مه‌سروور بارزانی: پێدڤییه‌ به‌رژوه‌ند بهێنه‌ پشتگۆهاڤێتن داكو ده‌ستكه‌فتێن پتر ده‌ستڤه‌ بهێن

مه‌سروور بارزانی: پێدڤییه‌ به‌رژوه‌ند بهێنه‌ پشتگۆهاڤێتن داكو ده‌ستكه‌فتێن پتر ده‌ستڤه‌ بهێن

WAAR-دهۆك:

راوێژكارێ جڤاتا ئاساییشا هه‌رێما كوردستانێ ب هه‌لكه‌فتا جه‌ژنا نه‌ته‌وه‌یی یا نه‌ورۆزێ په‌یامه‌ك به‌لاڤكر و داخوازكر هه‌موو ئالی به‌رژه‌وه‌ندێن لاوه‌كی پشتگۆهـ بهاڤێژن و پویته‌ی ب ده‌ستكه‌فتان بده‌ن.
مه‌سروور بارزانی د په‌یاما خوه‌ یا هه‌لكه‌فتا جه‌ژنا نه‌ورۆزێ و سه‌رێ سالا كوردی دا گه‌رمترین پیرۆزباهی ئاراسته‌ی خێزانێن سه‌ربلندێن شه‌هیدان و پێشمه‌رگه‌ی قاره‌مان و هه‌می گه‌لێ كوردستانێ كرن، داخواز كر ساخكرنا ڤان بیره‌وه‌رییان د چارچووڤه‌یێ خواندنا په‌یام و پیرۆزباهییان ده‌ربچن، ژ به‌ركو ئه‌ڤ بیره‌وه‌ریێن دیرۆكی گرنگییا خوه‌ لنك نڤشێ نوو ژ ده‌ست د ده‌ن.
دا زانین ژی: بیره‌وه‌ریێن نشتیمانی و نه‌ته‌وه‌یی كو نه‌ورۆز ئێكه‌ ژ وان، فاكته‌ره‌كێ كاریگه‌رێن پرۆسه‌یا ئاڤه‌دانكرنا نشتیمان و نه‌ته‌وه‌یینه‌ و پێدڤییه‌ هێمایێن نشتیمانی ببنه‌ فاكته‌رێ بهێزكرنا هه‌ستێن نشتیمانپه‌روه‌ری ژ بۆ كو د خزمه‌تا نشتیمانی دا هه‌ڤبگرن و بزاڤان بۆ پاشه‌رۆژه‌كا گه‌ش و پێشكه‌فتی بكه‌ن.
راوێژكارێ جڤاتا ئاساییشا هه‌رێما كوردستانێ د په‌یاما خوه‌ دا زێده‌تر ئاشكه‌را كر: دلسۆزییا نشتیمانی پێدڤییه‌ د كریاران دا ره‌نگڤه‌دان هه‌بیت، د پرۆسه‌یا پێكئینانا كابینه‌یا نوو یا حكومه‌تا هه‌رێمێ هه‌موئالی كێشه‌ و به‌رژوه‌ندێن خوه‌ پشتگۆهـ بهاڤێژن داكو ده‌ستكه‌فتێن پتر ب ده‌ستڤه‌ بهێن و شاشی بهێنه‌ راستڤه‌كرن، خزمه‌ته‌كا ژ هه‌ژی بۆ گه‌ل و نشتیمانی بهێته‌كرن.

بابه‌تێن ب ڤێ مژارێ ڤه‌ گرێدای