نۆر سه‌برى پایته‌خت ژ ناسناڤی بێ باركر

نۆر سه‌برى پایته‌خت  ژ ناسناڤی بێ باركر

وار – دهۆک :

تیما یانه‌یا نه‌فت ئه‌لوه‌ست ب سه‌ركێشییا ستێر و گۆلچیێ وێ نۆر سه‌برى ئه‌وێ بوویه‌ رێگر به‌رامبه‌ر هێرش و لێدانێن په‌نه‌رتیێن یاریكه‌رێن یانه‌یا جه‌وییه‌، د دیرۆكا خۆدا بۆ جارا ئێكێ بناسناڤێ خولا ئیراقێ یا ته‌پاپێى ل وه‌رزێ (2014-2015) هاته‌ خه‌لاتكرن پشتى سه‌ركه‌ڤتنه‌كا ژ هه‌ژى لسه‌ر یانه‌یا جه‌وییه‌ ئیناى ب لێدانێن په‌نه‌رتییان (6-5) گۆلان و پشتى ده‌مێ دروست و زێده‌كرى بێى گۆل ب دوماهیك هاتى، د یاریكرنا واندا ئه‌وا شه‌ڤا بۆرى ل یاریگه‌ها شه‌عب ل باژێرێ به‌غدا هاتیه‌ كرن.
یانه‌یا نه‌فت ئه‌لوه‌ست ئه‌وا ب سه‌ر پارێزگه‌ها نه‌جه‌فێ ڤه‌ دبیته‌ یانه‌یا پێنجێ ژ ده‌رڤه‌ى پایته‌ختێ ئیراقێ ناسناڤێ دبیه‌ت، پشتى یانه‌یێن دهۆك و هه‌ولێر و سه‌لاحه‌دین و میناء.
یانه‌یا جه‌وییه‌ د ماوه‌یێ 10 سالێن بۆریدا و هه‌ر ژ وه‌رزێ (2005-2006) تاكو نۆكه‌ نه‌شیایه‌ ناسناڤى بده‌ستخۆڤه‌ بینیت.
تێزانین زه‌ورا لرێزا ئێكێ دهێت ب 12 ناسناڤان و جه‌وییه‌ لرێزا دووێ ب شه‌ش ناسناڤان و ته‌له‌به‌ لرێزا سێیێ پێنج جاران بریه‌ و هه‌ر ئێك ژ یانه‌یێن هه‌ولێر و شورته‌ چار جاران هاتینه‌ خه‌لاتكرن و یانه‌یا ره‌شید ئه‌وا هاتیه‌ هه‌لوه‌شاندن سێ ناسناڤ برینه‌ و هه‌ر ئێك ژ یانه‌یێن دهۆك و نه‌فت ئه‌لوه‌ست و سه‌لاحه‌دین و جه‌یش و مینا جاره‌كێ بناسناڤى هاتینه‌ خه‌لاتكرن.
هه‌ژی دیاركرنێ یه‌ كو یانه‌یا نه‌فت ئه‌لوه‌ست ل وه‌رزێ بۆرى ده‌ربازبوویه‌ خولا پلا نایاب و د ئێكه‌م پشكدارییا خۆدا ئێكه‌م ناسناڤ تۆماركر.

بابه‌تێن ب ڤێ مژارێ ڤه‌ گرێدای