وه‌زاره‌تا ناڤخۆ ئه‌گه‌رێن بوویه‌را مووسلێ ئاشكرا كرن

WAAR-دهۆك:

وه‌زاره‌تا ناڤخۆ یا ئیراقێ ئه‌گه‌رێ بوویه‌را بنئاڤبوونا به‌له‌ما مووسلێ ئاشكرا كرن و راگه‌هاند؛ خودانێن گزیرته‌یا گه‌شتیاری پابه‌ندی رێنمایێن پێشوه‌خت یێن رێڤه‌به‌رییا سكرێ مووسلێ نه‌بووینه‌.
وه‌زاره‌تا ناڤخۆ یا ئیراقێ ئه‌ڤرۆ راپۆرته‌ك لدۆر ئه‌گه‌رێن بوویه‌را بنئاڤبوونا به‌له‌ما مووسلێ ل رووبارێ دیجله‌ی به‌لاڤ كر و راگه‌هاند؛ رێڤه‌به‌رییا سكرێ مووسلێ پێشوه‌خت هایداری دابوونه‌ جهێن گه‌شتیاری ل به‌راڤێن دیجله‌ی، كو ژبه‌ر زێده‌بوونا ئاڤا سكری، به‌ردانا ئاڤێ دێ هێت زێده‌ كرن، لێ خودانێن وێ گزیرتێ پابه‌ند نه‌ببوون.
هه‌روه‌ها دایه‌ زانین، ئه‌گه‌رێ سه‌ره‌كی یێ بنئاڤبوونێ بۆ وێ یه‌كێ دزڤریت، خودانێن گزیرتێ پتری شیانێن به‌له‌مێ مرۆڤ لێ سوار كربوون، كو د ناڤبه‌را 170 تا 175 كه‌سان دا بوون.
وه‌زاره‌تا ناڤخۆ به‌حسا كێماسیێن پۆلیسێن به‌راڤێن دیجله‌ی ژی كرینه‌ كو ئالاڤێن پێدڤی ژبۆ رزگاركرن و كێمكرنا زیانێن بوویه‌رێ نه‌بووینه‌.
وه‌زاره‌تا ناڤخۆ پێشبینی كرییه‌، 30 كه‌سێن دی كو د به‌له‌مێ دا بوون، گیانێ خوه‌ ژ ده‌ستدا بیت و هێشتا ته‌رمێن وان نه‌هاتینه‌ دیتن.

بابه‌تێن ب ڤێ مژارێ ڤه‌ گرێدای