وەکی دھی..

ئەحمەد جاسم
دناڤ قەرەبالغا چەیخانەیێ و دووکێلا جگارە و نەرگیلان دا، دەنگێ سترانێ د گوھێ خوە دا کەھی دکر، ھەر وەکو دڤیا مونتاژەکی د سەرێ خوە دا چێکەت، ھەمی دەنگان نزم بکەت و ب تنێ ڤی دەنگی د گوھێ خوە دا ب حەوینیتب.
(وەکی دھی وەکی ھەر جار وەکی پار و وەکی پێرار، ئەڤینا تە یا د دلی دا ناھێتە دەر شرین چ جار ).
سترانەکە گەلەک جاران ڕحا من دگەل خوە دبەت و لەشێ من دھێلیتە ل جھێ خوە، نزانم ھندی ژیانامە رۆتینە یان ژ بەر پەرستنا مەیە بۆ رابۆری، ئەز ناڤەشێرم کۆ ئەز ڕابۆری دپەرێسم ئەگەر نە نھا وێنێ تە ل پێش چاڤێن من نەدبوو.
– دێ چایێ ڤەخۆی؟
دەنگەکێ ڕەق و پری خوە سەپاندن بوو، جرفەک ئینا من.. من دڤیا وەک وی بەرسڤ بدەم لێ نزا بۆچ من ھزرکر ئەگەر باخڤم دێ گەورییا من بریندار بیت، نزا بۆچ دەنگێ من بسەر نەکەت، ھەما ب ئاماژەکا سەری من گوتێ بەلێ.
ھەمی تشت یێ سەپاندی یە (دەم –جە-تو-ئەز) ھاتنا من یا نە چاڤەرێکری بۆ چەیخانێ ژی بھێزەکا زرتەک و سەپاندی بوو. ئەڤە ھەمی ب تنێ دا وێنێ تە ل سەر رۆژنامەیێ ببینم و بکەڤمە داڤا بیرھاتنێن بۆری .
کی ئێکەم جار یێ دی کوشتیە؟
ئەڤە ھزرێن منن دەمێ سەحدکەمە وێنێ تە و مانشێتێ ل سەر دا (دڤێت مروڤ ڕابۆری بکوژیت، دا تامێ ژ ژیانا خوە ببەت).

بۆچی ھەستپێدکەم ئەڤە بۆ من بوو؟
دھەمان دەم دا گۆمان چێدبیت ما کەنگی تە دزانی دێ رۆژنامەیێ خوینم؟ ھەر وەکو ب گرنژینا خوە یا نە یا سرووشتی تە دڤێت خوە بۆ من بیانی بینیە دەر و بێژی: (تو نەمای، بتنێ دو ھێلێن ھەڤدژ یێ د ژیانا من دا، ئەو ژی نھا و سوبەیە، چ تشت ب ناڤێ دوھی نینن ).
ئەگەر بیرا تە ل دوھی نەھێت ئەگەر دوھی جھێ خوە دفەرھەنگا تە دا نەبیت بۆچ ناڤێ دوھی دئینی ..
– کەرەم کە
چڕەقێنا پەیالێن چایێ و دوبارە بوو ئەو دەنگێ زڤر، ھەمی ھزرێن من وەکی دووکێلا جگارەیان ڤەرەڤاندن..
من نەڤێت زێدەتر بخوینم و دھەمان دەم دا من دڤێت ..ھەر وەکو چاڤێن من ژی زوریێ ل من دکەن ، دئێکەم پرسیار دا ھەر وەکو رۆژنامەڤانی یا ڤیای خوینەران ل خوە کوم بکەت یان ژی دزانی دێ ئێک ل پشت پەردەیێ ب ڤێ پرسێ ئێشیت لەوا بەحسێ پەیوەندییا تە یا ئەڤینیێ کر، تە ژی وەکی ھەر کەسێ رۆناھی کەتیە سەر و ب ناڤ و دەنگ کەتی ب ساری بەرسڤدا: (ئەم ئەڤینیێ دکەین ژ بەرکۆ ئەم د پێتڤی گرنگی پێدانی نە لێ نھا گرنگیا من بو کارێ من بتنێ یە ! )
ئەڤ بەرسڤە د سەرێ من دا زڤری و من ھاژ خوە نەبوو کو ئەڤە دەمەک درێژە ئەزێ چایێ تێکڤەدەم و ھەمی یێ سەحدکەنە من، ھەر وەکو تە ئەز گەلەک یێ تێکڤەدایم، ھەر وەکو قورتالبوون ژ تە نینە.. ئەم چ بکەین دا ژبیردانکێ قورتالببین، ئەرێ ما بیردانک دەستبەردایێ بریارێن مەیە یان ژی ھەست و سۆزان، ئەز چ د ناڤ خوە دا بکۆژم دا تو نەمینی؟
ل سەر زێدە دکەی و دبێژی: کەڤالێن من ئەڤینا منن، دناڤ کەڤالێن خوە دا ئەز دەربرینێ ژ ئەڤینا خوە دکەم ھەر کەسێ سەحکەتە کارێن من یێن ھونەری دێ ڤی تشتی دناڤ دا بینیت ..
بیرا من ناھێت تە جارەکێ بەحسێ پەیوەندییا کەڤالی و ئەڤینیێ بو من کری، گەلەک جاران من دڤیا ل سەر کارێ خوە بۆ من باخڤی ھەر زوو تە بابەت دگوھوڕی، چ جار تە نەدڤیا تشتەکی ژ کارێن تە بزانم، نزا ئەو چ قەلساتی بوو ل ھەمبەر من وەکو ئەڤیندارێ تە ل وی دەمی و چ مەرداتیە دگەل ڤی رۆژنامەڤانێ ڕەنگە جارا ئێکێ یە تو دبینی؟
دیارە پشتی ژێکڤەبوونێ حەزا ئاشکرا کرنا تشتێ نە ھاتیە گۆتن پەیدا دبیت.
– بێ زەحمەت ھەکەر تو ژێ خلاسبوی بدەڤمن.
ماموستایەکێ خانەنشینە ب دەنگێ خوە یێ وەستیای رۆژنامە ژ من خواست من ژی ب گرنژین ڤە رۆژنامە کرە تێکدا و داڤێ .
ئەڤ داخازی یە ل دەمێ خوە ھات، ئەز ب خواندنا وێ دیدارێ ڤە وەستیام، چەند من بەرسڤەکا تە دخواند دوبارە من سەرێ خوە بلندکر و سەحدکرە وێنێ تە دا خوە پشتڕاستکەم کانێ ژ ڕاست تو خودانا ڤان بەرسڤای؟ نزا بۆچ من حەسدکر ھەڤبەریەکێ دناڤبەرا وێنێ تە و وان بەرسڤان دا بکەم..
بێھنا من ل ڤی جھی تەنگ بو ھەر زوو من ڤیا تشتێن خوە ڤێکدەم و ڕابم، ژنیشکەکێ ڤە وی ماموستایێ خانەنشین چنگلێ من گرت و ب ئاوریەکا نیڤ گرنژین و نیڤ تڕانەپێکرن گۆت:
– ھا بگرە ئەڤە ڕۆژنامە دوھی یە.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.