پاراستنا ژینگەھێ ئەرک و ئەخلاقە یان تێکدان؟!

پاراستنا ژینگەھێ ئەرک و ئەخلاقە یان تێکدان؟!

عیماد ئالیخان

دگەل ھاتنا وەرزێ بھار و جەژنا نەورۆزێ، خەلکێ باشورێ کوردستانێ ژ گەنج و پیر و … ھتد قەستا ناڤا سرۆشتێ جوانێ کوردستانێ دکەن، و ب تایبەت د ھەر بھێنڤەدانەکێ دا، کو بخوە ب دەلیڤە دبینن ژمالێن خوە دەرکەڤن و قەستا ناڤا سروشتی بکەن ب مەبەستا بۆراندنا دەمێن خوەش و دورکەفتن ژ قەرەبالغا باژێری، ئەڤ دیاردە د درێژیا وەرزێ بھارێ دا یا بەردەوامە ژ خێزان، قوتابی و گرۆپێن گەشتیاری یێن بیانی و … ھتد، لێ ل دەمێ ڤەگەریانێ بۆ مالێن خوە پرانیا سەیرانیان جھێن خوە تێک ددەن و ئەڤی وەرزێ ھوسا جوان و ب خەمل ب روویەکێ نەجوان و پیس دھێلن ژ ھاڤێتنا بەرمایکان و بڕینا داران و … ھتد. ب دیتنا من ھاولاتی و حکومەت بەرپرسیارن ژ ڤێ دیاردێ و ھەردو لا د کێمتر خەمن بەرامبەر تێکدانا ژینگەھێ. ژلایێ ھاولاتیان ڤە ئەڤ دیاردە ھندێ دیار دکەت کو ڤیانا وان بۆ ئاخ و نەتەوەیێ یا لاوازە و ب مالا خوە نادانن و ژینگەھێ ب نەیار دبینن و سەرەدەریەکا توند دگەلدا دکەن، و بتنێ ب ئاخفتن پاقژیا ژینگەھێ بۆ دەزگەھێن راگەھاندنێ و سوشیال میدیایێ دیاردکەن، ئەگەر ئەڤا من نڤیسی یا دروست نەبیت، پا کی یە ڤێ ژینگەھا ھوسا جوان و ب خەمل د ڤی وەرزێ جوان دا تێکددەت؟ ژلایێ حکومەتێ ڤە راستە پۆستەر ل گەلەک جھێن گوزاری ھاتینە ھەلاویستن و تێدا درۆشمێن گرێدای پاراستنا ژینگەھێ و ھشیاریا خەلکی بەرچاڤکرینە و بەردەوام نایلونێن بارمایکان ل سەر سەیرانیان دھێنە دابەشکرن، لێ تا رادەکی ھاولاتی نە ل وی ئاستێ رەوشەنبیریێ نە کو بزانن ھاڤێتن و ھێلانا بەرمایکان د ناڤا سرۆشتی یان د سکران دا چ زیان و مەترسی و نەخۆشی د دووڤ دا دھێن، بێگۆمان کارتێکرنەکا نێگەتیڤ ل سەر کۆمەلگەھێ ب گشتی ھەیە ، لەوا وەک پێدڤی پێگیریێ ب وان رێنمایان نادەن. ھەروەسا ژلایەکێ دیڤە رۆلێ حکومەتێ و جھێن بەرپرس لسەر پاراستنا ژینگەھێ یێ سستە، گەلەک ژ سەیرانیان بەرمایکێن خوە کۆم دکەن و ددانە نێزیک جادێن سەرەکی داکو بۆ ترۆمبێلێن راکرنا بەرمایکان ئاسان ببیت، لێ بۆ ماوەیێ چەند رۆژان ئەو بەرمایک و پیساتی دمیننە سەر جادان و کەس لێ نابیتە خودان د راکرنێ دا، لەوا ئەو بەرمایکە دوبارە بەلاڤەدبنەڤە دناڤا سروشتی و سەر جادەیان دا. یان ژی بۆچی کەسێن سەرپێچیێ ل سەر تێکدانا ژینگەھێ دکەن ل دەمێ سەیرانان ژ ھێلانا بەرمایکێن خوە و … ھتد ناھێنە سزادان ژ لایێ یاسایێ ڤە؟ ئەگەر ھندەک سەیرانی ھاتبانە سزادان ل سەر تێکدانا ژینگەھێ ئێدی ئەڤ دیاردە و دیمەنێن نەشارستانی و ب ڤی قەبارێ ھندە مەزن نەدھاتنە پێش چاڤێن مە کو رۆژ بۆ رۆژ ئەڤ دیمەنێن نەجوان د زێدەبوونێ دانە. ھەروەسا رۆلێ ماموستایێن پەروەردەیی گەلەکێ گرنگە کو بۆ قوتابیان باس ل پاراستنا ژینگەھێ بکەن و ماموستایێن ئاینی و دەزگەھێن راگەھاندنێ و سوشیال میدیا دڤێت پتر گرنگیێ ب بابەت و بەرنامێن گرێدای پاراستنا ژینگەھێ بدەن و کەسانێن بسپور د ڤی بواری دا مێھڤان بکەن داکۆ بۆ ھاولاتیان پتر دیاربیت کو ژ ئەنجامێ ھێلانا بەرمایکان دناڤا سرۆشتی دا یان بەر لێڤێن سکرێ دھۆکێ مەزنترین ئاریشە و نەخۆشی پەیداببن، داکو ژینگەھ پتر بھێتە پاراستن و پاقژکرن، ژبەرکو تێکدانا ژینگەھێ تێکدانا ساخلەمیا گشتی یە. نھا وەرزێ بھارێ یە و باشتر ئەوە ھەرتاکە کەسەک لسەر ڤێ ئاخێ خوە بەرپرسیار بزانیت د پاراستنا ژینگەھێ دا، داکو ھەموو خێزان، قوتابی و … ھتد خوشیێ ژ ڤی وەرزی ببینن دەمێ قەستا ناڤا سرۆشتی دکەن ب مەبەستا گێرانا سەیرانان و نەبنە ئەگەرێ تێکدانا ژینگەھێ و پەیدابوونا نەخۆشیان ژ ھێلانا بەرمایکان و بڕینا داران و … ھتد ژبەرکو رەفتارێن ھەر تاکەکی یان کۆمەلگەھەکێ رەوشتێ وان دیار دکەت.

بابه‌تێن ب ڤێ مژارێ ڤه‌ گرێدای