پێشمەرگاتی د ناڤبەرا درووشم و راستیێدا

رێڤینگ هرۆرى  :

ب دیتنا من؛ پێشمەرگە كەسه‌كێ هەرە مافبەرز و مەغدۆرە د ناڤا جڤاكێ مە دە، من باش بیر تێن، ل رۆژێن سەختێن شۆرشا گولانێ، ئەو كەسێن پێشمەرگاتی دكر، 90% دشێم بێژم كوڕێن هەژار و گوندییان بوون، زۆربە ژی نەخاندەڤان یان خاندەڤانێن بێ باوەرنامە بوون، د سەر هندێرا، پێشمەرگە ب پەروەردەكە وەلاتپارێزی نەوەیێ خوە رەوشەنبیر دكر، زۆرجاران سەركرده‌یان دگۆتە پێشمەرگه‌یان باوەرنامه‌یا هه‌وە تڤەنگ و خەباتا هه‌وەیە، لێ مخابن ژبەر كو مە یاسا و سیستەمەك لەشكری نینە كو هەلسەنگاندن لسەر بێتەكرن، نوكە ژی ئەز گەلەك ژ وان هەڤالێن خوە یێن پێشمەرگه‌یێن سالێن هەشتیان دبینم، هەر پێشمەرگەنە، یانێ بێ پلە ل بەرەیێن شەڕی یان زێرەڤانێن بەردەرێن هندەك سەیدا نە، یێن نەبهایێ پێشمەرگاتیێ دزانن، نە ژی رۆژەكێ پارییەكێ نانێ بترسی خاری، وەك كارگۆزار ل پێشمەرگه‌یان تەماشە دكەن، گەلۆ ئەڤە د چی سیستەمەك لەشكریدا هەیە؟ 30-40 سال خەبات و پێشمەرگاتی، بێ پلە و چو حسابەك بۆ نەی، دسەر هندێرا، پێشمەرگە ب خوە مەغدۆر مان، زارۆكێن وان ژی دناڤ شۆرش و پەنابەریێدا مانە نەخانەدەڤا، ئێدی نەشیان بێن دامەزراندن، ئەو ژی نەچارمان هندی شیان بوونە پێشمەرگە، چونكە ب تەنێ كەسێ بێ باوەرنامە دشێن ببنە پێشمەرگە، یانی پێشمەرگاتی ژی بوویە سەخلەتەك ویراسی؟.
باوەردكەم، نوكە تەخەیا هەرە كێم درامەت ل ناڤا جڤاكێ كوردستانێ، پێشمەرگەیە.
ڤێ گاڤێ ئەم خودان حوكمەتەكا بنكە فراوان و وەزارەتەكا پێشمەرگەی نە، هێزێن نێڤدەوله‌تى ژى هاریكارییا مە دكەن، وەزیرێ پێشمەرگەی ژ پارتەكا ئۆپۆزسیۆنە و چوارسال بوون چەندین سۆز داینە كو پێشمەرگەی دناڤا سیستەمەكێ لەشكری و نیشتیمانیدا رێكبێخیت، سەرۆكێ هەرێمێ ژی ب خوە پێشمەرگە و فەرمانده‌یێ گشتییە، چەندی بریار و رێنما دەرخستینە كو پێشمەرگە ب ڤی حالى نەمینن، لێ مخابن گوهۆرینەكا وەسا بسەر ژیان و رێكخستن و مافێن پێشمەرگه‌یاندا نەهاتییە.
• راستە هندەك یەكەیێن پێشمەرگه‌یان وەك لەشكرەكێ نیزامی هەنە، رێكوپێكی، دسپلین و چەكداركیری جهێ شانازیێنە، زۆر خالێن باش هەنە، لێ ئەمێ بەحسێ خالێن لاوازیێ كەین.
• دسەر هندێرە چەك یێ تێت، لێ زۆر پێشمەرگە هەنە، هێشتا ب چەكێ خوە دچن شەڕى.
• جاران دێ بینی پێشمەرگە ل هیڤییا تەكسیانە و نڤینێن وان ب ناڤملانڤە یان د پشتا پیكەماندا یان ترومبێلێن خوە یێن تایبەت دچن بەرەیێن شەری، یانی وەسائیلێن گوهارتنێ نینن، ئەڤەژی ژ گرانییا پێشمەرگه‌یان كێم دكەت.
• راگەهاندنا وەزارەتا پێشمەرگەی، ل بەرەیێن شەڕی یان ل جهەكێ دیتر دیار نینه‌، هەر كەنالەك ب كەیفا خوە، جه و چالاكیێن پێشمەرگه‌یان بێى سانسۆر پەخش دكەت، ئەڤەژی تەهلیكەكا مەزنە لسەر ژیانا پێشمەرگه‌یان ل نوكە و پاشەرۆژێ، هندەك لایەن ژی بۆ خوە پرۆپاگەنده‌ و سیاسەتێ ب پیرۆزییێن پێشمەرگه‌یان دكەن.
• ب سەدان پێشمەرگه‌یێن گولانێ یان دێرین، كادر و وه‌لاتی دچنە بەرەیێن شەری، تاكو نوكە خوەبەخش تێنە ناڤكرن و چو رێكخستنەك یان نافنڤێسین و ئەرشیڤ بۆ نینن.
• خەلكێ كوردستانێ ب هەمی تەخ و چینڤە، هاریكارییا پێشمەرگه‌یان كر، لێ مخابن جهەك نەبوو ڤان هەمی هاریكارییان تێدا كۆم بكەن و ب شێوەكێ رێكخستی بەلاڤ بكەن.
• رێكخراوێن جڤاكێ سڤێل و بەلكی دەزگایێن میری و دەزگایێ خێرخوازیێ بارزانی و رووانگە و گەلەك جهێن دی، گرانییا هاریكاریێن خوە خستییە سەر پەنابەران ب خوە، ئەوژی ئەركەكێ پیرۆزە، لێ ئەو زێدەتر وەزیفێ رێكخراو و جڤاكێ نێڤدەوله‌تی و حوكمەتا ئیراقێیە، بلا گرانییا هاریكاریێن مە بۆ پێشمەرگه‌ و مالباتێن وان بن.
• پێشمەرگە هەنە ب سالان خزمەتا هەی، لێ هێشتا بێ پلەیە، هندەك ژی هەنە ب رۆژان پلێن لەشكریێن هەرە بلند وەردگرن، گەلۆ لسەر چی پیڤەر ئەڤە دبیت.
• پێشمەرگە ئەركێ خوەیێ نیشتیمانى بەرانبەر خەلك و شەهید و خاكا وەلاتی 100% ئەدادكەت. ئەز وەك پێشمەرگەیەك داخوازێ ژ جهێن پەیوەندیدار دكەم ل پێشمەرگه‌یان خودان دەركەڤن، ئەڤ بەرپرسییەكە نیشتیمانی و دیرۆكییە كو پێشمەرگە نەبیت بەرژەوەندیێن بەرژەوەندپەرێسان نامینن.
• نوكە جیاوازییەك دناڤ مووچەیێن شەهیدێن پێشمەرگەیێن سەردەمێ شۆرشێ و نوكەدا هەیە، مرۆڤ هیڤیخوازە پەرلەمان لسەر راوەستیت.
• ل كوردستانێ، ب دەهان ناڤ و رەنگێن پێشمەرگه‌یان هەنە، ئەڤە خەلەتییەكا دیرۆكییە، كاودانێن بەری نوكە دجیاواز بوون، دبێژن؛ كوردستان یا بەرەو دەولەتبوونێ دچیت، گەلۆ ما سیستەمێ دەولەتبوونێ هوسایە؟ ئەگەر دەزگایەكێ هەرە كاریگەر و سەمبۆلا نیشتیمانی و پاراستنێ ب ڤی ئاوایی بیت .
• تاكو نوكە ب هەمی شیان، وەزارەتا پێشمەرگەی نەشیاینە پێشمەرگه‌یێ سەرب حزبانڤە رێكبێخیت، یا ژ هەمیێ خرابتر، نوكە یێ لەشكری تایبەت بۆ ئێزدیان، مەسیحیان، شەبەكان، كاكەیان، توركمەنان عەرەب و نوزا كێ دروست دكەن، ئەڤەژی هەمی ژێكجوداكرنا گەلێ كوردستانییە و ئەمێ دیسا باجا ڤێژی بدن.
• هندەك كەس هەنە حزبایەتییەكا كۆرە دكەن، دڤێت خوە شەریڤ بكەن لسەر حسابا پیرۆزیێن پێشمەرگە و شەهیدان، وەك پەرلەمانتار دلێر ماوەتی یێ سەرب لیستا (ی ن ك)ـڤە، ل پەرلەمانێ كوردستانێ وەك وەفادارییەك بۆ پارتیا خوە كو دێ گەندەلییەكا پارتی ئاشكرا كەت، ناڤێ شەهید حوزەیفی ئەرەدنی ب تەرۆرست دایە ناسین، ئەڤەژی ب چو ئاوایەكی لدەڤ مە پێشمەرگه‌یان جهێ قەبوولكرنێ نینە.

بابه‌تێن ب ڤێ مژارێ ڤه‌ گرێدای