نێچیرڤان بارزانی و جێگرێ وه‌زیرێ ده‌رڤه‌یێ توركیا كۆم بوون

نێچیرڤان بارزانی و جێگرێ وه‌زیرێ ده‌رڤه‌یێ توركیا كۆم بوون

WAAR-دهۆك:

سه‌رۆكێ وه‌زیرێن هه‌رێما كوردستانێ ئه‌ڤرۆ دگه‌ل جێگرێ وه‌زیرێ ده‌رڤه‌یێ توركیا كۆم بوو و راگه‌هاند؛ هه‌رێما كوردستانێ په‌یوندیێن باش دگه‌ل وه‌لاتێن جیران دخوازیت.
نێچیرڤان بارزانی ئه‌ڤرۆ پێشوازی ل سیداد ئونال جێگرێ وه‌زیرێ ده‌رڤه‌ یێ توركیا و شاندا د گه‌ل دا كر، په‌یوه‌ندیێن دوقۆلی، ره‌وشا ده‌ڤه‌رێ و پێكئینانا كابینه‌یا نه‌هێ یا حكومه‌تا هه‌رێمێ هاتن گۆتوبێژ كرن.
شاندێ مێهڤان پیرۆزباهی ل نێچیرڤان بارزانی ژبۆ به‌ربژاركرنێ بۆ پۆستێ سه‌رۆكاتییا هه‌رێمێ كر، خواست ژی كابینه‌یا حكومه‌تێ زوو بهێت پێكئینان، هه‌روه‌ها به‌رهه‌ڤییا پێشدابرنا په‌یوه‌ندیێن ئه‌نقه‌ره‌ و هه‌ولێرێ د هه‌موو واره‌كی دا دیاركر، تایبه‌ت د وارێن ئابۆری و بازرگانی دا.
ژ ئالیێ خوه‌ڤه‌ نێچیرڤان بارزانی راگه‌هاند؛ هه‌رێما كوردستانێ هه‌رده‌م دخوازیت په‌یوه‌ندیێن باش دگه‌ل وه‌لاتێن جیران هه‌بن، تایبه‌ت توركیا كو د رۆژێن دژوار دا هاریكارییا هه‌رێما كوردستانێ كرییه‌، به‌رهه‌ڤییا هه‌رێمێ ژی بۆ پێشدابرنا په‌یوه‌ندییان نیشان دا.
سه‌رۆكوه‌زیرێ هه‌رێمێ به‌حسا په‌یوه‌ندیێن هه‌ولێر و به‌غدایێ ژی كر كو ل ڤێ داویێ دگه‌ل عادل عه‌بدولمه‌هدی سه‌رۆكوه‌زیرێ ئیراقێ بزاڤێن چاره‌كرنا وان ده‌ست پێ كرینه‌.
گۆتوبێژا ره‌وشا سیاسییا ده‌ڤه‌رێ ب گشتی و چه‌ندین بابه‌تێن دی یێن گرێدای هه‌رێما كوردستانێ و توركیا ته‌وه‌ره‌كێ دی یێ هه‌ڤدیتنا نێچیرڤان بارزانی و جێگرێ وه‌زیرێ ده‌رڤه ‌یێ توركیا بوون.

بابه‌تێن ب ڤێ مژارێ ڤه‌ گرێدای