WAAR-دهۆك:
دامه‌زرێنه‌ره‌كێ هه‌ڤپه‌یمانییا دیموكراسی و دادپه‌روه‌ریێ راگه‌هاند؛ ل نێزیك دێ كۆمبوونا گۆپیتكی كه‌ن و ئیداره و رێڤه‌به‌رییا گشتی ل گه‌ل سه‌رۆكێ نوو هه‌لبژێرن.
ئارام قادر، ئه‌ندامێ ده‌سته‌یا دامه‌زرێنه‌رێن هه‌ڤپه‌یمانیێ راگه‌هاند؛ ل گه‌ل دروستبوونا هه‌ڤپه‌یمانیێ، وان بریار دایه كو گرێدای چ كه‌سان نه‌بن و هه‌ڤپه‌یمانی ب به‌رنامه و پلان بهێته برێڤه‌برن، له‌و چوونا به‌رهه‌م سالحی كاریگه‌ریێ ناكه‌ت و ل نێزیك هه‌ڤپه‌یمانی دێ كۆمبوونا گۆپیتكی كه‌ت و ئیداره و رێڤه‌به‌رییا گشتی ل گه‌ل سه‌رۆكێ نوو هه‌لبژێریت.
گۆت ژی: په‌ڕله‌مانتارێن هه‌ڤپه‌یمانیێ ل به‌غدا نه چووینه ناڤ چ فراكسیۆنان ، لێ سازییا خه‌ندان كو ب ئۆرگانێ وان د هاته ناسكرن، نها چ په‌یوه‌ندی ب هه‌ڤپه‌یمانیێ ڤه نه‌مایه، له‌و د كۆمبوونا گۆپیتكی دا، دێ هه‌ڤپه‌یمانی ده‌زگه‌هه‌كێ راگه‌هاندنێ یێ كاریگه‌ر، دامه‌زرینیت.
