پەخشان زەنگه‌نە: ناڤه‌ندێن ئەرەبی و ئیسلامیێن ژنان بێ هەلوه‌ستن

پەخشان زەنگه‌نە: ناڤه‌ندێن ئەرەبی و ئیسلامیێن ژنان بێ هەلوه‌ستن

Capture

وار – كوردۆ رۆژهات :

پەخشان زەنگنە ئەمیندارا گشتییا جڤاتا بلندا کاروبارێن خانمێن کوردستانێ، د هه‌ڤپه‌یڤینه‌كێ دا دگه‌ل باس، ئاماژه‌یێ ب وان بزاڤێن جڤاتا خوه‌ دكه‌ت بۆ دووڤچوونا دۆسیەیا ئەو ژنێن کوردێن ئێزدى و کریستیانیێن ب دەست داعشێ کەڤتین، زێده‌بارى هنده‌ك پرس و باسێن دى، ئه‌و ب توندی رەخنەیێ ل بێھەلوێستییا ناڤه‌ندێن ئەرەبی و ئیسلامى دگریت، ل ئاست ڤان تاوانان دا.

پەخشان زەنگنە ئەمیندارا گشتییا جڤاتا بلندا کاروبارێن خانمێن کوردستانێ، د هه‌ڤپه‌یڤینه‌كێ دا دگه‌ل باس، ئاماژه‌یێ ب وان بزاڤێن جڤاتا خوه‌ دكه‌ت بۆ دووڤچوونا دۆسیەیا ئەو ژنێن کوردێن ئێزدى و کریستیانیێن ب دەست داعشێ کەڤتین، زێده‌بارى هنده‌ك پرس و باسێن دى، ئه‌و ب توندی رەخنەیێ ل بێھەلوێستییا ناڤه‌ندێن ئەرەبی و ئیسلامى دگریت، ل ئاست ڤان تاوانان دا.
دیاره‌ هه‌ر ژ ده‌ستپێكا چەکدارێن داعشێ کۆنترۆلا چەند ناوچەیەکێن کوردستانی یێن روونشتڤانێن کوردێن ئێزیدی و کریستیانان کرى، سڤكاتییه‌كا زێده‌ ژ ده‌ستدرێژییا سێكسى هه‌تا ئه‌شكه‌نجه‌یێن له‌شى و بازرگانیكرن ب ژنێن وان كرینه‌ و هنده‌ك ژى كوشتینه‌. سه‌باره‌ت ب ڤێ ئێكێ كا جڤانا وان چو پێنگاڤ هاڤێژتینه‌، پەخشان زەنگنە دبێژیت: ”ئەو تاوانێن کو ل همبه‌رى کوردێن ئێزدی و خووشک و برایێن مەسیحی و پێکھاتەیێن دى یێن کوردستانێ هاتینه‌کرن، بەرانبەرى ھەموو خەلکێ کوردستانێ هاتینه‌كرن، ب ھەموو پیڤه‌ران تاوانێن شه‌ڕینه‌، تاوانێن دژى مرۆڤایەتیێنه‌، له‌و دڤێت ئه‌م ھەموو کارێن جددی لسەر ڤێ کارەساتێ بکەین. ژ ده‌ستپێكا سه‌رهلدانا نه‌خوه‌شییان و ب تایبەتی پشتى روودانێن موسل و کارەساتا شنگالێ و دەشتا نەینەوا، جڤاتا بلندا کاروبارێن خانمان، کەڤتە د ئەولەویاتا کاری دا و بارگرانى ئێخستە سەر کارکرن د ڤى بوارى دا. ئه‌و كاره‌ ژى ئه‌ڤه‌ بووینه‌؛ کارکرن بۆ بدەست ڤه‌ئینانا ھاریکاریێن سیاسی و ئێمناهی و سەربازی ب رێیا وان په‌یوه‌ندیێن به‌رفره‌هێن مه‌ دگه‌ل ناڤه‌ندێن نێڤده‌وله‌تى هه‌ین. کارکرن بۆ د هه‌وارچوونا بله‌ز و دوور ژ رۆتینا ئاوارەیان ژ بال جڤاكێ نێڤده‌وله‌تى ڤه‌، بۆ ڤێ ئێكێ د دووڤچوونێن خوه‌ دا تێگەهشتین کو ل عەنکاوە و دھۆکێ زەڤیێن به‌رهه‌ڤ هه‌نه‌ بۆ ئاكنجیكرنا ئاوارەیان، ھەروەسا مه‌ داخوازا ھاریکاریێن دراڤى بۆ ئاوارەیان کرییە، لێ مخابن ئه‌ڤ كاره‌ گه‌له‌گ گیرۆبوو، بێگومان هندى زێده‌تر گیرۆبیت، دێ کارەساتێن مرۆڤیێن خرابتر لێ په‌یدابن، ئه‌ڤه‌ ژى ژبه‌ر بارودۆخێ خرابێ ژیانا وان د ناڤ دبستان و ھەیکەلێن ئاڤاهى و لژێر پر و وان جهێن كو مه‌رجێن ساخله‌میێ تێدا نین”.
هه‌ر سه‌باره‌ت بزاڤێن وان، ناڤهاتیێ گۆت: ”دگه‌ل ئالیێن په‌یوه‌ندیدارێن ھەرێما کوردستانێ، لسەر ئاستێ ناڤەندێن نێڤدەولەتی كاردكه‌ین بۆ دیارکرنا چارەنڤیسێ كه‌سێن به‌رزه‌بووین و قورتالكرنا وان كه‌سێن د ده‌ستێن تیرۆرستان دانه‌. دیسان کاردكه‌ین دگەل ئالیێن نێڤدەولەتى، بۆ دەرکرنا بڕیاره‌كا نێڤدەولەتی سەبارەت ب وان تاوانێن کو ژبال تیرۆرستان ڤه‌ هاتینه‌كرن و دێ رژدبین هه‌تا بڕیاره‌كا تایبەت سەبارەت ب مامەلەیا هۆڤانه‌یا دگەل ژن و زاڕۆیان دا دەربچیت، وەکو چاوا بۆ رواندا و وه‌لاتێن دى دەرچوون. هه‌روه‌سا بێگومان کارێ جڤاتا مه‌ د دووڤچوونا کێشەیێن ئاوارەیان و ھەموو وان ژنێن چارەنڤیسێ وان نه‌دیارە، بەردەوامە”.
سه‌باره‌ت ب رۆلێ رێکخراوێن بوارێ ژنان ل کوردستانێ به‌رانبه‌رى ڤێ كاره‌ساتا ب سه‌ر ژنێن كوردێن ئێزدى و مه‌سیحى دا هاتى، په‌خشان خانێ گۆت: ”ئه‌ڤ رێکخراوە دشێن رۆله‌كێ کاریگەر بگێڕن، مه‌ ئاگه‌هـ ژ ھنده‌ک رێکخراوان ھەیە کو ب نه‌رمى و گه‌له‌ك هوورى، شەڤ و رۆژان دئێخنه‌ سه‌رئێك و د ڤى بوارى دا کاردکەن، لێ مخابن رێكخراوێن مافێن ژنان یێن ئه‌ره‌بى و ئیسلامى رۆلێ وان گه‌له‌كێ لاوازه‌، د ده‌مه‌كى دا ئەڤ تاوانە ب ناڤێ ئاینێ پیرۆزێ ئیسلامێ دهێنه‌كرن، ئەرکێ ڤان ناڤەندان بوو بەرى ھەموویان ڤان تاوانان ب توندی شه‌رمزاربکەن و ئاینێ ئیسلامێ لێ بێبەری بکەن، ژ ئالییه‌كێ دیڤه‌ لدووڤ هه‌وارا ئازارێن خەلکى بهێن و به‌رهه‌ڤییا خوه‌ دیاربكه‌ن بۆ ھاریکارییا بزاڤێن مه‌ بۆ دیارکرنا چارەنڤیسێ به‌رزه‌بوویان و پاراستن و قورتالكرنا ئخسیران ب زاڕۆ و ژنان ڤه‌. لێ مخابن هه‌تا نوكه‌ مه‌ چو تشته‌ك ژ وان ھەست پێنەکرییە. دیسان دیارە ھەلویستی کۆمکارا ئەرەبى ژى ل ئاستێ پێدڤى نینە.”
دبیت ئالیێ هه‌ره‌ مه‌زنێ ڤێ كێشه‌یێ، پشتى ئازادبوونا ڤان ژنان ژ ده‌شتێ داعش بیت، بۆ نموونە ئەو خانمێن دەستدرێژى لسه‌ر هاتینه‌كرن، چاوا ڤه‌گه‌رنه‌ ناڤ جڤاكى ڤه. سه‌باره‌ت ب ڤێ ئێكێ ژى، ئەمیندارا گشتییا جڤاتا بلندا کاروبارێن خانمێن کوردستانێ دبێژیت: ”ئەو ژنه‌ قوربانیێن شه‌ڕینه‌، ئەو دەستدریژیێن لسه‌ر وان هاتینه‌كرن، تاوانه‌کا دەستدریژییا بارودۆخێ ئاسایی نینە کو ژبال بێره‌وشته‌كى ڤه‌ هاتبیته‌كرن، ئەڤە بکارئینانا چەکه‌کێ كرێتێ شه‌ڕییه‌، ب ئارمانجی دیاریکرى و ب کۆم هاتییه‌ ئه‌نجامدان، تاوانێن دژى مرۆڤایەتیێنه‌، له‌و پێدڤییه‌، پێخه‌مه‌تى وێ ئێكێ ل چو جهه‌كێ جیھانێ روونەده‌تەڤە و بۆ بده‌ست ڤه‌ئینانا مافێ قوربانییان، بێى ئیحراجبوون باس لێ بکەین، ئەڤ خانمە کچێن مه‌نه‌، قوربانینه‌، پێدڤییە ب رێزڤه‌ بهێنه‌ ناڤ بنەمال و خێزانێن خوه‌ و بەرنامەیێن چارەسەرییا دەروونی و له‌شى بۆ بهێنه‌دانان”.
سه‌باره‌ت ب وان فاكته‌رێن گرنگێن كو بۆ ب جینۆساید ناساندانا ڤان تاوانان هه‌ین، پەخشان زەنگنە دبێژت: ”پرسێن ئەشکەنجەدان و بكارئینانا ژنان وه‌كو كه‌نیزه‌ك و زۆرداریكرن ل زاڕۆیان و دەستدریژیێن سێکسی، د بڕیار و قانوونێن دادگه‌ها نێڤدەولەتى دا، ب فاکتەرێن گرنگ دهێنه‌ ھەژمارتن د ب جینۆساید ناساندنا تاوانان و مافێن تاوانلێکرییان دا”.

بابه‌تێن ب ڤێ مژارێ ڤه‌ گرێدای