په‌یوه‌ندیێن به‌غدایێ و هه‌ولێرێ پشتى مالكى!

 

مافپه‌روه‌ر/ ئه‌حمه‌د عارف ئامێدى :

چو گومان تێدا نینه‌ كو په‌یوه‌ندیێن حوكمه‌تا ناڤه‌ندییا به‌غدا و هه‌رێما كوردستانێ، لسه‌رده‌مێ سه‌رۆك وه‌زیرێ به‌رى نهۆ نوورى مالكى، قه‌یرانێن مه‌زن بخوه‌ڤه‌ دیتبوون كو كارتێكرن كربوو سه‌ر هه‌موو گه‌هێن وه‌لات، ئه‌گه‌ر ژى ئه‌وبوویه‌ كو هنده‌ك نه‌زانان ل ماوه‌یێ بۆرى بڕیار ل به‌غدایێ ده‌ردكرن و سیاسه‌ت برێڤه‌دبر! هه‌ر ئه‌و بڕیار و سیاسه‌تێن خه‌له‌تبوون ئیراق گه‌هاندییه‌ كه‌نارێن ئاگرین و ژبلى خودێ مه‌زن، چو كه‌سه‌كى ئایینه‌ده‌یێ ڤى وه‌لاتى نه‌دزانى، له‌و ئه‌م دبێژین كو جهێ داخێبوو حوكمه‌تا مالكى چو بزاڤ نه‌كربوون، داكو پرێن په‌یوه‌ندى و لێكتێگه‌هشتنان د ناڤبه‌را هه‌موو پێكهاتێن ئیراقێدا ئاڤا بكه‌ت، نه‌خاسمه‌ دگه‌ل ملله‌تێ كورد، چنكو ئه‌و خودان هه‌رێمه‌كه‌ د ئیراقا فیدرالیدا. نهۆ ژى، پشتى مالكى ژ سه‌رۆكاتییا ده‌ستهه‌لاتا بجهكار ل ئیراقێ هاتییه‌ دوورخستن، ئه‌و و لیستا ده‌وله‌تا قانوونێ، بزاڤێن به‌رده‌وام دكه‌ن پێخه‌مه‌ت پتر ئالۆزكرنا په‌یوه‌ندیێن د ناڤبه‌را هه‌ولێر و به‌غدایێدا، لێ بلا ئه‌و بزانن كو نهۆ هه‌موو خودان ئه‌قلێن بژاره‌ ده‌ستهه‌لاتداریێ ل ئیراقێ دكه‌ن و كارى لسه‌ر بدوماهیئینانا ناكۆكییان دكه‌ن.
حوكمه‌تێن پشتى رۆخاندنا رژێما به‌عس ژى، ئاراسته‌ و سه‌ره‌ده‌رییا وان دگه‌ل كوردان، هه‌مان ئاراسته‌ و سه‌ره‌ده‌ریبوو، یاكو ژ سالا 1921ێ و تاكو 2003ێ دگه‌ل كوردان كار پێ دهاته‌كرن!، چنكو هه‌موو وان حوكمه‌تان كار ب دینى و نه‌ته‌وه‌په‌رستیێ دژى كوردان كرییه‌، له‌و ئیراق نهۆ گه‌هاندییه‌ ڤێ قۆناغا بترس و تارى، لێ ئه‌و حوكمه‌ت سه‌ركه‌ڤتبوون د سه‌ردابرنا عه‌قلێ هنده‌ك وه‌لاتیێن ئاساییدا و ب وان مه‌ره‌مێن خوه‌ د ماوه‌یێ بۆریدا بجهدكرن نه‌خاسمه‌ دزینا دراڤێ گشتى.
جهێ داخێبوو كو ده‌ستهه‌لاتدارێن به‌غدایێ پشتى ئێخستنا په‌یكه‌رێ دكتاتۆریێ ل به‌غدایێ، نه‌شیان بۆ خوه‌ مفاى ژ ئه‌زموونێن شكه‌تیێن بۆرى وه‌ربگرن، وان به‌رده‌وام كار لسه‌ر بجهكرنا خه‌زێن خوه‌ یێن تایبه‌ت دكر و سه‌روژنوو بزاڤێن ئاڤاكرنا په‌یكه‌رێ دكتاتۆریێ دكرن. لێ سه‌ربۆڕان دیاركرییه‌ كو ئه‌وكه‌سێ شه‌نگستێن ئاڤاهی لاواز ئاڤا بكه‌ت، دێ هه‌ر رۆژه‌كێ ئه‌و ئاڤاهى بسه‌رسه‌رێ ویدا هه‌ڕفیت و دێ زیاندیتیێ ئێكێ هه‌ر ئه‌وبیت. لێ هه‌كه‌ هه‌ركه‌سه‌كێ بۆ خوه‌ ئاڤاهییه‌كى چێبكه‌ت و شه‌نگستێن وى موكۆم چێبكه‌ت، دێ ب ئارامى تێدا ژیت و چو زیان ناگه‌هنێ، ئه‌ها ئه‌ڤه‌یه‌ چیرۆكا ده‌ستهه‌لاتدارێن به‌غدایێ، هه‌ركه‌سه‌كێ كورسییا ده‌ستهه‌لاتێ گرته‌ده‌ست، دێ هه‌موو كارێن خوه‌ ب به‌ره‌لایى و بێى ڤه‌گۆلین ئه‌نجامده‌ت و ل دوماهیێ دێ هه‌موو ئه‌و كار بسه‌رێ ویدا هه‌ڕفن.
بۆ كوردان ل ئیراقێ، دیرۆك به‌رده‌وام دگه‌ل ڤان ده‌ستهه‌لاتدارێن خاروڤیچ دوباره‌دبیت، لێ ئه‌م دخوازین حوكمه‌تا حه‌یده‌ر عه‌بادى ب ده‌ستوور و دادپه‌روه‌رى كارى دگه‌ل هه‌رێما كوردستانێ بكه‌ت، ئه‌گه‌ر نه‌؛ دبیت جه‌نابێ وى دوماهى سه‌رۆك وه‌زیرێ ئێراقا ئێكگرتى بیت، چنكو تاكو رادده‌یه‌كێ مه‌زن، سیاسه‌تێن خه‌له‌تێن مالكى و هه‌وا دڕندانه‌یا تیرۆریستێن داعشێ، شه‌نگستێن ئێكبوونا ئه‌رد و ملله‌تێ ئیراقێ ژبه‌رئێك برینه‌ و سیاسه‌تمه‌داره‌كێ وێره‌ك دڤێت تاكو ڤێ ترسێ نه‌هێلیت.
ئه‌ڤرۆ، په‌یوه‌ندیێن د ناڤبه‌را هه‌رێما كوردستانێ و ئیراقا فیدرالیدا، بۆ هه‌موو چاڤدێر و ملله‌تێ ئیراقێ ئاشكرانه‌، ئانكو قه‌یرانێن مه‌زن د ناڤبه‌را واندا هه‌نه‌، دبیت ژى هنده‌ك سیاسه‌تمه‌دار لسه‌ر شاشێن تى ڤى یان وه‌ختێ باسێ ڤان په‌یوه‌ندییان دكه‌ن، ب شرینییا هنگڤینى باس دكه‌ن، لێ لپشت په‌رده‌یان، ئه‌و ب هه‌موو ئامیرێن وێرانكرنێ كارى لسه‌ر هه‌ڕافتنا په‌یوه‌ندیێن هه‌ردو لایه‌نان دكه‌ن، مه‌ره‌م ژى هه‌ر ئه‌وه‌، داكو پۆستێن وان گرتینه‌ده‌ست، بۆ وان بمینن و به‌رده‌وام سامان و پێدڤییاتیێن وه‌لاتیێن ئیراقێ بدزن و بخۆن.
ئه‌زموونا هه‌رێما كوردستانێ، ب حوكمه‌ت و ملله‌تڤه‌، بوویه‌ نموونه‌ لجه‌م وه‌لاتێن جیهانێ، باشترین به‌لگه‌ژى ئه‌وه‌ وه‌ختێ ڤێ دوماهیێ گه‌فا داعشێ هاتییه‌ سه‌ر هه‌رێما كوردستانێ، وه‌لاتێن جیهانا ئازاد هه‌موو ل هاوارا هه‌رێما كوردستانێ و ملله‌تێ كورد هاتن و به‌رگرى ژێكر، وان وه‌لاتان ب ئێكده‌نگى راگه‌هان كو زێده‌گاڤى لسه‌ر هه‌رێما كوردستانێ هێلا سوره‌ و نابیت چو كه‌سه‌ك ببه‌زینیت، كو ئه‌و ئاماژه‌یه‌ك نه‌ئێكسه‌ر بوویه‌ نه‌ك ب تنێ بۆ داعشێ، به‌لكو بۆ هه‌ر وه‌لاته‌ك و لایه‌نه‌كێ دڤێت زێده‌گاڤیێ بكه‌ته‌ سه‌ر هه‌رێما كوردستانێ.
ل دوماهیێ دێ بێژین: فه‌ره‌ ئه‌م وه‌لاتى و رۆژنامه‌ڤان و ره‌وشه‌نبیر و هه‌موو پێكهاتێن جڤاكى، ده‌ستێ مه‌ دگه‌ل یێ به‌رێز نێچیرڤان بارزانى بیت بۆ پتر خزمه‌تكرنا هه‌رێما كوردستانێ و ملله‌تێ كورد، داكو ئایینده‌یه‌كێ باش بۆ به‌ره‌بابێن بهێت دابین بكه‌ین.

بابه‌تێن ب ڤێ مژارێ ڤه‌ گرێدای