پاپا: دڤێت كێشه‌یێن كوردستانێ ب ئاشتیانه‌ چاره‌ببن

پاپا: دڤێت كێشه‌یێن كوردستانێ ب ئاشتیانه‌ چاره‌ببن

WAAR-دهۆك:

سه‌رۆكوه‌زیرێ هه‌رێما كوردستانێ ل ڤاتیكانێ ب فه‌رمی ژ ئالیێ قه‌داسه‌تا پاپا فره‌نسیسی ڤه‌ هات‌ پێشوازیكرن و پاپایێ ڤاتیكانێ داخوازكر، هه‌موو كێشه‌یێن كوردستانێ ب رێیا دیالۆگ و ئاشتیێ بهێنه‌ چاره‌ كرن.
ل گۆره‌یی مالپه‌رێ فه‌رمی یێ حكومه‌تا هه‌رێمێ، د كۆمبوونێ دا پاپا فره‌نسیس سوپاسییا گه‌ل و حكومه‌ت و هه‌رێما كوردستانێ كر بۆ مێهڤاندارییا ئاواره‌یان ب گشتی و ب تایبه‌تی یا كرستیانان كو ژ ئه‌نجاما شه‌رێ داعشێ و روودانێن دی ئاواره‌یی هه‌رێما كوردستانێ بووینه‌ و هیڤی خواست ئه‌و پێكڤه‌ژیانا ل هه‌رێما كوردستانێ هه‌یی، یا به‌رده‌وام بیت و هه‌موو كێشه‌یێن كوردستانێ ب رێیا دیالۆگ و ئاشتی و لهه‌ڤ گه‌هشتنێ بهێنه‌ چاره‌ كرن.
قه‌داسه‌تا پاپایی گۆت ژی، دێ دوعایان بۆ هه‌رێما كوردستانێ كه‌ت كو هه‌رده‌م د ئاشته‌وایی و پێكڤه‌ ژیانێ دا یا سه‌ركه‌فتی بیت.
نێچیرڤان بارزانی سه‌رۆكوه‌زیرێ هه‌رێمێ ژی خواست، پاپا رۆلێ خوه‌ د چاره‌كرنا كێشه‌یێن د ناڤبه‌را هه‌ولێر و به‌غدایێ دا بگێریت.
سه‌رۆكوه‌زیر بارزانی دا زانین ژی، حكومه‌تا هه‌رێمێ سه‌رباری ره‌وشا نها یا ب زه‌حمه‌ت، لێ هه‌ر ده‌رگه‌هێن خوه‌ بۆ پێشوازیكرنا ئاواره‌یان ڤه‌كری هێلاینه‌‌ و بزاڤێن رژد ژی كرینه‌ داكو كریستیان ڤه‌گه‌رنه‌ سه‌ر جهێن خوه‌ و وه‌لاتێ خوه‌ بجهـ نه‌هێلن.
پاشان هه‌ر ل ڤاتیكانێ نێچیرڤان بارزانی دگه‌ل پیێترۆ پارۆلین سه‌رۆكوه‌زیرێ ڤاتیكانێ كۆمبوو و به‌حس ل بزاڤێن هه‌رێمێ بۆ ده‌ستپێكرنا دانوستاندنان دگه‌ل حكومه‌تا ئیراقێ كر.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.