پاریس دێ بێى نه‌یمار، كاڤانى و مونییێ رووبروو یۆنایتدێ بیت

پاریس دێ بێى نه‌یمار، كاڤانى و مونییێ رووبروو یۆنایتدێ بیت

WAAR-دهۆك:

یانەیا مانچستەر یۆنایتد یا ئنگلیزی داوی ب بەرھەڤیێن خۆ بۆ مێڤانکرنا یانەیا پاریس سانجێرمان یا فرەنسی ژ چارچووڤێ یاریێن ئێکێ یێن قۆناغا ١٦ یا چامپیۆنز لیگێ تمامکرن. لسەر دەمێ مورینیوی وەسا دھاتە دیتن کو یۆنایتد ژ ھەڤرکییا ھەموو ناسناڤان دوورکەڤتییە، لێ بھاتنا سۆلسکایێری ھەموو تشت ھاتنە گھورین و پێشکەڤتنەکا مەزن دئاستێ تیمێ دا ھاتە دیتن، د ١١ یارییان دا ١٠ سەرکەڤتن تۆمارکرن و جارەکێ وەکھەڤبوویە، و جەماوەرێ وێ ب گەشبینیی بەرێ خۆ دەتە کاروانێ وێ دڤآ قارەمانییێ دا، پێکھاتییێ یانەیا سۆر بۆ ڤێ یارییێ دێ یێ تمام بیت و چ یاریکەرێن دوورکەڤتی نابن، و مارکۆس راشفۆرد ڤەگەریا تیمێ پشتی بۆ وەرگرتنا بھێنڤەدانێ ژ دیدارا فولھامێ دوورکەڤتی.

 

راھێنەرێ یانەیا مانچستەر یۆنایتد ئولی گونار سۆلسکایێری راگەھاند نھا دەم یێ گونجایە رووبروو یانەیەکا وەکو پاریس سانجێرمانێ ببن . د داخویانیێن رۆژنامەڤانیدا راھێنەرێ نەرویجی دیارکر، د یاریێن بھێن دا دێ روبروو تیمێن مەزن بن، لێ دڤێت فوکسا وان لسەر ڤێ یارییێ بیت و ھزرا یاریێن دوڤدا نەکەن داکو تەرکیزا خۆ ژ دەست نەدەن و ئەگەر دەمەکێ گونجای بۆ رووبروونا پاریسێ ھەبیت دێ ئەڤ دەمە بیت، و زێدەتر دیارکر تشتەکێ جوانە پێشکەڤتنا پاریس سانجێرمانێ ببینن، ل سالا ١٩٩٥ ل مولدە وی یاری بدژی یانەیا پاریسی کرییە، و پێشکەڤتنا وێ کارەکێ جوانە، وێ باشترین یاریکەرێن جیھانێ و ئێک ژ باشترین گۆلپارێزێن جیھانێ ھەیە ئەوژی جانلویجی بوفونە، ھەروەسا تیاگو سێلڤا و مباپی و نەیمار ژی ھەنە.

ھەروەسا یانەیا پاریس سانجێرمان یا فرەنسی داوی یەکەیا راھێنانێ بۆ ڤێ دیدارا گرنگ کر . گەشترین ستێرا یانەیا پاریسی ئەوێ بۆ بجھئینانا خەونا برنا ناسناڤێ چامپیۆنز لیگێ ھەڤبەست دگەلدا ھاتییە گرێدان نەیمار داسێلڤا ب ئەگەرێ ھنگاڤتنێ یێ بەرھەڤ نابیت، ھەروەسا گۆلکارێ دیرۆکی یێ تیمێ ئێدینسۆن کاڤانی ژی ھەر ب ھنگاڤتنێ پشکدارییێ ناکەت، و ب ھەمان ئەگەر بەرەڤانێ لایێ راستێ تۆماس مونییێ ژی دێ یێ دوروکەڤتی بیت، بڤان دوورکەڤتنان پشتبەستنا پاریسێ ل ھێلا ھێرشبەرییێ دێ لسەر کیلیان مباپی، ئەنخێل دیماریا و جۆلیان دراکسلەری بیت.

 

بابه‌تێن ب ڤێ مژارێ ڤه‌ گرێدای