پشتى پێكئینانا هه‌ڤژینیێ، هایدارى ئه‌ڤان تشتان بن!

پشتى پێكئینانا هه‌ڤژینیێ، هایدارى ئه‌ڤان تشتان بن!

وار – دهۆک :

پێكئینانا هه‌ڤژینیێ، ده‌رگه‌هه‌كه‌ نوویه‌ لبه‌ر دو كه‌سان كو هه‌ر ئێك ژ ره‌گه‌زه‌كییه‌ و ئه‌و پرۆسه‌یه‌ ئێدى ژیانا وان پێكڤه‌ گرێدده‌ن و هه‌موو ژیانا وان پێكڤه‌ دچیته‌ سه‌رى. به‌رى پێكئینانا هه‌ڤژینیێ، كه‌سه‌كێ تاك، دبیت گه‌له‌ك به‌رپرسیارى و چاڤدێرى لسه‌ر نه‌بیت و گه‌له‌ك ئه‌رك و ماف نه‌بن، لێ ده‌ما كه‌سه‌ك هه‌ڤژینیێ پێكدئینیت، گه‌له‌ك ئه‌رك و به‌رپرسیارى دكه‌ڤنه‌ د ستوویێ وى دا و ژیانا وى وه‌كو به‌رى هه‌ڤژینیێ ئانكو زگوردیێ نینه‌، به‌لكو دڤێت گه‌له‌ك ره‌فتار و كریارێن خوه‌ یێن د ده‌مێ زگوردیێ دا بهێلیت و خوه‌ بۆ هنده‌ك ئه‌رك و به‌رپرسیارییان به‌رهه‌ڤ بكه‌ت، كو فه‌ره‌ ئه‌نجامبده‌ت. د ڤان خالێن خوارێ دا چه‌ند تشته‌ك هاتینه‌ باسكرن كو د ژیانا هه‌ڤژینیێ دا لسه‌ر هه‌ر كه‌سه‌كى ئه‌ركن و دڤێت لبه‌ر چاڤ وه‌ربگریت:
1ــ چۆنا د ناڤ ژیانا هه‌ڤژینیێ ب وێ مانایێ دهێت كو ئێدى پێدڤییه‌ هه‌ڤژین ب خوه‌ به‌رپرسن بن ژ ژیان و بڕیاردانێن خوه‌، هنده‌ك زه‌لام وه‌سا دبینن كو ده‌ما دچنه‌ د ناڤ ژیانا هه‌ڤژینیێ دا، ئه‌و ب تمامى ئازادى و سه‌ربخوه‌ییا خوه‌ ژده‌ست دده‌ن، لێ وه‌سا هزرناكه‌ن كو ژیانا هه‌ڤپشكا هه‌ڤژینیێ ده‌ستپێكا پێگه‌هشتنا مرۆڤییه‌.
2ــ گه‌له‌ك ژ وان كه‌سێن ژیانا هه‌ڤپشكا هه‌ڤژینیێ پێكدئینن، هزر ل وێ ئێكێ ناكه‌ن كو ژیانا هه‌ڤژینیێ ژیانه‌كا نوویه‌ و دبیت گه‌له‌ك كێشه‌ و نه‌خوه‌شى همبه‌رى وان بن.
3ــ هه‌ڤژین هنده‌ك جاران پشتى ده‌ربازبوونا ساله‌كێ ب سه‌ر په‌یوه‌ندییا وان یا هه‌ڤژینیێ دا، تووشى كێشه‌یێن سۆزداریێ دبنه‌ڤه‌، زێده‌بوونا گرفتێن دراڤى و جڤاكى دبنه‌ سه‌ده‌م كو هه‌ڤژین نه‌شێن وه‌كو ده‌ستپێكێ ڤیان و حه‌زژێكرنێ ب ئێكدو ببه‌خشن.
4ــ كچ و كوڕ پشتى پێكئینانا ژیانا هه‌ڤپشك، كۆمه‌كا به‌رپرسیارى و ئه‌ركان لسه‌ر ملێن وان كۆمدبن، هه‌كه‌ر ب زیره‌كى مامه‌له‌یێ دگه‌ل وى دۆخى بكه‌ن، ئه‌و ژیانا وان دێ ئارامبیت، لێ هه‌كه‌ر هوشیارنه‌بن، ئه‌و نه‌شێن درێژیێ ب ب وێ ژیانا هه‌ڤپشك بده‌ن.
5ــ ده‌ما دو مرۆڤ ژیانا هه‌ڤپشكا هه‌ڤژینیێ دروستدكەن، بێگومان هه‌ر دو ژ ژینگه‌هێن جودا ڤه‌ هاتینه‌، ئه‌گه‌رێ رێكنه‌كه‌ڤتنا وان گه‌له‌كه‌ لسه‌ر بابه‌تان، بۆ ڤێ ئێكێ ژى پێدڤییه‌ ب گوفتوگۆیێ كێشه‌یێن خوه‌ چاره‌بكه‌ن.
ژ ڤان خالێن ل سه‌رى دیاره‌ كو چۆنا د ناڤ ژیانا هه‌ڤپشك كاره‌كێ ب ساناهى نینه‌، ژبه‌ركو گه‌له‌ك ئه‌رك و به‌رپرسیارى لسه‌ر مرۆڤى ئه‌ركن و ئه‌و ژیانه‌ ژى ژ ژیانا زگوردیێ گه‌له‌ك جودایه‌، ژبه‌ركو د ژیانا زگوردیێ دا كه‌سه‌ك د گه‌ل ته‌ دا هه‌ڤپشك نینه‌ كو هه‌رده‌م هزر لێ بكه‌ى و د هه‌ر كار و كریاره‌كا خوه‌ دا لبه‌ر چاڤ وه‌ربگرى، لێ د ژیانا هه‌ڤپشك دا، بۆ هه‌ر كار و كریاره‌كا خوه‌، دڤێت هزر ل هه‌ڤپشكا/ێ خوه‌ ژى بكه‌ى و مافێ وێ/وى ژى بپارێزى، هه‌كه‌ر نه‌ دێ همبه‌رى كێشه‌ و نه‌خوه‌شییان بى.

بابه‌تێن ب ڤێ مژارێ ڤه‌ گرێدای