هه‌لەبجه‌ بۆ خه‌ملاندنا عیراقێ‌!!

هه‌لەبجه‌ بۆ خه‌ملاندنا عیراقێ‌!!

شیرزاد نایف

د بریاره‌كا چاك و ریفۆرمخواز دا و ب هه‌لكه‌فتا بیره‌وه‌یا هه‌لبجه‌یا شه‌هید، ناڤێ‌ پارێزگه‌ها هه‌لبجه‌ ل كوردستانێ‌ و عیراقێ‌ زێدبوو، راسته‌ ب ساناهی ئه‌ڤ ناڤه‌ ناكه‌ڤیته‌ سه‌ر ده‌ڤێ‌ خه‌لكی وه‌كو پارێزگه‌ه چونكو بۆرینا ده‌می پێدڤیت، سه‌ره‌رای هندێ‌ كو ناڤێ‌ ڤی باژارێ‌ بریندار بوویه‌ وه‌كو ناڤداریا ماركه‌كا تۆماركی ل سه‌رانسه‌ری جیهانێ‌ ژ به‌ر وێ‌ سته‌ما جه‌رگبر یا لێ‌ وێ‌ و خه‌لكێ‌ وێ‌ هاتیه‌كرن، به‌لێ‌ شوون په‌نجا نیچیرڤان بارزانی ل سه‌ر ڤێ‌ چاكسازیا هاتیه‌ كرن بۆ گوهارتنا تابلۆیێن ژماره‌یێن ترومبێلێن هه‌لبجه‌یا شه‌هید، ره‌نگه‌كێ‌ دی یه‌ بۆ پتر ته‌رویجكرنا ناڤێ‌ هه‌لبجه‌یا شه‌هید، وه‌كو ریكلامه‌كا گه‌ریانێ‌ یه‌ و پتر دێ‌ بانگه‌شه‌یا ناڤێ‌ وێ‌ هێته‌ كرن، وه‌كو ناڤێ‌ عیراقێ‌ ب ره‌خڤه‌ جۆره‌كێ‌ سه‌ركه‌فتنێ‌ یه‌ و سه‌رخستنا ڤی ناڤی هه‌تا هه‌تایێ‌ وه‌كو خاله‌كا ره‌ش ب ناڤچاڤێن عیراقچیبوونا به‌عسیاتێ‌ نه‌خاسمه‌ ل سه‌ر لۆگۆیێ‌ گۆرستانا هه‌لبجه‌یا شه‌هید نڤیسیه‌ (ممنوع دخول البعپیین)، ئه‌ڤ بریارا هه‌نێ‌ هه‌ر ژ 13 ئادرا سالا 2014 وه‌ره‌ هێشتا ل سه‌ر ده‌مێ‌ سه‌رۆكوه‌زیریا نووری ئه‌لماكی هاتیه‌ ده‌رخستن ژ لایێ‌ سه‌رۆكێ‌ حوكمه‌تا هه‌رێما كوردستانێ‌ ڤه‌ كاك نێچیرڤان بارزانی وه‌كو دیاریه‌كا هه‌ژی بۆ خه‌لكێ‌ ڤی باژاری كو ببیته‌ چاره‌مین پارێزگه‌ها هه‌رێما كوردستانێ‌ و یا نۆزدێ یا عیراقێ‌، به‌لێ‌ ژ به‌ر وان بگرو ڤه‌كێش و خه‌مساریا نووری ئه‌لمالكی و یێن دووڤرا، ب چاڤپێنه‌رابوون و ـ مه‌ره‌مه‌كی د دلێ‌ یه‌عقووب دا ـ هند هایدانا ڤێ‌ ئێكی نه‌هاتیه‌كرن و چاڤ لێ هاتینه‌ نقاندن، سه‌ره‌رای رژدیا حوكمه‌تا هه‌رێما كوردستانێ‌، به‌لێ‌ مه‌ دیت ئه‌ڤ ده‌مێ‌ رابری چه‌ند ململانێ‌ و چه‌ند هه‌ڤركی ل هه‌رێما كوردستانێ‌ هاتیه‌ كرن، هه‌ر نه‌دخواستن خوه‌ د ڤێ‌ مژارێ‌ بگه‌هینن، و ئه‌ڤ سیاسه‌ته‌ هه‌مووان دزانی كا چه‌ند سۆزێن دره‌و دهاتنه‌ دان ژ یێ‌ عیراقێ‌ ڤه‌، به‌لێ‌ ئه‌ڤرۆ ره‌وش هاته‌ گوهۆرین و ل گه‌ل چه‌ندین پێنگاڤێن چاك یێن كه‌سێ‌ نێچیرڤان بارزانی ئه‌ڤ مژاره‌ ئێكلاكر ب خه‌مخۆری و تێكۆشانێ‌، شیا ل دووماهیا گێمێ‌ وان سیاسه‌تێن خراب یێن ل گه‌ل جه‌نابێ‌ وی و حوكمه‌تا وی هاتینه‌ كرن، ئه‌ڤرۆ بریارا وی بسه‌ركه‌فت و ( الاحسان بالتمام)، دووماهی پێنگاڤا جۆراتی شیا بسه‌ربێخیت، و ژ ده‌سته‌كێ‌ دلسۆز بۆ ده‌سته‌كێ‌ دیتر یێ‌ دلسۆز دێ‌ هێته‌ راده‌ستكرن، پشتی كو ئه‌ڤ باژارێ‌ جوان و خۆشتڤی یێ‌ كود دلێ‌ هه‌ر كورده‌كی دا هێته‌ خه‌ملاندن ب ترومبێلێن خوه‌ ڤه‌ ب گوهارتنا ناڤێ‌ (السلیمانیه‌ ـ العراق) بۆ ( حلبجه‌ ـ العراق)، بلا ناڤێ‌ عیراقێ‌ ب ره‌خ ناڤێ‌ حه‌لبجه‌ ڤه‌ بیت، به‌لكو هه‌ر به‌ژنا خوه‌ بۆ بچه‌مینیت و هه‌تا هه‌تایێ‌ و قاره‌مانێ‌ وێ‌ پرۆسا ڤی جۆرێ‌ سزادانا نه‌ڤیێ‌ مه‌لا مسته‌فا یێ‌ بارزانی بیت، بابێ‌ نه‌ته‌وا كورد میراتێ‌ سه‌میانبوونا كورد و كوردستانێ‌. ده‌قی بڕیاره‌كانی سه‌رۆكوه‌زیران نێچیرڤان بارزانی بۆ هه‌ڵه‌بجه‌ی شه‌هید… ئه‌ڤ پلانه‌ دێ‌ دو چیچكان ب به‌ره‌كی ئێخیت، یا ئێكی بۆ ئۆبدێتكرنا هه‌ژمارا ب هزاران ترومبێلان، ژ بلی گرنگیا ب ساناهیخستنا پرۆسا هاتنوچوونێ‌ كو ئه‌ڤ باژاره‌ بیته‌ جوانترین باژار ل عیراقێ‌ و كوردستانێ‌، ببیته‌ هێڤێنی رێكوپێكێی كو ل دووڤرا هه‌موو پارێزگه‌رێن دیتر ژی مفای ژ ڤێ‌ سه‌ربۆرێ‌ ببینن و باشتر ره‌وشا هاتنوچوونێ‌ و ترافێكێ‌ بهێته‌ كونترۆلكرن، ترومبێلێن بێسه‌روبه‌ر نه‌مینن، دێ‌ رێژه‌كا باش چیته‌ سه‌ر داهاتی گه‌نجینێ‌ چونكو ئه‌و پاره‌یێ‌ دهێت، دزڤریته‌ ڤه‌ بۆ گه‌نجیا وه‌لاتی هه‌ر چونه‌بیته‌ بۆ خێزانێن شه‌هیدان و هه‌ژاران بچیت، چونكو فه‌لسه‌فا باجه‌یان ئه‌وه‌ پاره‌یێ‌ ده‌وله‌مه‌ندان بچیت بۆ هه‌ژاران ب رێیا حوكمه‌تێ‌.. ئه‌ڤجا ئه‌ڤه‌ ژی ئاماژه‌كا جوانه‌ كو ببیته‌ هێڤێنه‌كێ‌ مفادار و ڤه‌گر بۆ سه‌رانسه‌ری كوردستانێ‌ و عیراقێ‌!!

بابه‌تێن ب ڤێ مژارێ ڤه‌ گرێدای