ل سنە.. ژنێن تووشبووى ب ماددەیێن بێهۆشكەر لسه‌ر جادده‌یان دژین

ل سنە.. ژنێن تووشبووى  ب ماددەیێن بێهۆشكەر لسه‌ر جادده‌یان دژین

وار – دهۆک :

ل رۆژهەلاتا کوردستانێ رێژەیا تووشبوویان ب ماددەیێن بێهۆشكەر د ناڤ ژنان د زێده‌بوونێ دایه‌، ب تنێ ل باژاڕێ سنه‌ نێزیكى 40 ژنێن تووشبووى ب مادده‌یێن بێهۆشكه‌ر جهێن ڤه‌حه‌واندنێ نینن و لسه‌ر جادده‌یان دژین.
د راپۆرته‌کا کەمپینا نەهێلان و بنبڕکرنا تووشبوونا ژنان ب مادده‌یێن بێهۆشكەر (ناجی) دا هاتییە، د هه‌یاما ئێك سالا بۆرى دا هه‌تا نوكه‌ 46 ژن ب مه‌ره‌ما ده‌ستبه‌ردان ژ مادده‌یێن بێهۆشكه‌ر روو ل ڤى ناڤه‌ندێ كرییه‌ و لژێر چاڤدێرییا نۆشداران دانه‌.
د وێ راپۆرتێ دا هاتییه‌ كو هه‌یاما چاره‌سه‌ركرنا وان تووشبوویان 21 رۆژه‌ و ژ وێ هه‌ژمارا كه‌سان كو سه‌ره‌دانا وێ كه‌مپینێ كرى، 7 كه‌سان پشتى سێ خولێن درێژكرى ب تمامى ده‌ست ژ مادده‌یێن بێهۆشكه‌ر به‌ردایه‌ و ساخله‌مییا تمام ب ده‌ست ڤه‌ ئیناینه‌.
ل سنه‌یا رۆژهه‌لاتا كوردستانێ نێزیكى 40 ژنێن تووشبووى ب مادده‌یێن بێهۆشكه‌ر هه‌نه‌ كو كه‌ڤتینه‌ لسه‌ر جادده‌یێن سنه‌ و جهێن ڤه‌حه‌واندنێ نینن، و وان پێدڤى ب چاره‌سه‌رییا بله‌ز هه‌یه‌، لێ هه‌تا نوكه‌ نه‌ كه‌سوكارێن وان و نه‌ ناڤه‌ندێن په‌یوه‌ندیدار ئاڤر ل وان ڤه‌دایه‌.
چه‌ند جاران خه‌لكێ رۆژهه‌لاتا كوردستانێ و ب تایبه‌ت چالاكێن جڤاكێ مه‌ده‌نى یێن وێ ده‌ڤه‌رى ته‌كه‌زى لسه‌ر وێ ئێكێ كرییه‌ كو ئێك ژ سیاسه‌تا رژێما ئیرانێ بۆ بێده‌نگكرنا كوردان، ئه‌وه‌ كو رێیێن بكارئینانا مادده‌یێ، بێهۆشكه‌ر و بده‌ست ڤه‌ئینانا وان ل رۆژهه‌لاتا كوردستانێ ب ساناهى ئێخستینه‌ و چو نه‌خوه‌شییان ناگه‌هیننه‌ وان، ئه‌ڤه‌ ژى ب تنێ ژبه‌ر وێ ئێكێ كو ئه‌ڤ خه‌لكه‌ تووشى مادده‌یێن بێهۆشكه‌ر بن و ب چو ره‌نگان هاى ژ ماف و ئازادیێن خوه‌ نه‌مینیت.
ژ ئالییه‌كێ دیڤه‌، ره‌حمان حه‌ریری كو دكتۆرا ب زانستێن جڤاكى هه‌یه‌، د دیداره‌كێ دا دگه‌ل كۆمه‌كا چالاكێن به‌رهنگاربوونا مادده‌یێن بێهۆشكه‌ر، راگه‌هاند، ”چێكرنا كولتۆره‌كێ پێشكه‌ڤتى رێگیری و شه‌ڕه‌ دگه‌ل تووشبوون ب مادده‌یێن بێهۆشكه‌ر، له‌و دڤێت ب فێركرنا هێزێ نه‌كو ب گۆتنێ تووشبوون ب مادده‌یێن بێهۆشكه‌ر د جڤاكى دا ژناڤببه‌ین ب تایبه‌ت لده‌ف ته‌خا گه‌نجان. دیسان پرۆگرامێن فێركرنا ژیانێ ب زاڕۆیان د دبستانان دا رۆله‌كێ گرنگ ل همبه‌رى كێشه‌ و زیانێن جڤاكى هه‌یه‌. وى ته‌كه‌زكر ژى، ب تنێ رێیا به‌رهنگاربوونێ ژ مادده‌یێن بێهۆشكه‌ر ب تنێ جڤاكیكرنا ڤێ پرسێیه‌ و سازیێن جڤاكێ مه‌ده‌نى و یێن په‌یوه‌ندیدار ژى د ڤێ ئێكێ دا رۆله‌كێ باش دێ هه‌بیت”‌.
به‌رپرسا كه‌مپینا نەهێلان و بنبڕکرنا تووشبوونا ژنان ب مادده‌یێن بێهۆشكەر ئه‌و ئێكه‌ دیاركر، ”لگۆره‌ى وێ ئێكێ كو ژنێن تووشبووى ب مادده‌یێن بێهۆشكه‌ر پترین زیانان دگه‌هیننه‌ جڤاكى، قورتالكرنا ژنه‌كا تووشبووى ژ زه‌لامه‌كێ تووشبووى گرنگتره‌”.
ناڤهاتیێ گۆتژى، ”ئه‌ڤ 40 ژنێن لسه‌ر جادده‌یان، گه‌له‌ك ب كه‌مپه‌كێیه‌ بۆ چاڤدێریكرن و پاراستنا وان”.

بابه‌تێن ب ڤێ مژارێ ڤه‌ گرێدای