هۆلاكۆ و داعش (دراكۆلا) یێن وێرانكار

سه‌بیحا ئیبراهیم  :

مه‌ مرۆڤان، دیرۆك ب گه‌له‌ك ره‌نگان ناسكرییه‌، دیسا پشكداری د تۆماركرنا وێدا كرییه‌، چ ب روویه‌كێ ره‌ش، یان ب ئێكێ سپی. لێ هه‌ر چاوا بت، هۆكار و سه‌ده‌مێن وان روودانان ژی هه‌ر مرۆڤ بووینه‌ و به‌رده‌وام ژی مرۆڤ د هه‌ڤڕكییه‌كا دژواردا لسه‌ر ڤێ ئاخێ دژین.
ل سالا 656 خه‌لكێ‌ به‌غدایێ هه‌وڵدان ژ به‌غدایێ ده‌ربكه‌ڤن ژبه‌ر هاتنا مه‌غۆلان بۆ ده‌ڤه‌رێ‌ و كارێن وان یێن دڕندانه‌، مه‌غۆل ده‌مێ‌ گه‌هشتین به‌غدایێ، ئاگر به‌ردانه‌ په‌رتووكان، هنده‌ك چاڤكانیێن مێژوویی، دبێژن؛ مه‌غۆل ژ په‌رتووكێن به‌غدایێ بۆ هه‌سپێن خوه‌ پر دروستكرن داكو دسه‌رڕا ببۆرن.
ده‌مێ‌ هێزێن ئه‌مریكایێ هاتینه‌ دناڤ ئیراقێدا، ئیراقییان شینوار و مۆزه‌خانه‌ ژناڤبرن، هندك شوونوار ژی هاتنه‌ فرۆشتن. دیسا ل سالا 2015 رێكخستییا داعشێ شوونوار و مۆزه‌خانه‌یێن مووسلێ ژناڤبرن، دیسا ل گه‌له‌ك باژێرێن ئیراقێ‌ یێن ڤێ رێكخستیێ ده‌ست بسه‌رداگرتی، كه‌ربا خوه‌ ل جهێن كه‌ڤنار و شوونواران ئینایه‌ده‌ر و ژناڤبرینه‌، گه‌له‌ك جهێن دی یێن مێژوویی هه‌رفاندینه‌ كو هنده‌ك ژ وان شوونواران هاتن فرۆشتن و هێشتا ئه‌و لسه‌ر ژناڤبرنا شوونوارێن ئیراقێ‌ به‌رده‌وامن، وه‌ك په‌رتووكخانه‌یا مووسلێ و هۆلا راگه‌هاندنێ‌ و شانۆیا زانكۆیێ‌، دیسا هزاره‌هان په‌رتووك ل پارێزگه‌ها ئه‌نبار كو گه‌له‌ك (به‌لگه‌نامه‌ و ده‌ستنڤیس) ژی بوون، هاتن سۆتن.
به‌ری ڤێ‌ كریارێ،‌ رێكخستییا داعشێ فرۆكه‌ڤانێ‌ ئۆردونی سۆت، گه‌له‌ك سه‌رباز و ‌وه‌لاتیێن بێگونه‌هـ ژی كوشتن و سه‌رێن وان بڕین، ئه‌ڤ كارێ هۆڤانه‌یێ ئه‌وێ ریكخستیێ، وان كاران دئینیت بیرا مه‌، ئه‌وێن مه‌غۆلان ل ئیراقێ‌ كرین ده‌مێ‌ گه‌هشتینه‌ به‌غدایێ و خه‌لك د كوشتن و سه‌رێن وان دبڕین. وه‌كی ئه‌م دزانن ژی، ئه‌ڤ كاره‌ پشتی ئامێرێن پێشكه‌ڤتی ده‌ركه‌ڤتین، ‌نه‌مابوون، كو خه‌لك كۆم كۆم دكوژن، مینا فرۆكه‌ و گازێن ژه‌هراوی و… هتد.
داعش ل ڤێ‌ چه‌ندێ‌ نه‌راوستیایه‌، ده‌مێ‌ په‌رتووك سۆتین، پێكۆلكرنه‌ك بوو بۆ نه‌هێلانا شارستانییه‌تێ‌ و نه‌هێلانا شوونواران، ئه‌وا به‌ری وێ‌ مه‌غۆلان كری ل به‌غدایێ، ده‌مێ‌ په‌رتووك هاڤێتینه‌ دناڤ رووبارێ‌ دیجله‌دا و ئاڤا رووباری ژی ژبه‌ر حوبرێ په‌رتووكان ره‌ش بووى. نوكه‌ داعش ده‌ریا ناڤه‌راست ب خوینێ سۆر كر، ده‌مێ‌ وان سه‌رێ‌ قوپتیێن مسری بڕین.
دیسا داعشێ كۆپییه‌كا كارێن دی یێن چاخێن تاری لگه‌ل باهۆزا خوه‌ یا خوینا ئینا كو گرتنا ژنان د شه‌ڕیدا ب سه‌بایا زانین، وه‌ك ئه‌وا ل چه‌رخێن ناڤه‌راست دهاته‌كرن و لگه‌ل گێله‌شۆكا خوه‌ یا ڤه‌ڕێلهای ل ده‌ڤه‌را شنگالێ كچ و ژنێن ئێزدیان ژی كرنه‌ سه‌بایا، و زه‌لامێن وان كوشتن و بچووك ژی برن، پاشی گه‌له‌ك ژ وان ل بازاڕێن رققه‌ و مووسلێ هاتن فرۆشتن.
دیسا چه‌كدارێن به‌غدادی زاری سه‌ربازێن هۆلاكۆ ڤه‌دكرن، كو هۆلاكۆ ژی دیرۆكه‌كا خویناوی هه‌یه‌، ده‌مێ‌ سه‌ربازان خوه‌ راده‌ستی هێزێن وی دكرن، سه‌ربازێن هۆلاكۆى ئه‌و دكوشتن و سه‌رێن وان دبڕین. نوكه‌ ژی داعش ب هه‌مان شێوه‌یێ دڕندانه‌، هزر دكه‌ت و بزاڤا ژناڤبرن و تێكدانا مرۆڤی و بنه‌مایێن مرۆڤینیێ ب هه‌ر شێوه‌یه‌كێ هه‌بت دكه‌ت، له‌و وان سه‌رێن ب ده‌هان كه‌سان، چو دیلێن شه‌ڕی بن یان ژی خوه‌ راستی وان كربن، بێی لبه‌رچاڤگرتنا هیچ بنه‌مایه‌كێ مرۆڤی، سه‌رێن وان بڕینه‌ كو د دیرۆكا نوودا ئه‌ڤ عورف و كریاره‌ دناڤ چو ملله‌ت و گه‌لاندا نه‌ماینه.
ده‌ما هۆلاكۆى هیرشكرییه‌ سه‌ر ده‌وله‌تا ئیسلامی ل به‌غدایێ، وان سه‌رێن وان كه‌سان دبڕین، ئه‌وێن خوه‌ راده‌ستی هێزێن وان دكر یان به‌رسینگێ‌ وان دگرتن.
ئه‌ڤا لسه‌ری ئاماژه‌ پێ هاتییه‌كرن، روودانێن وه‌كهه‌ڤ ل چاخ و ده‌مێن جودا بووینه‌ و تنێ كریارێن داعش یێن هۆڤانه‌ ژی مه‌ره‌مێ دگه‌هینن كو ئه‌و ژی ژناڤبرنا هه‌موو شوونوارێن مرۆڤایه‌تیێنه‌ یێن دیرۆك بۆ كه‌ڤناتییا وان دیده‌ڤان، وان دڤێت ب ژناڤبرنا وان، چى ب رێكا شكاندنێ بت، یان ژی ب رێكا فرۆشتنا وان بت، روویێ گه‌شێ دیرۆكیێ ڤێ ده‌ڤه‌رێ تێكبده‌ن و ل شوونا وان، هزر و شوونتبلێن خوه‌ یێن گه‌نی و وێرانكار بۆ رڤشتێن بهێن بهێلن.

بابه‌تێن ب ڤێ مژارێ ڤه‌ گرێدای