پارێزگه‌ها دهۆكێ دێ مێڤاندارییا قاره‌مانییا ڤۆلیبۆلا ئیراقێ كه‌ت

پارێزگه‌ها دهۆكێ دێ مێڤاندارییا قاره‌مانییا ڤۆلیبۆلا ئیراقێ كه‌ت

وار – دهوك :

سه‌رۆكێ فه‌خری یێ یانه‌یا سه‌نحاریب بۆ رۆژنامه‌یا وار راگه‌هاند كو نفێسار فه‌رمی یا ئێكه‌تییا ڤۆلیبۆلا ئیراقێ گه‌هشتییه‌ وان رازیبووینه‌ لسه‌ر مێڤاندارییا پارێزگه‌ها دهۆكێ بۆ قاره‌مانییا ڤۆلیبۆلا یا یانه‌یێن پلا نایاب ل سه‌ر ئاستێ كچان.

زێده‌تر داوود ره‌به‌ن گۆت، هه‌رچه‌نده‌ ل ده‌ستپێكێ ئێكه‌تیێ بڕیار دابوو ئه‌ڤ قاره‌مانییه‌ ل باژێرێ سلێمانیێ بهێته‌ كرن، به‌لێ مه‌ وه‌كو مافه‌ك داخوازی ژ ئێكه‌تیێ كر ژ سلێمانیێ بۆ دهۆكێ ڤه‌گۆهێزن، ژبه‌ركو دو قاره‌مانیێن دی لدویڤ ئێك ل سلێمانیێ هاتبوونه‌ كرن و ئه‌م باژێرێ دهۆكێ غه‌در لمه‌ هاتییه‌كرن و مافێ مه‌یه‌ مێڤاندارییا قاره‌مانیه‌كێ بكه‌ین، له‌ورا لسه‌ر ڤی بابه‌تی پشتی كۆمبوونێن جودا نڤێساره‌كا فه‌رمی ئه‌م ئاگه‌هداركرین كو پارێزگه‌ها دهۆكێ ماف هه‌یه‌ قاره‌مانییا ئیراقێ یا ڤۆلیبۆلێ مێڤان بكه‌ت.

ژلایه‌كێ دویڤه‌ ناڤبری دیاركر كو ژڤانێ قاره‌مانیێ دێ ل ئێكێ چڕییا ئێكێ یا بهێت ل هۆلا گرتییا یانه‌یا سه‌نحاریب ب پشكدارییا تیمێن ده‌ربازبوو ژ قۆناغێن ده‌ڤه‌رێن، باكۆر و باشوور و ناڤینا ئیراقێ دگه‌ل یانه‌یا مه‌ هێته‌ كرن و گۆت، وه‌كو دیاركر ل باژێرێ به‌غدا دو یانه‌ ده‌ربازبووینه‌ ئه‌وژی سیناعه‌ و ئه‌مانه‌ت به‌غدا، دیسان یانه‌یا قه‌رقۆش، هه‌روه‌سان پێشبینی دهێته‌ كرن دو یانه‌ ژ هه‌ولێرێ و دو یانه‌ ژ سلێمانیێ ژی پشكداربن.

داوود ره‌به‌نی ئه‌وچه‌نده‌ ژی دیاركر كو نوونه‌راتییا دهۆك یا لژنه‌یا ئۆلۆمپییا كوردستانێ و ئێكه‌تییا ڤۆلیبۆلا پارێزگه‌هێ به‌رهه‌ڤییا خۆ دیاركرییه‌ بۆ پشته‌ڤانی و هه‌ڤكارییا یانه‌یا مه‌ بكه‌ن بۆ هندێ مێڤاندارییه‌كا سه‌ركه‌ڤتی بیت و جهێ رێزگرتنێ و پووته‌دانێ بیت.

بابه‌تێن ب ڤێ مژارێ ڤه‌ گرێدای