ل باژێڕێ دھۆکێ ئارێشەیێن نە ئاخڤتنێ ل دەف زاڕۆیان بەر ب زێدەبوونێنە

ل باژێڕێ دھۆکێ ئارێشەیێن نە ئاخڤتنێ ل دەف زاڕۆیان بەر ب زێدەبوونێنە

Capture

وار – بابێ کارێزی :

دەما کو زارۆک د ژییێ سێ ساڵییێدا نە ئاخڤیت؛ رامانا وێ چەندێ دگەھینیت کو ئاریشەک ھەیە، دیسان ئەگەر زاڕۆ روودانەکا دلتەزین بەرچاڤ ببینیت یان ژی کەسەکێ نزیکێ خوە ژ دەست بدەت، ترس لدەف پەیدادبیت و د ئەنجامدا دەما کو د ئاخڤیت ڤەدمینیت ئانکو ترتری دبیت، یان ژی ئەزمان یێ گرێدای بیت ب رەنگەکێ کەشەفرێتی، چارەسەرییا ڤان ھەمی حالەتان ژی ڤەدگەریتە روونشتنێن چارەسەرییا دەروونی.

چارەسەرەکا دەروونی ب ناڤێ رێزان عەلی ئیسماعیل بۆ وار دیارکر کو ئەو زاڕۆیێن نورمال دەمێ ژییێ وان دگەھیتە ئێک سالییێ ھندەک پەیڤێن سڤک دبێژن، ل ژییێ دو سالیدا دو پەیڤان دگەھیننە ئێک و دکەنە رستە، لێ ھەکە ئاخفتن ھەتا ژییێ سێ سالی گیرو ببیت ئەڤە رامانا ئاریشەیێن ئاخفتنێ ددەت، دەما دایک و باب سەرەدانا بنگەھێن مە دکەن دێ بینین کو زاڕۆیێ وان ھندەک تێکچوونێن فیزیکی ھەنە مینا ددانێن وان د خوارن یان ژی ژ ئێک دوورن، یان ژی ھندەک کەشەفرێت کو گرێدانا ھەی دگەل گیروبوونا ئاخفتنێ. گەلەک جاران دێ خێزان یان ژی مامۆستا زارۆکەکی فرێکەتە سەنتەرێ مە ب مەرەما گیروبوونا ئاخفتنێ دێ بینین کو گرێیەکا ھەی ل بن ئەزمانی دبیتە ئەگەر ئاخفتنا زاڕۆی تێک بچیت، ئەم ژی ڤان باران ژ سەنتەری رەوانە دکەینە نشتەرگەرێن تایبەتمەند بۆ ئەنجامدانا یا پێدڤی.

دیسان ناڤبری دیارکر کو ئەو زاڕۆیێن پیتا دروست نا ئینن ئانکو ئەو کەسێن نەشێت پیتێن مینا پیتا “س” و “ک” ب دروستی بێژن، مەشق ددەن دا کو دگەل دەمی ئەزمانێ وان و ئاخفتنا وان راست ببیت.

ھەروەسا ئەو کەسێن ترتری ژی مەشق ددەین و بزاڤێ دکەین ب رێکێن جودا ھاریکارییا وان بکەین کو لەزاتییا ئاخفتنێ ڤەگەریننە نورمال، ب تایبەت ب چارەکرنا دەروونی یا کو ئەگەرەکێ سەرەکییە کو ئەڤ جورە تێکچوونە لدەف زاڕۆی پەیداببیت ب تایبەت دەمێ ھەبوونا گرێدانەکێ دگەل روودانێن دلتەزین .
لدۆر پلانا سەنتەرێ ساخلەمییا دەروونی؛ چارەسەرکارا دەروونی رێزان عەلی دیارکر کو ئەو رۆژانە پتر ژ چوار زاڕۆیان نا وەرگرن دا کو بشێن ب دروستی چارەسەرییا وان بکەن و ھەر زاڕۆی دەمژمێرەکێ ژ دەمێ خوە بدەنێ، دیسان چێدبیت پێدڤی ب وێ چەندێ ھەبیت کو ھندەک شیرەتان ل خخێزانێ ژی بکەن لدۆر چەوانییا سەرەدەرییێ دگەل زاڕۆی، و ھێدی ھێدی ئاخفتنا زاڕۆی بگوھۆرن بەرەف ئاخفتنەکا راستڤەکری، ھەژی گوتنێ ئەو نەخوەشێن دھێنە چارەکرن ل ڤی سەنتەری ژییێ وان ژ 18 سالان کێمترە، یەگەر پتر بیت؛ دھێتە رەوانەکرن بۆ نەخوەشخانەیا گشتی.
ناڤبری دیارکر کو ئاریشەیێن نە ئاخفتنێ ل دھۆکێ د زێدەبوونێدا یە، ژبەر ڤێ یەکێ زێدەکرنا سەنتەرێن ژ ڤی جوری و ڤەکرنا دەرگەھان بەرامبەری وان کەسان یێن حەز و شیانێن کارکرنێ ھەبن ل ڤان سەنتەران ئێک ژ کارێن فەرە بۆ خزمەتکرنا خەلکی و نەخوەشان.
چارەسەرکارا ناڤبری دیارکر کو بەھراپتر ژ نەخوەشان خەلکێ باژێرێ دھۆکێنە لێ رێژەیەک ژی ژ دەوروبەری باژێری دھێن، دیسان دیارکر کو ل سالا 2013 نزیکی 115 نەخوەشان ھەبوون و ئەڤ سالە ژمارەیا وان د زێدەبوونێدا یە.

بابه‌تێن ب ڤێ مژارێ ڤه‌ گرێدای