هاڤین ئانكو سۆتنا ترۆمبێلان و خه‌ندقینا سنێلان

عیماد ئالیخان

دگه‌ل هاتنا وه‌رزێ هاڤینێ و بلندبوونا پلێن گه‌رمێ و تایبه‌ت د ڤان سالێن داویێ دا كو زۆر بلند بووینه‌ و كاره‌سات و روودانێن گیانی و مادی د دووڤ خوه‌دا ئینایه‌ و بوویه‌ ئه‌گه‌رێ په‌یدابوونا گه‌له‌ك روودانێن ئاگربه‌ربوونێ، تایبه‌ت یێن ترۆمبێل و كوگه‌هـ و…. هتد. یا ئاشكه‌را و خویایه‌ كو زۆربه‌یا خه‌لكی و تایبه‌ت گه‌نج و سنێله‌ ژ بو كو خوه‌ ژ گه‌رما هاڤینێ رزگاربكه‌ن و پارێزن، قه‌ستا جهێن گه‌شت و گوزاری و سه‌ر ریباران دكه‌ن ژبو بوراندنا ده‌مێن خوش ومه‌له‌ڤانیا، لێ گه‌له‌ك جاران ئه‌و خوشی یه‌ دبیته‌ نه‌خوشی و روودانێن خه‌ندقینێ په‌یدا دبن، ئه‌م رۆژانه‌ ئه‌ڤان روودانان د ده‌زگه‌هێن راگه‌هاندنێ و سوشیال میدیایێ دا دبینین و ئه‌گه‌رێ خه‌ندقینا گه‌نج و سنێلان ژی بو گه‌له‌ك خالان دزڤریت بو نموونه‌: نه‌ شاره‌زایی و نه‌زانینا مه‌له‌ڤانیا و گه‌له‌ك ئه‌گه‌رێن دی، لێ یا فه‌ره‌ ل ده‌ستپێكێ رێ و نیشانێن خوپاراستن و دوورخستن ونه‌ مه‌له‌ڤانیێ ل وان جهان بهێنه‌ دانان یێن كو مه‌ترسیدار و قه‌ده‌غه‌یا مه‌له‌ڤانیێ لێ هه‌ی، و هه‌ر كه‌سێ پێگێریێ ب رێنمایان نه‌كه‌ت بهێته‌ سزادان، داكو گیانێ وه‌لاتیان و تایبه‌ت سنێلان د پاراستی بن و دووری مه‌ترسی و خه‌ندقینێ بن. دیسان وه‌رزێ هاڤینێ بوویه‌ وه‌رزێ سوتنا ترۆمبێلان و بوویه‌ دیارده‌كا رۆژانه‌ د ناڤا باشورێ كوردستانێ دا دهێته‌ دیتن، هه‌روه‌سا ئه‌ڤ روودانه‌ بووینه‌ مه‌ترسی ل سه‌ر گیانێ مرۆڤان و ژینگه‌هێ ب گشتی و رۆژ ب رۆژ د زێده‌بوونێ دایه‌، لێ تا نها چ ئه‌گه‌رێن دروست و باوه‌رپێكری یێن ئاگربه‌ربوونا ترۆمبێلان نه‌هاتینه‌ دیاركرن، كو ب دروستی بزانین ئه‌گه‌رێن سۆتنێ ژبه‌ر كوالێتیا لاوازه یا‌ پانزینێ یه‌، یان ژی به‌رزبوونا پلا گه‌رمێ یه‌! لێ ئه‌گه‌ر ئه‌ڤ هه‌ردو خاله‌ (لاوازیا كوالێتیا پانزینێ و پلا گه‌رمێ) بن یێن په‌یدابوونا ئاگربه‌ربوونێ، بۆچی ل ناڤه‌راست و باشورێ عیراقێ ئه‌ڤ روودانێن ئاگربه‌ربوونێ و تایبه‌ت ترۆمبێلان كێمتر دهێنه‌ روودان ژ باشورێ كوردستانێ؟ سه‌ره‌رای هندێ كو پله‌یا گه‌رمێ جیاوازیه‌كا به‌رچاڤ و به‌رزتر هه‌یه‌ دگه‌ل باشورێ كوردستانێ؟ یا فه‌ره‌ جهێن شوله‌ژێ و تایبه‌ت رێڤه‌به‌ریێن سوتومه‌نییان ل هه‌ر پارێزگه‌هه‌كێ و هه‌ر جهه‌كی به‌ری كو ئه‌ڤ روودانه‌ زێده‌تر لێبهێن و ببنه‌ ئه‌گه‌رێ ژ ده‌ستدانا هاولاتی و شوفێران كو یا بوویه‌ دیارده‌ و رۆژانه‌ ب كێمی دو تا سێ ژ دیمه‌نێن ئه‌ڤی جورێ روودانێن دلته‌زین دبینین، ب جدی دیڤچوونێ ل سه‌ر ڤێ بابه‌تی بكه‌ن و ئه‌گه‌رێن راست و دروست یێن ڤان روودانێن هه‌ر ئاگربه‌ربوونه‌كێ بهێنه‌ ئاشكه‌راكرن، كا كی یه‌ ئه‌گه‌رێ سه‌ره‌كی یێ په‌یدابوونا ڤان روودانان ئایا شوفێر و هاولاتی دكێمتر خه‌من یان جهێن شوله‌ژێ خه‌مێ و دیڤچوونێ ناكه‌ن؟ داكو شوفێر و هاولاتی ژی به‌رهه‌ڤی و پاراستنا خوه‌ ژ ڤان روودانان بكه‌ن، و كه‌سێن كێمتر خه‌م ب توندی ىهێنه‌ سزادان، ژ به‌ركو ژیانا وه‌لاتیان و ژینگه‌هێ ب گشتی د ستویێ وان دایه‌، هه‌روه‌سان به‌ری سوته‌مه‌نی ده‌ربازی سنورێ هه‌رێمێ ببیت بهێته‌ پشكنین كرن ژلایێ كوالێتی ڤه‌، نه‌كو ل كوگه‌هێن هه‌ر پانزینخانه‌كێ لیژنێن دیڤچوونێ ژنوو پشكنینێن خوه‌ ئه‌نجام بده‌ن.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.