ل باكۆرێ كوردستانێ خواندنا نه‌ فەرمی ب زمانێ كوردی دەستپێكر

ل باكۆرێ كوردستانێ خواندنا نه‌ فەرمی ب زمانێ كوردی دەستپێكر

Capture

وار – كوردۆ رۆژهات :

پڕۆسەیا سالا نوو یا خواندنێ ل تركیا ب كۆمەكا ئاڕێشەیان ڤه‌ دەستپێكر و ل باژاڕێن كوردى ژى ژبه‌ر وێ ئێكێ كو رێ ب خواندانێ ب زمانێ دایك نه‌هاته‌دان، پڕۆسەیا خواندنێ هاته‌ بایكۆتكرن.
دوهى سالا خواندنا یا 2014-2015ێ ل تركیا دەستپێكر، كو 16 ملیۆن و 400 هزار فێرخواز و 873 هزار مامۆستایان روو ل ناڤەندێن خواندنێ كره‌ڤه‌.
بایكۆتكرنا حەفتەیەكا خواندنێ ل باژاڕێن كوردى یێن باكۆرێ كوردستانێ دگەل دەستپێكرنا سالا نوو یا خواندنێ دەستپێكر و هەر ئێك ژ باژاڕێن؛ ئامەد، باتمان، شرنه‌خ، مێردین، ئاگری، مووشێ ڤه‌گرتییه‌ و ب هزاران خێزانان داخوازا ”خواندنا ب زمانێ دایكێ” بلندكره‌ڤه‌ و ب پێشرەوییاHDPk, DBP زاڕۆیێن خوه‌ ره‌وانه‌ى دبستانان نه‌ركرن.
ل شوونا خواندن ب زمانێ كوردی ل دبستانێن میرى، دامەزراندنا دبستانێن شوونگر دەستپێكرییه‌. ئه‌ڤ دبستانێن كوردى ل ئامەد، جزیرێ و گەڤەڕێ وانەیان ب زمانێ كوردێ دبێژن.
بڕیار وه‌سایە پشتى تاقیكرنا ڤان دبستانێن كوردى، ل باژاڕێن دى یێن باكۆرێ كوردستانێ ژى دبستانێن كوردی بهێنه‌ ڤه‌كرن.
ئادەم ئۆزجانەر، هەماهەنگكارێ دەستپێشخەرییا ئازادی، ب تۆڕا مه‌دیاییا رووداوێ راگەهاند؛ ”پێدڤییە دەولەت ب رژدییەكا زێده‌ ڤه‌ ل ڤێ پرسێ نێزیك بیت، ئه‌ڤه‌ د سه‌ر مافه‌كێ ده‌ستپێكى دایه‌، داخوازییه‌كا مللییا مه‌ یه‌، و دێ درێژیێ ب بایكۆت و نه‌رازیبوونێن خوه‌ ده‌ین”.
رەشید دەلی، جێگرێ سەرۆكێ گشتیێ پارتا ماف و ئازادییان HAK-PAR پشته‌ڤانییا پارتا خوه‌ بۆ بایكۆتكرنا خواندنێ ژبال كوردان ڤه‌ راگەهاند و گۆت: ”كوردان مافێ هه‌ى ب زمانێ خوه‌ بخوینن، تێگەهشتن ژ نیازا بایكۆتكرنێ مومكین نینە، د گه‌ل ڤێ ئێكێ ژى دا خواندن ب زمانێ دایكێ داخوازییەكا دیمۆكراسییە، ئەڤ مافە ژى بۆ كوردان مافه‌كێ سروشتییە”.
لێ سەندیكا پەروەردە و فێركرنێ تشته‌كێ دى دبێژن. یوونس مەمیش، سەرۆكێ تایێ ئامەدێ یا سەندیكا پەروەردە و فێركرنێ دبێژیت: ”خواندن ب زمانێ دایكێ مافه‌كە، لێ ئه‌ڤه‌ ده‌مێ بایكۆتكرنێ نەبوو”.
مەمیش وێ ئێكێ ژى دبێژیت: ”هه‌تا دووماهیێ پشته‌ڤانیێ ل خواندن ب زمانێ دایكێ دكەین، لێ دگەل بایكۆتكرنێ نینین، د ده‌مه‌كى دا كو پڕۆسەیا ئاشتیێ گه‌له‌ك تشتێن باش دكه‌ت و پێنگاڤێن دیمۆكراسییانە دهاڤێژیت، ئەڤ بایكۆتكرنە تشته‌كێ راست نینە”.
ل گۆره‌ى دەستووری تركیا، ل وى وه‌لاتى ژ بلى زمانێ تركی رێ ناهێته‌ دان خواندن ب چو زمانێن دى ل دبستانێن فه‌رمى هه‌بیت، لێ ل ئێكى ئیلۆنا سالا 2013ێ رەجەب تەیب ئەردۆغان سەرۆكوەزیرێن وى ده‌مى و سەرۆك كۆمارێ نوكه‌یێ تركیا د چارچۆڤه‌یێ پاكێتا پرۆسەیا ئاشتیێ دا چەند قانوونه‌ك راستڤه‌كرنه‌‌ و د ناڤ وان ژى دا ل دبستانێن تایبەت رێ ب خواندن ب زمانێ دایكێ هاته‌دان. لێ ئەڤ خواندنە ب تنێ دبستانێن نه‌ فه‌رمى ڤه‌دگریت.

بابه‌تێن ب ڤێ مژارێ ڤه‌ گرێدای