هنده‌ك پێنگاڤێن سڤك بۆ ژیانه‌كا كنك

هنده‌ك پێنگاڤێن سڤك بۆ ژیانه‌كا كنك

وار – دهوك :

1
سابوونا ددانان بۆ پاكژكرنا لایتان
دگه‌ل وه‌ختى، نه‌دووره‌ جامێن لایتێن ترمبێلا ته‌ خوه‌لیكى ببن و ئه‌وێ ببینت دێ هزر كه‌ت ترمبێلا ته‌ گه‌له‌ك كه‌ڤنه‌. داكو جامێن لایتان نوو بكه‌یه‌ڤه‌، فتیلكه‌ك سابوونا ددانان بكڕه‌ و تێبده‌ و پاكژ بكه‌.. دێ جاما لایتان دیسا ته‌یسته‌ڤه‌.
بجه‌ڕبینه‌ تو چو نادۆڕینى!
2
گووز بۆ نووكرنا دارێ كه‌ڤن
چ ته‌ دارێ ناڤمالیا خوه‌ تێكدا بت یان كه‌ڤن ببت یان ژى ته‌ پشیكه‌ك هه‌بت په‌نجێن خوه‌ پێ بخورینت هه‌مى دیمه‌نێ دارى كرێت دكه‌ن. رێیه‌كا گه‌له‌ك ساده‌ هه‌یه‌ ته‌ هه‌وجه‌ى دارتراش و بێهنا سپیرتۆیێ ناكه‌ت، ئه‌و ژى هنده‌ك لبێن گووزانن. ئه‌وان لبێن گووزێ د كه‌لشته‌ و خورمچكێن دارى بده‌ و دێ ئه‌نجامێن ئه‌نتیكه‌ بینى.
بجه‌ڕبینه‌ دێ چ دۆڕینى!
3
ده‌زیێ ددانان بۆ كه‌رتكرنا كێكێ
هه‌كه‌ر تو بخوازى كێك یان په‌نیرى جوان و ئه‌ندازه‌یى كه‌ر بكه‌ى، تو دێ هه‌وجه‌ى ده‌زیێ ساده‌یێ ددانان بى. تو دشێى ب ده‌زى گرێ بده‌ى و هێل بشدینى یان ژ هه‌ردو ره‌خان بگرى و تێدا ببه‌ى خوارێ.
ئه‌ڤه‌ بۆ كێكێ گه‌له‌ك باشه‌ نه‌خاسمه‌ وه‌ختێ ب چه‌قۆیێ دكه‌ى یان پێڤه‌ دمینت یان خراب كه‌رت دبت. بجه‌ڕبینه‌ و ئه‌نجامان ببینه‌!
4
كلینس بۆ ته‌زاندنێ
هه‌كه‌ر ته‌ تشته‌كێ ڤه‌خوارنێ هه‌بت و ته‌ بڤێت زوو بته‌زینى یان ته‌ ژبیر كربت بكه‌یه‌ كونبه‌فرێ دا و دره‌نگ هاته‌ بیرا ته‌. رێیه‌كا له‌زگین بۆ ڤه‌خوارنه‌كا ته‌زین هه‌یه‌!
بتلێ شیشه‌ى ب كلینسه‌كا شل راپێچه‌ و بۆ دو خوله‌كان بكه‌ د فریزه‌رىدا.. تو باوه‌ر ناكه‌ى دێ چه‌ند ته‌زت! به‌س دو تشتان ژبیر نه‌كه‌؛ بتل شیشه‌ بت و بۆ ده‌مه‌كێ درێژ نه‌هێله‌ د فریزه‌رىدا نه‌خوه‌ نه‌دووره‌ بپه‌قت.
5
كه‌سێن نه‌دلخواز ژ وێنه‌ى ببه‌!
وه‌ختێ دچیه‌ وه‌غه‌ره‌كێ یان سه‌ره‌دانا جهه‌كێ بالكێش، هه‌رده‌م هنده‌ك خه‌لك ل وێنه‌ى ده‌ردكه‌ڤن ته‌ نه‌ڤێت تێدا بن. داكو تو ته‌نێ دگه‌ل تشتێن ئاكنج و خوه‌جهـ بمینى د وێنه‌ىدا، ئه‌ڤێ فێلێ بكار بینه‌:
كامیرا خوه‌ دانه‌ سه‌ر سێپێكێ و لسه‌ر گرتنا 15 وێنه‌یان د هه‌ر 10 چركان دا دانه‌. هه‌لبه‌ت پێدڤیه‌ كامیرا ته‌ ئه‌ڤ شیانه‌ تێدا هه‌بت. پاشى هه‌مى وێنه‌یان بكه‌ د فۆتۆشۆپێ دا و: (File >Scripts > Statistics) و پاشى median هه‌لبژێره‌. ئه‌ڤه‌ دێ هه‌مى جوداهیێن د ناڤبه‌را وێنه‌یان دا هاڤێژت و به‌س ته‌ و تشتێن نه‌لڤ هێلت.
كانێ ل هنده‌ك وارێن دى ژى مرۆڤى شیابایه‌ هۆ بكه‌ت!
6
ب په‌یداغێ ده‌نگى بلند بكه‌
هه‌كه‌ر ده‌نگێ ده‌رڤه‌یێ ته‌له‌فۆنا ته‌ كێم بت و ته‌ بڤێت گه‌له‌ك هه‌ڤال هاى ژ سترانه‌كێ یان تشته‌كێ دى ببن، ته‌له‌فۆنا خوه‌ بكه‌ د په‌رداغه‌كێ دا و باشتره‌ ده‌ر فره‌هـ بت وه‌كو كۆپێ سۆلۆ. كا بجه‌ڕبینه‌ و ئه‌نجامان ب گوهێ خوه‌ ببهیسه‌.
به‌س هوشیار بى هوشیار! ته‌له‌فۆنێ نه‌كه‌ى د په‌رداغا ئاڤێ دا، نه‌خوه‌ ده‌نگێ بلند دێ بچووكترین خه‌ما ته‌ بت.
7
ته‌له‌فۆن ل دۆخێ فڕینێFlight زووتر بار دبت
هه‌لبه‌ت مه‌ره‌م نه‌ ئه‌وه‌ بێژین ل باله‌فڕێ سوار به‌ دا زووتر پاتریا ته‌له‌فۆنا ته‌ بار ببت! به‌س هه‌كه‌ر تو ته‌له‌فۆنا خوه‌ دانیه‌ سه‌ر دۆخێ فڕینێ Flight دو جاران له‌زگینتر هێته‌ باركرن.
ئه‌ڤه‌ بۆ هینگێ باشه‌ وه‌ختێ تو لبه‌ر ده‌ركه‌ڤتنێ و ببینى پاتریا ته‌له‌فۆنێ به‌ره‌ڤ مرنێیه‌ یان خوه‌ ب ترمبێلێ دچیه‌ جهێ شۆلى، ته‌له‌فۆنێ دانه‌ سه‌ر Flight دێ گه‌له‌ك زوو هێته‌ باركرن. هه‌كه‌ر دێ ب من كه‌ى، وه‌ختێ سه‌رێ خوه‌ دشۆى تو هه‌ر ته‌له‌فۆنان به‌رسڤ ناده‌ى، دانه‌ سه‌ر ره‌وشا فڕینێ و تاكو سه‌رێ خوه‌ دشۆى پاتریا وێ دێ پڕ بت.
8
دێ چاوا پێلاڤێ فره‌هـ كه‌ى؟
هه‌كه‌ر ته‌ پێلاڤه‌كا ته‌نگ هه‌بت، چ نوو كڕى بت یان كه‌ڤن بت، تو دشێى ب ئه‌ڤێ رێكێ پێلاڤا خوه‌ فره‌هـ و خوه‌ش بكه‌ى: گۆره‌یه‌كا ستوور یان هنده‌ك گۆره‌یان لسه‌رێك بكه‌ پێ خوه‌ و بكه‌ د پێلاڤێ دا. هه‌لبه‌ت دێ پێلاڤ گه‌له‌ك ته‌نگتر بت، به‌س بێهنا خوه‌ فره‌هـ بكه‌. نهۆ ته‌ زانى‌ پێلاڤ ل كیده‌رێ ته‌نگه‌. فیڕه‌كێ بینه‌ و بۆ هنده‌ك خوله‌كان بایێ گه‌رم ل جهێن ته‌نگ بكه‌. جاره‌كا دى پێلاڤێ بجه‌ڕبینه‌، هه‌كه‌ر هێشتا ته‌نگ بت، هه‌مان كارى دوباره‌ و سێباره‌ بكه‌، تاكو پێلاڤ دهێته‌ قه‌یدا ته‌.
9
ب سانه‌هیترین رێكا پاكژكرنێ
چ تو ته‌نێ بى یان خێزاندار بى، پاكژكرنا رفاتكێن كه‌نتۆر و كونبه‌فر و هه‌ر تشته‌كێ دى، شۆله‌كێ نه‌خوه‌ش و به‌رده‌وامه‌. داكو گه‌له‌ك سه‌رێ خوه‌ نه‌ئێشینى و پاكژكرنا رفاتكان نه‌ بته‌ خه‌مه‌كا رۆژانه‌.. ئه‌ڤێ رێكا ب سانه‌هى و كێم-خه‌رجى بكار بینه‌.
بالۆلكێن نایلۆنێ پێچانا زادى ل هه‌مى دكان و ماركێتان هه‌نه‌. نایلۆنێ دانا سه‌ر رفاتكان و پاتكا خوه‌ بده‌ پاقژكرنێ. هه‌روه‌ختێ پیس بوون، ژێ ڤه‌كه‌ و قاته‌كێ دى لسه‌ر دانه‌.
رفاتكه‌كا هه‌رده‌م پاقژ، ب كێمترین ره‌نج و دراڤى.

بابه‌تێن ب ڤێ مژارێ ڤه‌ گرێدای