پارێزگەھا دھۆکێ ھەرێمەکا بێ خودان!

عیماد ئالیخان

د ڤان رۆژێن بوری دا بھایێ ئەمپێرێن کارەبا موەلیدان ل پارێزگەھا دھۆکێ ھاتە دیارکرن ژلایێ لیژنا موەلیدان ڤە ل پارێزگەھا دھۆکێ کۆ بو ھەر ئەمپێرەکێ کارەبێ کۆژمێ 16500 دینارێن عیراقی کو دێ ژ لایێ ھاولاتیان ڤە ھێنە دان، ئەڤێ چەندێ نەرازیبوونەکا مەزن و نە چاڤەرێکری ل جەم خەلکێ پارێزگەھێ ب گشتی دەنگڤەدا و ب رێکێن دەزگەھێن راگەھاندنێ و سوشیال میدیایێ ڤە داخاز ژ جھێن شولەژێ دکەن پێداجوونەکێ د ڤێ بریارێ دا بکەن کو بھایێ کارەبا موەلیدان بھێتە کێمکرن، ددەمەکی دا کو مۆچەیێ فەرمانبەرێن ھەرێمێ یێ کێم و ددەمێ خوە یێ دەستنیشانکری دا ناھێنە بەلاڤکرن ئەڤە بوویە بارگرانیەک ل دەڤ خەلکی بۆ پەیداکرنا پێداویستیێن رۆژانە یێن ژیانێ. ل سەر ڤان ھەموو ئالۆزی و قەیرانێن دژوار، گرانیا بھایێ ئەمپێرێن کارەبا موەلیدی بوویە ئاریشەکا دی بۆ خەلکێ پارێزگەھا دھۆکێ کۆ ئەڤە چەند رۆژە بوویە بابەتێ ھەرە گەرم د ناڤ خەلکی دا ل ھەموو جھان، کو جیاوازیەکا مەزن ھەیە ئەگەر بھێتە بەراورد کرن دگەل بھایێ ئەمپێرێن موەلیدێن پارێزگەھا ھەولێرێ و سلێمانیێ، ئەڤە جھێ سەرسورمانێ و مەندەھوشیێ یە، بۆچی ما پارێزگەھا دھۆکێ نە گرێدایێ ھەرێما کوردستانێ یە؟! یان دھۆک بوویە ھەرێمەکا سەربەخۆ و بێ خۆدان؟! یان ھەر پارێزگەھەک دەستھەلاتەک ب رێڤە دبەت لەوا ئەوا ل دھۆکێ رووددەت ل ھەولێر و سلێمانیێ ب رەنگەکێ دی دھێتە دیتن و جیاوازتر؟ یان بتنێ میگاواتێن کارەبا گشتی ژ پارێزگەھا دھۆکێ ھاتینە کێمکرن؟ دوھی پارێزگارێ دھۆکێ ب وەکالەت راگەھاند «حكومه‌تا هه‌رێمێ حه‌فتێ مێگاواتێن دی یێن كاره‌بێ بۆ دهۆكێ زێده‌كرن و ل مه‌ها هه‌شت، دێ سعه‌تێن كاره‌با گشتی زێده‌بن!!» دەستپێکێ چارەکێ ل بھایێ کارەبا موەلیدان ل پارێزگەھا دھۆکێ یێن مەھا حەفت بکەن پاشی بەحسێ زێدەکرنا میگاواتێن کارەبا گشتی بو مەھا ھەشت! یان ئەڤە ژی جورەکێ دی یئ رازیکرن و مژیلکرنا خەلکێ ھەژارێ ڤێ پارێزگەھێ یە؟ ئەگەر ئەم تماشە بکەین خەلکێ پارێزگەھا دھۆکئ ب ھەمی تەخ و چینان ڤە کوردپەروەرن و کێمترین ئاریشە و خوەنیشاندان و تێکدان و کارێن تیرۆری ل ڤێ پارێزگەھێ دھێنە ئەنجامدان، و ل شوونا کو ژ ھەموو لایەکی ڤە خەلکێ وێ ھاتبا خەلاتکرن و چاڤدان دھێنە سزادان و پشت گوھ ئێخستن، لەوا پارێزگەھا دھۆکێ د ھەمی وارەکی دا بێ خودانە و بەریا نھا ب بوکا کوردستانێ دھاتە ناڤکرن و پشتی شەرێ داعش ب پایتەختێ شەھیدان ھاتە ناڤکرن، یا فەرە نوکە ژی ب ناسناڤێ دھۆک ھەرێمەکا بێ خودان بھێتە ناڤکرن، ژبەرکو وەکو ڤان ناسناڤان «بوکا کوردستانێ- پایتەختێ شەھیدان» چ رێز و ھاریکاری بۆ خەلکێ وێ نەھاتیە کرن.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.