ل دیكلی بگه‌رن ئه‌گه‌ر دێ‌ هه‌سپ و برا ژی دووڤدا چن!

م. ئاراز به‌شار باله‌ته‌یی

ئه‌ڤه‌ چه‌ند ساله‌كه‌ ئه‌ز وه‌ك ماموستایێ‌ زانكویێ‌ سه‌ره‌دانا هژماره‌كا قوتابخانا دكه‌م دناڤا سه‌نته‌رێ‌ باژێرێ‌ دهوكێ‌ دا ژ بو مه‌ره‌ما سه‌رپه‌رشتییا قوتابیێن قوناغا چوارێ‌ یێن كولیژا په‌روه‌رده‌ بنیات پشكا زمانێ‌ ئنگلیزی یێن كو مه‌شقا خو یا وانه‌گوتنێ‌ ل ڤان قوتابخانا ئه‌نجام دده‌ن. هه‌ر سه‌ره‌دانه‌كێ‌ چیروكه‌ك و سه‌ربوره‌كا بمفا هه‌بوو بو من و قوتابیان. گرنگترین كار ئه‌وه‌ مروڤ مفای ژ هه‌ر سه‌ربوره‌كێ‌ وه‌ربگریت د ژیانا خو دا له‌ورا من بریار دا به‌شداریێ‌ ب ڤی بابه‌تی بكه‌م دا كو مفایێ‌ ڤێ‌ سه‌ربورێ‌ بگه‌هیته‌ هه‌می خوانده‌ڤانا.
بتایبه‌ت ل ڤان سێ‌ سالێن دوماهیێ‌ دا، من هژماره‌كا دیاردێن سه‌یر دیتن ل قوتابخانێن دهوكێ‌، ئێك ژ ڤان دیارده‌یان ب دیتنا من یا دویره‌ ژ كه‌ش و سه‌قایێ‌ خواندنێ‌ و فێربوونێ‌، تا راده‌كی ئه‌ز دبینم كو ئه‌ف دیارده‌ كێماسییه‌كه‌ بو كه‌سایه‌تییا ماموستایان ب گشتی و رێڤه‌به‌رێن قوتابخانا ب تایبه‌تی. ئه‌وژی پێرابوونا رێڤه‌به‌رێن قوتابخانا و هاریكارێن وان ب ئینانا مووچه‌یێن ماموستایان هه‌میان و دابه‌شكرنا وان د ژورا رێڤه‌به‌ری ڤه‌. پتر ژ جاره‌كێ‌ من ئه‌ف دیارده‌ دیت. هه‌رده‌م من هزر دكر كو ئه‌ڤه‌ كاره‌كێ‌ پیروزه‌ و رێڤه‌به‌ر ب شێوه‌كێ‌ خوبه‌خشانه‌ ئه‌نجامدده‌ن ژبه‌ر كو هاریكاریه‌كه‌ بو ماموستایێن قوتابخاناێن خو پێشكه‌ش دكه‌ن ب تایبه‌ت د قه‌یرانێ‌ دا، دا كو هه‌ر ماموستایه‌ك نه‌چار نه‌بیت بچیت مووچێ‌ خو وه‌ربگریت وكرییا رێكێ‌ بده‌ت و ده‌مێ‌ خو یێ‌ بها گران ژ ده‌ست بده‌ت. لێ‌ هزرا من هاته‌ گوهارتن ده‌مێ‌ من پێش چه‌ند روژه‌كا سه‌ره‌دانا قوتابخانه‌كێ‌ كری. رێڤه‌به‌ر هات و مووچێن ماموستایان هه‌مییان یێ‌ د ده‌ستان دا و ده‌ستپێكر دابه‌ش كرن. د ده‌مێ‌ دابه‌شكرنێ‌ دا من دیت كو هه‌ر ماموستایه‌ك پێتڤییه‌ برَه‌ پاره‌كی بده‌ت بو كرینا چایێ‌ و شه‌كرێ‌! دبیت پشكداریكرن د كرینا شه‌كر و چایێ‌ دا ره‌وشته‌كێ‌ جوان بیت ب شێوه‌كێ‌ گشتی. د هه‌مان ده‌مدا هه‌ر ماموستایه‌كی برَه‌ پاره‌كێ‌ دی ژی ددا بوو ئه‌نجامدانا چه‌ند ره‌وشت و تیتالێن جڤاكێ‌ كوردی وه‌ك به‌خشینا بره‌ پاره‌یه‌كی بو وان ماموستایێن هه‌ڤكار یێن نوی چووینه‌ دناڤا هێلینا زێرین دا، و دبیت ئه‌ڤه‌ژی كاره‌كێ‌ پیروز بیت بو پاراستنا په‌یوه‌ندیێن جڤاكی یێن ب هێز. لێ‌ تشتێ‌ پتری هه‌میا سه‌رنجا من كێشای و بوویه‌ جهێ‌ سه‌رسورمانێ‌ ره‌وشا ماموستایه‌كی بو كو ئه‌ز ل وێ‌ باوه‌رێ‌ مه‌ ب هزاران ماموستایێن ب ڤی شێوه‌ی هه‌نه‌. ئه‌ف ماموستایه‌ وه‌كی هه‌می ماموستایێن دی هاتبوو مووچێ‌ خو وه‌ربگریت، لێ‌ سه‌روسیمایێ‌ وی یێ‌ دیاربوو كو زوور یێ‌ ماندییه‌ و دل ته‌نگه‌ و نه‌ ئارامه‌. زوور یێ‌ بله‌ز بوو مووچێ‌ خو وه‌ربگریت و بچیت. گه‌را وی هات و مووچێ‌ خو وه‌رگرت، لێ‌ دیاربوو كو بره‌ پاره‌ك ژ هه‌ڤاله‌كێ‌ خو یێ‌ ماموستا وه‌رگرت بوو ب قه‌ر. ل ده‌مێ‌ قه‌رێ‌ خو ئه‌دا كری و ئه‌و برَه‌ پاره‌ ژی ژبه‌ر مووچێ‌ وی هاتییه‌ برَین هێشت پتر نافچاڤێن وی تێكچوون و پتر ماندی بوو. من گوهلێ‌ بوو بده‌نگه‌كێ‌ نزم و شه‌رمكری گوت “ما دێ‌ ئه‌ڤجاره‌ ژی ژبه‌ر من برَن؟”. ب هه‌ر حالێ‌ هه‌ی مووچێ‌ خو یێ‌ مایی وه‌رگرت و ئێكسه‌ر روینشت و هندی من دیتی نێزیكی چوار جاران مووچێ‌ خو هژمارت و یا دیار بوو كو یێ‌ دابه‌ش دكه‌ت بو هنده‌ كارێن پێتڤی لێ‌ تێرا وان هه‌می ئه‌رك و به‌رپرسیاریێن مێشكێ‌ وی یێ‌ ماندیبووی شلقاندی نه‌دكر! هه‌ر جاره‌كا وی مووچێ‌ خو د هژمارت دا ل جهه‌كی هژمارتنا پارا راوه‌ستیت و سه‌رێ‌ خو هه‌ژینیت! ڤی دیمه‌نی دلێ‌ من سووت، نه‌ ئه‌ز شیام پرسیارا حالێ‌ وی بكه‌م و نه‌ ئه‌ز شیام ئارێشا وی بزانم!
چه‌ند پرسیاره‌كا زه‌نگا مه‌ترسیێ‌ لێدا د مێشكێ‌ من دا، من دهزرا خو دا چه‌ند پرسیاره‌ك كرن، ئه‌رێ‌ ئه‌ف ماموستایه‌ دێ‌ ب چ دل چیت وانه‌یا خو بێژیت؟؟ دێ‌ چه‌وا سه‌ره‌ده‌ریێ‌ دگه‌ل قوتابییان كه‌ت؟؟ دێ‌ قوتابی چه‌وا حه‌ز هه‌بیت ببیته‌ ماموستا د پاشه‌روژێ‌ دا ئه‌گه‌ر ماموستایێ‌ خو بڤی ره‌نگی ببینیتن؟؟ دێ‌ چه‌وا ماموستا ئاستێ‌ خو یێ‌ زانستی پێشئێخیتن؟؟ دێ‌ ب چ دل و مورال چیته‌ مالا خو و پێشوازییا خواستی و پێتڤیێن خیزان و زاروكێن خو كه‌ت؟؟
ل دوماهیێ‌ دێ‌ بێژم پێتڤییه‌ مووچێ‌ ماموستایان ل دویف پیروزییا كارێ‌ وان بیت و رێكا وه‌رگرتنا ڤی مووچه‌ی ژی یا جوان بیت كو سه‌نگا ناڤێ‌ ماموستای بپارێزیت. راسته‌ ل ڤێ‌ دوماهیێ‌ مووچێ‌ وان پیچه‌ك باشتر لێهات لێ‌ پاره‌ بتنێ‌ سه‌نگ و رێزا ماموستایان نا پارێزیتن! پێتڤییه‌ ماموستایان هه‌مییان هژماره‌كا به‌نكی هه‌بیت و مووچێ‌ خو برێكابانكێ‌ وه‌ربگرن دا كه‌س ڤان دیمه‌نێن دل ته‌زین نه‌بینیتن! هاتن و دروستبوونا مووچێ‌ ماموستایان هند نه‌یا گرنگه‌ وه‌كی شێوازێ‌ وه‌رگرتنا وان بو ڤی مووچه‌ی. پێتڤییه‌ سه‌نگا ماموستایان بهێته‌ پاراستن به‌ری سه‌نگا به‌ریكێن وان! ئه‌ڤجا ل ماموستایان بگه‌رن و ڤه‌گێرن ئه‌گه‌ر دێ‌ زاروك و وه‌لات و ملله‌ت ژی دویف واندا به‌رزه‌ بن و هێنه‌ ژ ده‌ست دان!

م. ئاراز به‌شار باله‌ته‌یی
ماموستایێ‌ زانكویا دهوك/ كولیژا په‌روه‌رده‌ بنیات/ پشكا زمانێ‌ ئنگلیزی
13/4/2018

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.