پێشمه‌رگه‌ و شه‌ڕێ تیرۆرا جیهانى

 

مافپه‌روه‌ر/ ئه‌حمه‌د عارف ئامێدى :

چو گومان تێدا نینه‌ كو شه‌ڕێ تیرۆریستێن داعشێ لسه‌ر باژێرك و گوندێن هه‌رێما كوردستانێ، نه‌ بتنێ شه‌ڕه‌كه‌ دگه‌ل كوردان، به‌لكو شه‌ڕه‌كه‌ داكو ده‌ڤه‌رێن كوردان بۆ خوه‌ بكه‌نه‌ پێڕهه‌ك بۆ هێرشكرنێ لسه‌ر هند ده‌وله‌ت و ده‌ڤه‌رێن هه‌ڤده‌ر دگه‌ل كوردستانێ، له‌و نهۆ ئه‌م یێ دبینین هه‌رێما كوردستانێ بوویه‌ مه‌یدانه‌كا نێڤده‌وله‌تى بۆ شه‌ڕكرنا دژى گرۆپێ تیرۆریستێن داعشێ، چونكو وان تیرۆریستان نه‌ دین هه‌یه‌ و نه‌ مه‌زهه‌ب، ئانكو داعشییان ئارمانجه‌كا ئاشكرا هه‌یه‌ و دڤێت ل ڤێ ده‌ڤه‌رێ بجهـ بكه‌ت، ئه‌وژى ژناڤبرنا مرۆڤایه‌تیێ و دیرۆكا كه‌ڤن و نوو یه‌، خوه‌ دێ بێژى ئه‌ڤ داعشییه‌ هنده‌ك كه‌سن ژ جیهانه‌كا دیتر هاتینه‌ بۆ دژمنكارییا هه‌موو نفشێن مرۆڤان.
ئه‌ڤرۆ چاڤێن هه‌موو مرۆڤایه‌تیێ ل كورد و هه‌رێما كوردستانێنه‌ پێخه‌مه‌ت ژناڤبرنا ڤێ ئێشا كوژه‌كا جیهانى، ب تایبه‌تى ژى چاڤێ مرۆڤدۆستان ل هێزێن قاره‌مانێن پێشمه‌رگه‌ینه‌ بۆ ژناڤبرنا داعشێ، چونكو لدۆر هه‌موو پێشهاتان، نهۆ پێشمه‌رگه‌ ژ پێش هه‌موو وه‌لات و مله‌تێن جیهانێڤه‌ شه‌ڕێ ڤان هۆڤ و مرۆڤخوه‌ران دكه‌ت كو مه‌ره‌ما سه‌ره‌كى ژى؛ پاراستنا ئه‌ردێ كوردستانێ، جڤاكێ كوردستانى و به‌رژه‌وه‌ندیێن هه‌موو وه‌لاتێن جیهانێیه‌، داكو پاشى ئاشتى و ئازادى ل ده‌ڤه‌رێ به‌رقراببیت. د دیرۆكا بۆریدا، روودانا ژ هه‌مووان دژوارتر و نه‌باشتر یاكو ده‌ڤه‌رێ بخوه‌ڤه‌ دیتى، ئه‌وبوویه‌؛ وه‌ختێ (ده‌وله‌تا ئیسلامى ل ئیراقێ و شامێ) جهێ پێن خوه‌ لسه‌ر ئه‌ردێ ئیراقێ موكۆم كری ب تایبه‌تى ژى ل وان باژێر و گوندێن سوننه‌مه‌زهه‌ب خوه‌جهێن وان ل ناڤه‌راست و رۆژئاڤایێ ئیراقێ كو به‌رى نهۆ هند خوه‌نیشاندان و سه‌رهه‌لدان دژى حوكمه‌تا ئیراقێ یا بۆرى كربوون.
ل ده‌ستپێكا هه‌یڤا شه‌ش یا ئه‌ڤ ساله‌، وه‌ختێ باژێرێ مووسل كه‌ڤتییه‌ ده‌ستێن تیرۆریستێن داعشێ، و ئه‌و هێزێن پۆلیس و له‌شكرێ ئیراقێ كو بۆ پاراستنا وى باژێڕى هاتبوونه‌ ئاماده‌كرن جهێن خوه‌ هێلاین و ب ئێكجارى هه‌لوه‌شیاین كو تاكو نهۆ ئه‌گه‌رێن وێ شكه‌ستنێ نه‌دیارن، تاكو نهۆ ئه‌و شكه‌ستن بۆ وه‌لاتیێن ئیراقى بوویه‌ جهێ پرس و لسه‌رڕاوه‌ستیانێ، چونكو هه‌موو هێزێن ئه‌وله‌هه‌ییا ئیراقێ بێى ته‌قاندنا ئێك فیشه‌كا تڤه‌نگێ ژى، هه‌موو شارێ مووسل داده‌ست تیرۆریستێن داعشێ! ب تایبه‌تى ژى، راده‌ستكرنا چه‌كێ گران كو ئه‌ڤه‌ ماوه‌یێ چوار هه‌یڤانه‌ داعش ب وى چه‌كێ گران هێرشان دكه‌ته‌ سه‌ر هه‌رێما كوردستانێ و ده‌ردۆرێن به‌غدا و هند ده‌ڤه‌رێن كوردان ل سووریێ، هه‌ر ژبه‌ر راده‌ستكرنا وى چه‌كێ گران، باگرانى و هێرشێن توند لسه‌ر وه‌لاتیێن هه‌رێما كوردستانێ هاتنه‌كرن ب تایبه‌تى ل ده‌ڤه‌رێن شنگال و زومار، زێده‌بارى هند ده‌ڤه‌رێن دیتر. له‌و مه‌ دیت وه‌ختێ داعش بوویه‌ گه‌ف لسه‌ر هه‌رێما كوردستانێ و هه‌موو پێكهاتێن وێ یێن جڤاكى، جڤاكێ نێڤده‌وله‌تى هه‌ڤپه‌یمانییه‌ك پێكئینا و دژى تیرۆریستێن داعش هه‌وێن توندێن ئاسمانى كرنه‌ سه‌ر كو دئه‌نجامدا هێزێن تاریێ شكه‌ستن و رۆژانه‌ پێشمه‌رگه‌ یێ به‌ره‌ڤ وان ده‌ڤه‌ران دچیت، ئه‌وێن به‌رى نهۆ دژمنێن مرۆڤایه‌تیێ داگیڕكرین، هه‌رچه‌نده‌ داعشییان ب پیساتییا خوه‌ ته‌ڕوهشك ل وان ده‌ڤه‌ران سۆتینه‌، لێ هێدى هێدى پێشمه‌رگه‌ یێ وان ده‌ڤه‌ران ژ هه‌ر چه‌ك و ته‌قه‌مه‌نییه‌كێ پاقژ دكه‌ت و وه‌لاتى ژى جاره‌كا دیتر ڤه‌دگه‌رنه‌ڤه‌ سه‌ر جهـ و وارێن خوه‌ یێن ره‌سه‌ن.
پشتى ل هه‌یڤێن بۆرى، هێزێن پێشمه‌رگه‌یێ كوردستانێ جوانترین وێنه‌یێن خوه‌گۆریكرن و به‌رخوه‌دانێ نیشانى هه‌موو حوكمه‌ت و مله‌تێن جیهانى داین، جڤاكێ كوردستانى خوه‌ ب به‌خته‌وه‌رترین ملله‌تێ دونیایێ دبینیت، ئه‌و خوه‌راگرییا پێشمه‌رگه‌ى ژى ل همبه‌رى هێزێن تاریێ، نامه‌ و ئاماژه‌یێن گرنگن كو ملله‌تێ كوردى هه‌ژی هندێیه‌ باوه‌ری و ره‌زامه‌ندییا جیهانى بده‌ستخوه‌ڤه‌ بینیت بۆ دانپێدانكرنێ ب وه‌لاته‌كێ سه‌ربخوه‌ یێ كوردى، ب ڤێ یه‌كێ ژى، دێ بارگرانی و غه‌درا دیرۆكییا هند وه‌لاتێن دونیایێ ل چاخێ بۆرى بسه‌رێ كوردان ئینایى سڤك بیت.
ل دوماهیێ ژى ئه‌م ژ حه‌یده‌ر عه‌بادى و حوكمه‌تا وى دخوازین كو وان هێلێن خه‌له‌تێن حوكمه‌تا نوورى مالكى دژى كورد و هێزێن پێشمه‌رگه‌ى كێشاین، ژناڤببه‌ت و هه‌موو پێدڤییاتیێن پێشمه‌رگه‌ى دابین بكه‌ن. چونكو بهێزكه‌ڤتنا پێشمه‌رگه‌ى و هه‌رێما كوردستانێ، بهێزكه‌ڤتنا هه‌موو ده‌ڤه‌رێن دیترێن ئیراقێیه‌.

بابه‌تێن ب ڤێ مژارێ ڤه‌ گرێدای