پێدڤی یە به‌ربژار چ بکەت؟

عیماد ئالیخان

بریاره‌ ل 30/9 هه‌لبژارتنێن په‌رله‌مانێ كوردستانێ بهێنه‌ ئه‌نجامدان و كۆمسیونا بلندا سه‌ربه‌خۆیا هه‌لبژارتنان ناڤێن سه‌رۆكێن لیستا و به‌ربژێرێن هه‌موو حزبان به‌لاڤكرینه‌ یێن كو ژڤانه‌ ببنه‌ ئه‌ندام په‌رله‌مان یێن ڤێ گه‌را نوو یا په‌رله‌مانی، له‌وا ململانا سیاسی یا به‌ربژاران د سۆشیال میدیایێ دا ده‌نگڤه‌دایه‌ و هه‌ر كه‌سه‌ك ل دووڤ دیتن و حه‌زا خوه‌ بانگه‌شا وێ حزبێ و (وی- وێ) كه‌سی دكه‌ت یێ باوه‌ری پێ هه‌ی كو دێ د په‌رله‌مانی دا به‌ره‌ڤانی ژ مافێ ھاولاتیان و هه‌ڤركیا گه‌نده‌لیێ كه‌ت یاكو نوكه‌ وه‌لات تێدا دبۆریت. ئه‌رێ چ ل سه‌ر به‌ربژاری پێدڤی یه‌ داكو رێژه‌یه‌كا مه‌زن یا ده‌نگان ب ده‌ستخوه‌ڤه‌ بینیت د ڤان رۆژێن به‌ری كو هه‌لبژارتن بهێنه‌ ئه‌نجامدان؟ ئه‌رێ ده‌مێ به‌ربژاره‌ك به‌ربژاره‌كێ دی یان سه‌رۆكێ لسیته‌كێ دشكێنیت ب مه‌به‌ستا ب ده‌ستڤه‌ئینانا ده‌نگان دێ رێژه‌یا ده‌نگده‌رێن خوه‌ زێده‌كه‌ت یان به‌رۆڤاژی دێ كێم کەت؟ بێگۆمان د هه‌لبژارتنان دا هه‌ڤركی و ململانا سیاسی دناڤبه‌را سه‌رۆكێن لیستا و به‌ربژارا روو دده‌ن پێخه‌مه‌ت ب ده‌ستڤه‌ئینانا رێژه‌یه‌كا مه‌زن یا ده‌نگده‌ران، لێ دڤێت به‌ربژارێن خوه‌ دووری په‌یڤێن زڤر و كرێت بكه‌ت و پوست و گۆتنێن نه‌جوان به‌رامبه‌ر به‌ربژاره‌كێ دی یان حزبه‌كا دی یان بەربژارێ ھەمان حزبا خوە بكارنه‌ئینیت، پێخه‌مه‌ت ب ده‌ستڤه‌ئینانا هنده‌ك ده‌نگان، وه‌كو چاوا مه‌ د هه‌وا هه‌لبژارتنێن په‌رله‌مانێ عیراقێ دا دیتی ده‌مێ به‌ربژاره‌كی هنده‌ك به‌لگه‌یێن چ راستی بوو نه‌یی به‌رچاڤكرین یێن گه‌نده‌لیێ ل سه‌ر په‌روه‌ردا دهۆكێ، مەبەست و مه‌ره‌ما وی ژ وێ ره‌فتارێ ئه‌و بوو داكو رێژه‌یه‌كا زێده‌تر یا ده‌نگده‌ران بۆ لایێ خوه‌ ببه‌ت، له‌وا د وی ده‌می دا ئه‌و پێنگاڤه‌ هاڤێت، ئه‌گه‌ر گۆتنێن وی راست بوون بوچی به‌ری سێ سالان ئەو بەلگە ئاشكه‌را نه‌دكرن؟! له‌وا دڤێت خه‌لكێ مه‌ یێ هشیاری ڤان جوره‌ لڤین و ره‌فتارێن هه‌ر به‌ربژێراكێ بیت كو ب ڤان جوره‌ رێكان خه‌لك سه‌ردابچیت و ده‌نگێ خوه‌ بده‌ته‌ كه‌سه‌كێ نه‌ هه‌ژی وی جهی و بتنێ بۆ مه‌ره‌مێن خوه‌ یێن كه‌سوكی و ب ده‌ستڤه‌ئینانا پاره‌كی خوه‌ به‌ربژاركربیت. گه‌رێن په‌رله‌مانی دهێنه‌ گۆهورین و ژیانا هاولاتیان رۆژ ب رۆژ ئالۆزتر و سه‌ختتر لێدهێت، سه‌ره‌رای هندێ كو ئه‌و ئه‌ندام په‌رله‌مانه‌ ب ده‌نگێن وان هاولاتیان چووینه‌ د ناڤا هولا په‌رله‌مانی دا، لێ ژ لایێ په‌رله‌مانتاران ڤه‌ وه‌كو پێدڤی و د ئاست ل دووڤ گله‌یی و كێماسیێن هاولاتیان نه‌هاتینه‌ و چاره‌سه‌رنەكرینە. هه‌روه‌سان پێدڤی یه‌ سه‌رۆكێن لیستا و به‌ربژارێن وان ل ژێده‌رێن كو دبنه‌ هاریكاری بۆ سرۆشتێ جهێ وی یێ سیاسی بگه‌رین ژبوو ب ده‌ستڤه‌ئینانا كورسیكا په‌رله‌مانی، هه‌روه‌سا دیڤچوونا وان خالێن لاواز بكه‌ن یێن كو د گه‌رێن چووی یێن په‌رله‌مانی دا نه‌هاتینه‌ چاره‌سه‌ركرن و ل دیتن و چاره‌یا وان بگه‌رین كو بووینه‌ جهێ نیگه‌رانی و بێزاربوونا زۆربه‌یا هاولاتیان ژ هه‌لبژارتنان، هه‌روه‌سا گوهداریا خالێن هێز و لاوازێن خه‌لكی بكه‌ن و نه‌ هه‌مان گۆتن و دروشمێن به‌ربژێرێن خولێن چویی یێن په‌رله‌مانی بكاربینن، كو بووینه‌ جهێ نه‌باوه‌ریا زۆربه‌یا خه‌لكی و ل سه‌ر خه‌لكی ژی پێدڤی یه‌ د ڤێ گه‌رێ دا كه‌سێن هه‌ژی ل جهێن هه‌ژی بدانن كو خزمه‌تا گه‌ل و وه‌لاتی بكه‌ن، نه‌ك خزمه‌تا كه‌سوكی و عه‌شائیری و ب ده‌ستڤه‌ئینانا پاران.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.