په‌كه‌كه‌ – سۆته‌مه‌نییا داگیركارییا توركیا

په‌كه‌كه‌ – سۆته‌مه‌نییا داگیركارییا توركیا

گۆتار – پێشوار عه‌گید

پارتییا كاركه‌رێن كوردستانێ، په‌كه‌كه‌ ژ دامه‌زراندنا خوه‌ ده‌ست دایه‌ چه‌كى و شه‌ڕى ل دژى داگیركارییا توركیا و بجهئینانا ئارمانجێن خوه‌ دكه‌ت، لێ كیژ داگیركارى و كیژ ئارمانجن په‌كه‌كه‌ شه‌ڕى ژبۆ دكه‌ت؟
بێ گۆمان ره‌وا نینه‌ گه‌ر باسێ په‌كه‌كێ بكه‌ین ب پیڤه‌رێن كه‌سه‌كێ بیانى هه‌لسه‌نگاندنێ بۆ ئاستێ خه‌باتا وێ بكه‌ین، مه‌ره‌ما من په‌كه‌كه‌ وه‌ك رێكخستنه‌كا تیرۆرستى د چاڤێن ده‌وله‌تا تورك و ئێكه‌تییا ئه‌ورۆپا و ئه‌مریكا دا، ژبه‌ر كو ئینكار ناهێت كرن، كو په‌كه‌كه‌ هێزه‌كا مه‌زن یا كوردستانێ یه‌ و خودان شه‌هید و خه‌باته‌كا مه‌زنه‌ و رۆژه‌ك ژ رۆژان خه‌بات ژبۆ ئارمانجه‌كا هه‌ڤپشك ل گه‌ل هێزێن دى یێن سیاسى یێن كوردستانێ كرییه‌، لێ پشتى ڤێ خه‌باتێ هه‌موویێ، ئه‌رێ په‌كه‌كه‌ ل سه‌ر وێ رێ و ئارمانجێ مایه‌ یا ژبۆ هاتییه‌ دامه‌زراندن؟
په‌كه‌كێ ژ دامه‌زراندنا خوه‌ كوردستانا مه‌زن كره‌ درۆشم و ئارمانج، لێ هه‌رزوو ژ وى درۆشمى لێڤه‌بوو و نها ب ئاشكرایى ل دژى كوردستانا ئێكپارچه‌ و ده‌وله‌تا نه‌ته‌وه‌یى یه‌ و بانگه‌شه‌یا دیموكراتیكرنا ده‌ستهه‌لاتێن ده‌ڤه‌رێ دكه‌ت و بگره‌ نها د كریار و بیردۆز دا، په‌كه‌كه‌ ل دژى هه‌ر ستاتۆیه‌كا نه‌ته‌وه‌یى یا كوردى و هه‌رێما كوردستانا ئیراقێ ژى یه‌، دیاره‌ ئه‌و كوردستانا ب پاشناڤێ وێ پارتیێ ڤه‌ یان ژبۆ بخوه‌ڤه‌گرێدان و بكارئینانا كوردان و سۆزییا وانه‌ یان ژى ب رێیا وى پاشناڤى كریارێن خوه‌ یێن تێكده‌رانه‌ ل سه‌ر مله‌تێ كورد دكه‌ته‌ مال و ناڤێ كوردستانێ پێ ده‌ربازى لیستێن جیهانى یێن تیرۆرێ دكه‌ت!
یا جهێ راوه‌ستان و گۆتنێ خه‌بات و مانا نها یا په‌كه‌كێ یه‌ ل سه‌ر ئاخا هه‌رێما كوردستانێ، یا كو ده‌ستهه‌لاته‌كا خومالى و 100% كوردى حوكمى لێ دكه‌ت، ئه‌رێ ڤه‌گوهاستنا مه‌یدانا شه‌ڕێ په‌كه‌كێ ژ باكۆر بۆ باشۆری و نێزیكبوونا وێ ژ باژارێن هه‌رێما كوردستانێ چ دگه‌هینیت، ب تایبه‌ت كو مانا وێ ببیته‌ ئه‌گه‌را كاڤلكرن و چۆلكرنا ده‌ڤه‌رێن كوردستانێ و پێشڤه‌هاتنا سوپایێ ده‌وله‌تا توركیا، ئه‌رێ خه‌بات و شۆر‌شا په‌كه‌كێ ل دژى كێ یه‌ گه‌ر ل گه‌ل كوشتنا هه‌ر سه‌ربازه‌كى 100 گه‌ریلا و خه‌لكێ سڤیل یێ هه‌رێما كوردستانێ ببنه‌ قۆربانى، باشه‌ ما د شۆر‌شان دا چ پیڤه‌ر بۆ هه‌ڤسه‌نگییا هێزێ نینن؟ ما چ سنۆرێن ره‌وشتى/وژدانى نینن مرۆڤى ل هه‌مبه‌ر قۆربانیدانا ئاخێ، گیانى و بهایان ژ ئارمانجێن ئایدۆلۆجییێن خوه‌ پاشگه‌ز بكه‌ت؟ یان ژى په‌كه‌كه‌ ب پلان رێ ژ بۆ داگیركارییا ده‌وله‌تا توركیا خوه‌ش دكه‌ت و ره‌وشا ئالۆز یا باشۆرێ كوردستانێ و لاوازییا حكومه‌تا فیدرال یا ئیراقێ، بۆ خوه‌ ب ده‌لیڤه‌ دبینیت؟
ب دیتنا ڤێ رێخوه‌شكرنێ و ڤان كریارێن په‌كه‌كێ، مرۆڤ دگه‌هیت وێ باوه‌ریێ هه‌بوونا په‌كه‌كێ ل سه‌ر ئاخا هه‌رێما كوردستانێ تنێ شه‌رعیه‌تدانه‌ ب ئه‌ردۆگانى و رژێما وى، كو ب هێرش و داگیركاریێن خوه‌ یێن ب به‌هانه‌یا په‌كه‌كێ، بگه‌هیته‌ خه‌ونا خوه‌ یا ڤه‌گه‌راندنا سنۆرێن ده‌وله‌تا عوسمانى. یا وێنه‌ى باشتر ئاشكرا دكه‌ت ته‌كتیكا شه‌ڕى یا په‌كه‌كێ یه‌ ل باشۆرێ كوردستانێ، كو شه‌ڕی ل ده‌ڤه‌رێن چۆل و ڤالا ناكه‌ت، به‌لكو شه‌ڕێ خوه‌ خستییه‌ ناڤ گوند و ناوچه‌یێن ئاڤا یێن هه‌رێمێ، ئه‌ڤه‌ مه‌ترسیه‌كا مه‌زنه‌ و نابیت گه‌لێ كوردستانێ ل هه‌مبه‌ر ڤان گاڤێن په‌كه‌كێ بێده‌نگ بیت و نابیت بهانه‌یان بده‌ته‌‌ پال ڤێ سته‌ما مه‌زن یا په‌كه‌كێ، ژبه‌ر كو په‌كه‌كه‌ بێده‌نگییا حكومه‌تا هه‌رێمێ و سۆزییا خه‌لكى ژبۆ خوه‌ بكار دئینیت و خوه‌ ته‌مام كرییه‌ ئامراز و سۆته‌مه‌نى ژبۆ به‌رفره‌هكرنا داگیركارییا ده‌وله‌تا توركیا ل سه‌ر ئاخا كوردستانێ.
دخوازم ب ئاشكرایى بێژم، ئارمانجا رێكخستنا داعش یا تیرۆرستى یا رۆن و ئاشكرا بوو و ب شه‌ڕ هات و نه‌شیا كوردستانێ داگیر بكه‌ت، لێ ب سایا په‌كه‌كێ ئاخ و حكومه‌ت و گه‌لێ كورد ل باشۆرێ كوردستانێ د مه‌ترسیێ دا نه‌ و ب ره‌نگێ نها بیت ئه‌وا داعش نه‌شیایى بكه‌ت، د چه‌ند سالێن بهێن دا دێ په‌كه‌كه‌ باشۆرێ كوردستانێ راده‌ستى ده‌وله‌تا ئیخوانى یا توركیا كه‌ت، هه‌ر چه‌نده‌ گه‌له‌كێ پشتراستم كو ب گۆتنا ڤێ راستیێ دێ دهۆلقۆتێن ب سۆزییا خه‌لكى ئاوازێن سه‌ركه‌فتنێ بۆ په‌كه‌كێ دژه‌نن، من كه‌نه‌ تیرۆرست و خیانه‌تكار.

بابه‌تێن ب ڤێ مژارێ ڤه‌ گرێدای