هه‌لبژارتیێ ئیراقێ ده‌ربازبوو قۆناغا چارێك دوماهییا ئاسیایێ

هه‌لبژارتیێ ئیراقێ ده‌ربازبوو قۆناغا چارێك دوماهییا ئاسیایێ

وار – دهۆک :

تیما هه‌لبژارتیێ ئیراقێ گه‌هشته‌ قۆناغا چارێك دوماهییا كاسا ئاسیا یا ته‌پاپێی، ئه‌وا نۆكه‌ هه‌ڤڕكیێن وێ ل وه‌لاتێ ئۆسترالیا دهێنه‌ برێڤه‌برن، پشتی سه‌ركه‌ڤتنه‌كا گرنك لسه‌ر هه‌لبژارتیێ فله‌ستینێ ئینای ب دو گۆلان بێ به‌رامبه‌ر، مفا وه‌رگرتن ژ سه‌ركه‌ڤتنا هه‌لبژارتیێ سامۆرای لسه‌ر هه‌لبژارتیێ ئۆردنێ ب دو گۆلێن پاقژ، د یاریكرنێن واندا ئه‌وێن دوهی ژ چارچۆڤێ یاریێن كۆما چارێ هاتینه‌ كرن.
ده‌ستپێكا ڤێ یاریێ یاریكه‌رێن هه‌لبژارتیێ ئیراقێ هزر دكر ئه‌ڤ یارییه‌ دێ یا ب ساناهی بیت، به‌لێ به‌رۆڤاژی هزر و پێشبینیێن وان بۆ بتایبه‌ت د نیڤا ئێكێ دا هه‌لبژارتیێ ئیراقێ ب رێكا یاریكه‌ران یوونس و محموود و ئه‌مجه‌د كه‌له‌ف و جه‌ستن میرام چه‌ندین جارا خۆ نێزیكی گۆلا فله‌ستینێ كر، به‌لێ هێلا به‌رگریێ و گۆلچیێ تیمێ ئه‌وێ رۆله‌كێ كاریگه‌ر دڤێ یاریێ دا نیشاندای لبه‌ر سنگی هێرشێن ئیراقێ راوه‌ستیای و ده‌لیڤه‌ نه‌دایێ گۆلێ بكه‌ن، هه‌ر وه‌سان ژ نه‌بوونا هه‌ڤكاریێ دناڤ رێزێن هه‌لبژارتیێ ئیراقێ بۆ ئه‌گه‌ر كو هژماره‌كا ده‌لیڤه‌یێن گۆلكرنێ ژ ده‌ستبده‌ن، نیڤا ئێكێ بێی گۆل ب دوماهیك هات، د نیڤا دووێ دا هه‌ر زوو هه‌لبژارتیێ ئیراقێ ده‌ست ب گڤاشتنێ كر بۆ سه‌ر گۆلا ته‌وفیق عه‌لی ئه‌وێ لبه‌ر سنگێ ته‌پێن ئیراقێ راوه‌ستییای و ده‌لیڤه‌یێن گۆلكرنێ ژ ده‌ستداین، ل خوله‌كا 47ێ یوونس مه‌حموود ده‌لیڤه‌كا گۆلكرنێ یا دورست ژ ده‌ستدا و ته‌وفیق عه‌لی ته‌په‌ هاڤێته‌ ژ ده‌رڤه‌ی یاریگه‌هێ، دگه‌ل هندێ هه‌مان یاریكه‌ر ڤه‌گه‌ڕیا و شاشییا خۆ ب گۆله‌كێ راستڤه‌كر ئه‌وا ل خوله‌كا 48ێ هاتیه‌ كرن، پشتی ڤێ گۆلێ تاراده‌كێ فله‌ستینێ چه‌ند جارا خۆ نێزیكی گۆلا ئیراقێ كر به‌لێ بزاڤێن وان بێ مفابوون، د به‌رامبه‌ردا تیما ئیراقێ پتر گڤاشتن لسه‌ر تیما فله‌ستینێ كر ژبوو پشتراستكرنا ئه‌نجامێ یاریێ ئه‌وبو ل خوله‌كا 61و یاریكه‌ر جه‌ستن میرام ب شێوه‌یه‌كێ نه‌ یاسایێ دناڤ ده‌ڤه‌را په‌نه‌رتیێ دا دهێته‌ ئێخستن و دادڤان په‌نه‌رتییه‌كێ بۆ ئیراقێ د هه‌ژمێریت و یوونس مه‌حموود نه‌شیا گۆلا دووێ بكه‌ت و مفا ژ ڤێ په‌نه‌رتیێ نه‌دیت، دویڤدا راهێنه‌رێن هه‌ردو تیمان ده‌ست ب گوهۆڕینا یاریكه‌ران كر، داكو ئه‌نجامێ یاریێ بهێته‌ گوهارتن به‌لێ چوو كارتێكرنا خۆ نه‌كر تاكو خوله‌كا به‌ری دوماهیێ یاریكه‌ر ئه‌حمه‌د یاسین ڤه‌گه‌ریا گۆلا دووێ بۆ هه‌لبژارتیێ ئیراقێ ئینا، یاری د به‌رژه‌وه‌ندییا هه‌لبژارتیێ ئیراقێ ب دو گۆلان بدوماهیك هات و د هه‌مان ده‌مدا هه‌لبژارتیێ چاپانێ ب هه‌مان ئه‌نجام سه‌ركه‌ڤتن لسه‌ر هه‌لبژارتیێ ئوردنێ ئینا و بڤی ئه‌نجامی هه‌ردو هه‌لبژارتیێن چاپانێ و ئیراقێ ده‌ربازبوونه‌ چارێك دوماهییا ئاسیایێ، بڕیاره‌ سوبه‌ و دوزبه‌ یاریێن قۆناغا چارێك دوماهیێ بهێنه‌ كرن.

بابه‌تێن ب ڤێ مژارێ ڤه‌ گرێدای