پۆلیسێن ئیرانێ: سووچبارێ كوشتنا فه‌رینازێ دانپێدان ب تاوانا خوه‌ كر

پۆلیسێن ئیرانێ: سووچبارێ كوشتنا فه‌رینازێ دانپێدان ب تاوانا خوه‌ كر

وار – دهۆک :

پۆلیسێن ئیرانێ راگه‌هاند؛ ئه‌و كه‌سێ تۆمه‌تبار ب ده‌ستدرێژیكرنا سه‌ر كچه‌ كوردا مهاباد و بویه‌ ئه‌گه‌رێ مرنا وێ، دانپێدان ب تاوانا خوه‌كر.
سه‌عید مونته‌زر مه‌هدی جێگرێ پۆلیسێن ئیرانێ ئاشكراكر؛ تۆمه‌تبارێ سه‌ره‌كیێ بویه‌ ئه‌گه‌رێ مرنا كچه‌ كوردا مهابادێ (فه‌ریناز خوسره‌وانی)، دانپێدان ب تاوانا خوه‌ كرییه‌ و راگه‌هاندییه‌ كو وی بزاڤێن ده‌ستدرێژیكرنا سه‌ر وێ كچێ كرینه‌ و وێ ژی خوه‌ د هۆتێلێ دا هاڤێتییه‌ و ژیانا خوه‌ ژ ده‌ست دایه‌.
رۆژا سێ شه‌مبییا بۆری، كچه‌ كوردا مهابادێ (فه‌ریناز خوسره‌وانی) یا 26سالی وه‌كو كارگوزار ل هۆتێلا (تارا) ل مهابادێ كاردكر و ژ ترسا ده‌ستدرێژیكرنا سكسی خوه‌ د قاتێ چارێ یێ هۆتێلێ دا هاڤێت و ژیانا خوه‌ ژ ده‌ست دا، هند ژ ژێده‌ران ژی دبێژن، كاربه‌ده‌سته‌كێ ئیرانی د گه‌ل خودانێ هۆتێلێ، بزاڤێن ده‌ستدرێژیكرنا سه‌ر وێ كچێ كرینه‌.
پاشان رۆژه‌كێ پشتی روودانێ، خه‌لكێ باژارێ مهابادێ رژیانه‌ سه‌ر جادده‌یان و ئاڤاهیێ هۆتێلێ سۆت و پاسدارێن ئیرانێ ژی، هێرشی خوه‌نیشانده‌ران كر و 18 كه‌س برینداركرن.
هه‌ڤده‌م ل پترییا باژاركێن باشوور و باكۆرێ كوردستانێ، وه‌لاتیی رژیانه‌ سه‌ر جادده‌یان و خرڤه‌بوونێن پشته‌ڤانیێ ل خوه‌نیشانده‌رێن مهابادێ كرن و ره‌ڤه‌ندا كوردی ژی ل پترییا وه‌لاتێن ئۆرۆپی ده‌ست ب خرڤه‌بوونێن پشته‌ڤانیا كوردێن مهابادێ و ئیدانه‌كرنا ده‌ستدرێژییا سه‌ر كچا كورد (فه‌رینازێ) كرن.

بابه‌تێن ب ڤێ مژارێ ڤه‌ گرێدای