جیهانى دكه‌ن، ئه‌و وه‌لاتێن جیهانێ، به‌رێ خوه‌ دده‌نه‌ ڤى شه‌ڕى نه‌ك تنێ دژى كوردانه‌ دهێته‌كرن، به‌لكو شه‌ڕه‌كه‌ داعشێ به‌رپاركرى دژى هه‌موو مرۆڤایه‌تیێ، لێ پێشمه‌رگه‌ و كورد و حوكمه‌تا كوردستانێ ژ پێش هه‌موو جیهانێڤه‌ یێ شه‌ڕێ نه‌خۆشییا چاخێ بیست و ئێكێ دكه‌ن.

بابه‌تێن ب ڤێ مژارێ ڤه‌ گرێدای