ئیحسان ئامێدی
پیتڤی ئه‌و هه‌وجه‌یا فه‌ر دكه‌ت ئه‌و كار بهێته‌كرن خۆ بنه‌چاری ژی بیت، وه‌كو دبێژن پێتڤی رێ دده‌ت ئه‌و كارێن نه رێ ژی بهێنه كرن و لدووڤ گرنگیا وێ دهێته كێشان و پیڤان! ئه‌ڤجا ئه‌گه‌ر ئه‌و پیتڤی یا فه‌ر بیت و ره‌وا ژی بیت یا ئاسایه و ره‌وایه بهێته‌كرن و ده‌مێ پێتڤی یا نه‌ته‌وه‌یی بیت قه‌بارێ وێ مه‌زنتر لێ دهێت و گرنگیا وێ پتر لێ دهێت.. به‌لێ به‌رژه‌وه‌ندا گشتی یانی به‌رژه‌وه‌ندا هه‌میا ژ نڤشی نوكه و یی داهاتی ل وه‌لاتی دا و ئه‌و وێنه‌یه یی كو جڤاك وه‌كو كوم خۆ نیشا دده‌ت و ده‌ربڕین ژ ئه‌ندامێن خۆ وه‌كو تاك دكه‌ت داكو بشێت دادیێ و پێشڤه‌چونێ و سه‌قامگیریا جڤاكی بجهبینیت و ئه‌ڤه ب یاسایێ دهێته رێكخستن چونكی یاسا ئه‌و بنه‌ما و رێسایێن گشتی یێن كارپێكرنێ نه و د پێگیرن بۆ هه‌میان د جڤاكی دا و ده‌ستنیشانا سنورێ په‌یوه‌ندیا و مافان دكه‌ت دناڤبه‌را مرۆڤان و دامه‌زراوان دا و ئارمانج ژێ بجهئینانا به‌رژه‌وه‌ندا گشتی یه د جڤاكی دا داكو بشێت دادیێ و وه‌رارێ و سه‌قامگیریێ د وه‌لاتی دا جێگیركه‌ت و ژ خاسیه‌تێن یاسایان بنگه‌هه‌كێ گشتی یێ روته ژ تایبه‌تمه‌ندیا و لسه‌ر هه‌می ئه‌ندامێن جڤاكی بێی جوداهی دهێته بجهئینان هه‌روه‌كو ده‌رئینانا یاسایا بخۆ ژی پیتڤیه‌كه ژبو بجهئینانا به‌رژه‌وه‌ندیا گشتی. واته قانوون ل گوره‌ی پیتڤیی و به‌رژه‌وه‌ندا گشتی دهێنه ده‌رئینان و راستڤه‌كرن.
قانوون ل گوره‌ی پیدڤیی و به‌رژه‌وه‌ندییا گشتی دهێنه ده‌رئینان و راستڤه‌كرن
ئه‌ڤه ماوه‌یه‌كه خه‌لكێ هه‌رێما كوردستانێ سه‌ره‌رای كۆما كێشه و گرفت و قه‌یرانێن سیاسی و له‌شكری و دارایی و ئابۆری و ئاواره‌یان و كوچبه‌ریێ كه‌ڤتیه د گێژه‌ڤانكا پرسا سه‌رۆكاتیا هه‌رێما كوردستانێ دا،كو لایه‌نێن سیاسیێن بالاده‌ست خولقاندی یه پێناڤی به‌رژه‌وه‌ندیێن حزبی و كه‌ساتی یێن به‌رته‌نگ!،ئه‌و بخو ژی پرسه‌كا نه‌ته‌وه‌یی و نشتیمانیا پێتڤییه و به‌رژه‌وه‌ندا ته‌ڤایییه.
وه‌كو جێگیر هه‌رێما كوردستانێ سیسته‌مێ دیمۆكراتیێ په‌یره‌وكریه و دامه‌زراوه‌یێن حوكمرانیێ ل گوره‌ی قانوونێ دامه‌زراندینه و تاراده‌یه‌كێ باش كارپێهاتیه كرن و بجهاتینه،نها كو ماوه‌یێ یاساییێ سه‌رۆكێ هه‌رێما كوردستانێ بدووماهی هاتیه گه‌له‌ك سروشتیه ڤه‌گه‌رنه یاسایا سه‌رۆكاتیا هه‌رێما كوردستانێ و راستڤه‌كرنێن وێ و گوره‌ی یاسایی هه‌لبژارتنێن نوو بهێنه‌كرنڤه بۆ هه‌لبژارتنا سه‌رۆكێ هه‌رێمێ هه‌روه‌كو گه‌له‌كا سروشتی په‌ڕله‌مانێ كوردستانێ پێداچۆنێ د یاسایا سه‌رۆكاتیا هه‌رێما كوردستانێ دا بكه‌ت و راستڤه‌كرنێن پێتڤی بۆ بكه‌ت لدیڤ پێتڤیا و به‌رژه‌وه‌ندا ته‌ڤایی، به‌لێ مخابن ژ ئه‌نجامێ مه‌ره‌مێن نه پاقژ نه هیلان چ ژوانان بهێنه‌كرن،نه سه‌رۆك بهێته هه‌لبژارتن و نه یاسایا سه‌رۆكاتیا هه‌رێما كوردستانێ بهێته راستڤه‌كرن، به‌لكو د ده‌مه‌ك و كاودانه‌كێ نه گونجای دا پروژێن نه‌دجهدا نیشادان و پێشكێشكرن، بویه هویێ پتر ئالوزبونا ره‌وشا نافخویا هه‌رێمی و زیده‌بونا ناكوكیا و ململانا سیاسی و ره‌نگڤه‌دانه‌كا نیگه‌تیڤ كریه سه‌ر هه‌می بوارێن ژیانێ ل كوردستانێ.
نۆكه سه‌رۆك مسعود بارزانی ده‌ربڕینێ ژ پیدڤیا نه‌ته‌وه‌یی و به‌رژه‌وه‌ندییا نشتیمانی دكه‌ت له‌وا زۆرا پێیڤیه دڤێ قوناغێ دا درێژیێ بده‌ته به‌رپسیارییا خۆ
چ پێنه‌ڤێت هه‌رێما كوردستانێ خۆ لبه‌ر ڤی بارودۆخێ ئالۆز و پری قه‌یران و مه‌ترسی ناگریت له‌وا ژ هێزێن سیاسی یێن سه‌ره‌كی دهێته خواستن هه‌ست ب به‌رپسیاریا خۆ یا نه‌ته‌وه‌یی و نیشتیمانی بكه‌ن و هه‌ر زوو هه‌می ناكوكی و دوبه‌ره‌كیێن خۆ ڤه‌ده‌ن ره‌خی و لوژیكێ هۆشی و ژیری بكاربینن بۆ هندێ هه‌ر چ زووتر و بله‌زتر بگه‌هنه ریكه‌ڤتنه‌كێ و ل گوره‌ی پیتڤی و به‌رژه‌وه‌ندا گشتی یاسایا سه‌رۆكاتیا هه‌ریما كوردستانێ راستڤه‌كه‌ن و نه‌هێلن بۆشایه‌كا قانوونى و سیاسی ل هه‌رێمێ دروست بیت،وه‌كو دبێژن هه‌ر ده‌مێ پیتڤی و به‌رژه‌وه‌ندا گشتی و نشتیمانی په‌یدابون دڤێت كار بۆ بجهئینانا وێ بهێته‌كرن و زه‌مینێن گونجای بۆ بهێنه خوشكرن و قانوونێن تایبه‌ت بۆ بهێنه ده‌رئینان و راستڤه‌كرن.
نوكه سه‌رۆك مسعود بارزانی ده‌ربرینێ ژ پیتڤیا نه‌ته‌وه‌یی و به‌رژه‌وه‌ندا نشتیمانی دكه‌ت له‌وا زورا پێتڤیه دڤێ قوناغێ دا درێژیێ بده‌ته به‌رپسیاریا خۆ یا قانوونى و سیاسی و یا بساناهی نینه دڤی كاودانی دا كه‌سانه‌كێ دیتر بشێت و بوێریت وێ پۆسته‌ی وه‌رگریت و پربكه‌ت و وێ به‌رپسیاریێ بریڤه‌ببه‌ت و قه‌بخازیا هه‌می قه‌یران و ركه‌به‌ریا ببیت!،ئانكو ئه‌م دشێین بیژین ئه‌ڤرۆكه ملله‌ت و هه‌رێما كوردستانێ پیتڤی ب مانه‌ڤه‌یا سه‌رۆك بارزانینه د وی پوسته‌ی دا،له‌وا دهێته خاستن ملله‌ت و دامه‌زراویێن وێ یێن سیاسی وێ داخازێ ژێ بكه‌ن و وێ زه‌مینا یاسایی و سیاسی ژبۆ خوشكه‌ن داكو ئه‌و به‌رپسیاری بسه‌ركه‌ڤتیانه بریڤه بچیت.
هه‌لبه‌ت ئه‌وا پیتڤی و دبه‌رژه‌وه‌ندا دڤی بارودوخی دا مانه‌ڤه‌یا سه‌رۆك مسعود بارزانی یه وه‌كو سه‌رۆكێ هه‌رێما كوردستانێ، چونكی هه‌رێما كوردستانێ دڤی كاودانی دا پێتڤی سه‌رۆكه‌ك بهێزه،سه‌رۆكه‌ك كو سه‌نگ و گرانیا خۆیا سیاسی و جڤاكی و له‌شكه‌ری و ئابوری و نیڤده‌وله‌تی یا بهێز هه‌بیت و سه‌ربۆره‌كا خه‌باتگێریا ده‌وله‌مه‌ند هه‌بیت و شیانێن هوشی و ژیری و جه‌سه‌د‌ی هه‌بن و جهێ رازیبونا پتریا جه‌ماوه‌ری بیت و خۆیا كربیت كو هیمایێ هه‌ڤگرتن و ئیكرێزیا ملله‌تێ كوردستانێ یه هه‌روه‌كو پێشمه‌رگه و سه‌ركرده‌یێ له‌شكه‌ریێ لێهاتی بیت و دلسوز و خه‌مخورێ هیڤی وئارمانجێن ملله‌تی یی بێ ركابه‌ر بیت، و دوست و هه‌ڤالێ كومه‌كا سه‌رۆكێن وه‌لات و ناڤه‌ندێن نێڤده‌وله‌تی یێن جیهانی بیت و شیابیت دوزا كوردستانێ پتر بده‌ته نیاسین و پێشڤه‌ببه‌ت، و ئه‌ڤروكه تنێ سه‌رۆك بارزانی ئه‌و پێگه‌یه ب وی سه‌نگی و ب وان ئیعتیباراتا هه‌یه له‌وا مانه‌ڤه‌یا سه‌رۆك بارزانی ل وی پۆسته‌ی پیتڤیه‌كا نه‌ته‌وه‌یی ونشتیمانیا ڤی قوناغێ یه.
