وه‌زیرێ مافێ مرۆڤى: ره‌وشا مافێ مرۆڤى ل ئیراقێ گه‌له‌ك نه‌خوه‌شه‌

وه‌زیرێ مافێ مرۆڤى: ره‌وشا مافێ مرۆڤى ل ئیراقێ گه‌له‌ك نه‌خوه‌شه‌

وار – دهۆک :

وەزارەتا مافێ مرۆڤی یا ئیراقێ راگەهاند كو چەکدارێن داعشێ د سالا 2014ێ دا 4 ملیۆن پێشێلکارى و زێده‌گاڤى بەرانبەرى کەسێن سڤیلێن ئیراقێ ئه‌نجام داینه‌ و هه‌ر ژبه‌ر هاتنا داعشێ ژ مه‌ها شه‌شا سالا بۆریڤه‌ هه‌تا نوكه‌ نێزیكى 3 هزار كه‌س بێ سه‌روشوون بووینه‌.

محەممەد مەهدی بەیاتی، وەزیرێ مافێ مرۆڤی یێ ئیراقێ د کۆنگرەیەکێ رۆژنامەڤانى دا ل باژاڕێ كه‌ركووكێ راگه‌هاند، ”دۆخێ مافێ مرۆڤى ل ئیراقێ گه‌له‌ك ب ئازارە و 4 ملیۆن پێشێلکاری هاتینه‌ تۆمارکرن، کو رێکخراوا تیرۆرستییا داعشێ بەرانبەر ب خەلکێ سڤیلێ ئیراقێ ئەنجام داینه‌، دیسان ژبه‌ر هاتنا داعشێ بۆ ئیراقێ ژ مه‌ها شه‌شا سالا 2014ێ ڤه‌ هه‌تا نوكه‌ بێ سه‌روشوونبوونا 2 هزار و 980 كه‌سان ژ هه‌موو پێكهاته‌یان هاتییه‌ تۆماركرن”.
محەممەد مەهدی بەیاتی ئه‌و ئێكه‌ ژى گۆت: ”وەزارەتا مافێ مرۆڤى یا ئیراقێ ب هەماهەنگی لگەل رێکخراوێن نێڤدەولەتى چاڤدێرییا پێشێلكاریێن داعشێ دكه‌ت كو هه‌موو پەیماننامە و نەریت بەزاندینە و پێكدهێن ژ پێشێلکاریێن ئازادییان و چەکدارکرنا زاڕۆیان و داهێنانا گه‌له‌ك جۆرێن شێوازێن كوشتن و بن ئانكرن و په‌قاندنا په‌رستگه‌هان و شه‌ڕ و كوشتن و پشتگوهـ هاڤێژتنا نه‌ته‌وه‌یان و ب ئارمانجكرنا گه‌لێ ئیراقێ ب مه‌ره‌م ڤه‌ بۆ سه‌رهلدانا نه‌ ئارامى و نه‌خوه‌شیێ ل ئیراقێ”.
ئه‌ڤه‌ د ده‌مه‌كى دایه‌ كو ل گۆره‌ى حوكمه‌تا ئیراقێ، ژبه‌ركو كۆنترۆلكرنا باژاڕێ مووسلێ ل 10/6/2014ێ ژ بال چه‌كدارێن داعشێ ڤه‌ و كۆنترۆلكرنا پشكه‌كا زێده‌یا چه‌ند پارێزگه‌هه‌كێن دى یێن ئیراقێ ب ده‌ستێ ڤێ گرۆپێ، نێزیكى 3 ملیۆن كه‌س ل ئیراقێ ئاواره‌ بووینه‌.
هه‌ژى ئاماژه‌كرنێیه‌، ل 2ى ڤێ مه‌هێ، سەباح کەرحوت، سەرۆکێ جڤاتا پارێزگه‌ها ئەنبارێ ژى د کۆنگرەیەکێ رۆژنامەڤانى دا راگەهاند: ”داخوازێ ژ هێزین حه‌شدا شه‌عبى دكه‌ین ل ئاستێ به‌رپرساتیێ بن د رووبرووبوونێ دا و ب ئارمانكرنا دوژمنى و دیسان كه‌رامه‌تا ئه‌نبارییان ژى بپارێزن كو ژ بال تیرۆرێ ڤه‌ سته‌م لێ هاتینه‌كرن، ژبه‌ركو شه‌ڕێ ل دژى تیرۆرێ گه‌له‌كێ مه‌زنه‌ و پێدڤى ب پشته‌ڤانییا برایانه‌، ب وى مه‌رجێ سه‌روه‌رییا ئیراقێ نه‌هێته‌ پێشێلكرن”.
سەباح کەرحوت ئه‌و ئێكه‌ ژى گۆتبوو، ”هه‌فت هزار چه‌كدارێن ئاكنجیێن ئه‌نبارێ هه‌نه‌ ل سه‌ربازگه‌ها حه‌بانییه‌ و ب سه‌رپه‌رشتییا ئه‌مریكییان و ل گۆره‌ى رێكه‌ڤتنا وان دگه‌ل حوكمه‌تا ئیراقێ مه‌شق ب وان دهێته‌كرن”.
ئه‌ڤ داخوه‌یانییا سه‌رۆكێ جڤاتا پارێزگه‌ها ئه‌نبارێ د ده‌مه‌كى دایه‌ كو گرته‌یه‌كا ڤیدیۆیى د تۆڕێن جڤاكى دا به‌لاڤبوویه‌ كو تێدا چه‌ند چه‌كداره‌كێن حه‌شدا شه‌عبى، سه‌رۆك هۆزه‌ك و سه‌ركرده‌یه‌كێ هێزێن سه‌حوه‌ ل باژاڕكێ خالدییه‌ ل پارێزگه‌ها ئه‌نبارێ ئه‌شكه‌نجه‌ دده‌ن و سڤكاتیێ ب وان دكه‌ن.

بابه‌تێن ب ڤێ مژارێ ڤه‌ گرێدای