نيشانێن خيزانه‌كا پڕى به‌خته‌وه‌رى و سه‌ركه‌ڤتن

نيشانێن خيزانه‌كا پڕى به‌خته‌وه‌رى و سه‌ركه‌ڤتن

وار – دهۆک :

سادده‌ترین و جوانترین جۆرێن خێزانێ ئه‌وه‌ کو ب تنێ مرن ڤان ژێكجودا بكه‌ت و مالا وان ژناڤببه‌ت، چو تشته‌ك ژ كێشه‌ و نه‌خوه‌شیێن ژیانێ كارتێكرنێ ل وان ناكه‌ت و خوه‌راگرن ل همبه‌رى هه‌موو ئه‌و كێشه‌ و نه‌خوه‌شیێن دكه‌ڤنه‌ د ناڤبه‌را وان دا، چو كارتێكرنێ ل خوه‌شبه‌ختى و به‌خته‌وه‌رییا ژیانا وان ناكه‌ت.
هه‌ر چاوا بیت خێزانا خوه‌شبه‌خت هنده‌ك نیشانێن خوه‌ هه‌نه‌ كو ب كورتى د 20 خالان دا هاتینه‌ رێزكرن، ئه‌و ژى ئه‌ڤ خالێن ل خوارێنه‌:
1ــ د ناڤ خێزانه‌كا خوه‌شبه‌خت دا رسته‌یا (من شوله‌ پێیه‌، یان ته‌ شوله‌ پێیه‌) هه‌بوون نینه‌، هه‌موو تشتێن ئێكدو ب گوفتوگۆیه‌كا شرین باسدكه‌ن و خوه‌ به‌رپرسیار دزانن ل همبه‌رى هه‌موو ئه‌و تشتێن كو بۆ به‌رانبه‌رى وان دهێنه‌ پێش.
2ــ هه‌ر ئێك ژ وان باوه‌رى ب ئالیێ به‌رانبه‌رى خوه‌ هه‌یه‌، ژبه‌ركو ئه‌و باوه‌ریێ ب تشته‌كێ سادده‌ نزانن، به‌لكو ب سه‌ركه‌ڤتن د ژیانێ دا دزانن.
3ــ هندى بشێن دلێن ئێكدو رادگرن و د هه‌موو كاران دا راوێژێ ب ئێكدو دكه‌ن و ب هه‌ماهه‌نگى و هه‌ڤهزرى و هه‌ڤالینى و دانوستاندنێ د گه‌ل ئێكدو دا كارێن خوه‌ دكه‌ن.
4ــ وان باوه‌رى ب ئێكدو هه‌یه‌ و هه‌موو کێشه‌یێن خوه‌ گوفتوگۆکرن و لێكتێگه‌هشتنێ ب دووماهى دئینن و هه‌كه‌ر ئێك ژ وان تۆڕه‌بوو، ئالیێ به‌رانبه‌ر ب ئارامى بزاڤێ دكه‌ت، تێبگه‌هینیت، نه‌كو ب شه‌ڕ و تۆڕه‌بوون و ده‌نگ بلندكرنێ.
5ــ ب سه‌لیقه‌ و هزر و بۆچۆن و حه‌ز و ئاره‌زۆیێن ئێكدو هه‌موو كاران دكه‌ن.
6ــ هه‌ر تشته‌کى ب حه‌زا خوه‌ ناكه‌ن، به‌لكو هزر ل ره‌فتار و تایبه‌تمه‌ندیێن به‌رانبه‌رى خوه‌ ژى دكه‌ن.
7ــ چو جاران سینۆران نابه‌زینن د تشتێن تایبه‌تێن ئێكدو دا.
8ــ نیگه‌رانی سلامه‌تییا ده‌روون و له‌شێ ئێكدونه‌ و ب بچووكترین ئازارێن ئێكدو نه‌ئارامن و بزاڤێ دكه‌ن ب زووترین ده‌م ئالیێ به‌رانبه‌رى وان باش بیت.
9ــ چو جاران ل شوونا بیرهاتن و رۆژێن خوه‌ یێن خوه‌ش، هزر ل رۆژێن خوه‌ یێن نه‌خوه‌ش ناكه‌ن و هزر ل وان ده‌مان ناكه‌ن كو پێكڤه‌ تووشى كێشه‌ و نه‌خوه‌شییان بووین.
10ــ رێزێ ل هه‌ڤال و كه‌سوكارێن ئێكدو دگرن و گرنگیێ ب وان دده‌ن.
11ــ هایدارى پاره‌یێن ئێكدونه‌ و هیچ كه‌سه‌ك ژ وان پاره‌یێن خوه‌ ژ ئالیێ به‌رانبه‌ر ڤه‌ناشێریت و كارێن نهێنى ناكه‌ن.
12ــ هه‌رده‌م هزر ل راوبۆچۆنێن ئێكدو دكه‌ن و هیچ ئێك ژ وان ب حه‌ز و ئاره‌زۆیا خوه‌ ب تنێ بڕیارێ لسه‌ر چو تشتان ناده‌ت و نابێژیت ئه‌وا من گۆتى؛ دڤێت ئه‌و بیت.
13ــ سینۆرێن خوه‌ د هه‌موو تشتان دا دزانن و دزانن ژ سینۆرده‌رچۆن كارێ وان نینه‌ و تشته‌كێ نه‌ هه‌ژى وانه‌.
14ــ هه‌رده‌م ب ئارامى و نه‌ئارامییا ئێكدو دكه‌ن و حه‌ز ب بێتاقه‌تییا ئێكدو ناكه‌ن.
15ــ په‌یوه‌ندییا ئه‌شق و سۆز و ڤیانا ئێكدو چو جاران ل بیرا خوه‌ نابه‌ن و هه‌رده‌م ب سۆز ڤه‌ بۆ ئێكدو دئاخڤن.
16ــ چاڤه‌رێیا چو كاره‌كێ نه‌دروست ژ ئێكدو ناكه‌ن.
17ــ هه‌كه‌ر كێشه‌یه‌كا وان بوو ب پێشهات، وێ كێشه‌یێ ب تاوانا كه‌سێ به‌رانبه‌ر دانانن، به‌لكو هزر د وێ ئێكێ دا دكه‌ن كو رێچاره‌یه‌كا گونجاى بۆ په‌یدابكه‌ن.
18ــ هه‌رده‌م ب دووڤ ئارامى و خوه‌شییان دا دگه‌ڕن بۆ ئالیێ به‌رانبه‌رى خوه‌، و چو جاران ناخوازن نه‌خوه‌شیێ بۆ ئێكدو چێبكه‌ن.
19ــ دڤێت ژن و مێر لسه‌ر خاترا ئێكدو پێكڤه‌ بژین، نه‌كو ژبه‌ر خاترا ژیانێ یان زاڕۆیان یان ژى خه‌لكى.
20 ــ دڤێت ژن و میر ڕۆژ لدووڤ ڕۆژا ژیانا خوه‌ دا، پتر ل ئێكدو نێزیك ببن و پتر حه‌زژ ئێكدو بكه‌ن، نه‌كو ڕۆژ ب ڕۆژێ ژ ئێكدو بێزاربن و كه‌ربێن وان ژ ئێكدو ڤه‌به‌ن.

بابه‌تێن ب ڤێ مژارێ ڤه‌ گرێدای