كێشه‌یێن خێزانێ و ئه‌نجامێن بێ چاره‌ دمینن!

كێشه‌یێن خێزانێ و ئه‌نجامێن بێ چاره‌ دمینن!

وار – دهۆک :

گرفت یان كێشه‌، پێكدهێت ژ هه‌ر باره‌كى كو دبیته‌ رێگر یان پرسگرێگ یان ب كێمیڤه‌ نه‌خوه‌شكرنا ژیانا تاكى یان یا كۆمێ و جڤاكى. بێگومان ژیان بێى كێشه‌ نابیت، لێ كێشه‌یه‌ك كو ببیته‌ سه‌ده‌ما تێكدانا‌ ژیانێ و نه‌هێلانا ئاسۆده‌ییێ، پێدڤییه‌ هه‌لوه‌ست لسه‌ر هه‌بیت و ب جددى كار بۆ چاره‌سه‌ركرنا وێ بهێته‌كرن.
ئه‌ڤرۆ ژ هه‌ر ده‌مه‌كى زێده‌تر كێشه‌ زێده‌بووینه‌ ب رادده‌یه‌كى كو ده‌ستێ مرۆڤى بۆ خوه‌ بچیت و خوه‌ بكوژیت (بۆ نموونه‌؛ خوه‌سۆتنا ژنان و كچان) یان زێده‌بوونا‌ كێشه‌یێن خێزنى یێن د ناڤبه‌را ژن و مێران دا، ژ وان ژى ب تایبه‌تى ژێكجودابوون و به‌ردان، ئه‌ڤه‌ ژى ب تایبه‌ت د ئێكه‌م سالا ژیانا هه‌ڤژینیێ دا! یان ژى (خیانه‌تا هه‌ڤژینیێ).
ئه‌وا كو مه‌ دڤێت باسبكه‌ین ژێكڤه‌چوون و سه‌ده‌مێن سه‌رهلدانا وێ و كار و ئه‌ركێن پێدڤى بۆ چاره‌سه‌ركرنێنه‌.
د دادگه‌هێ دا دو زاراڤ گه‌له‌ك دهێنه‌ بكارئینان (به‌ردان و ژێكجوداكرن)، ل ڤێرێ دێ مانایا هه‌ر ئێك ژ وان بۆ هه‌وه‌ دیاركه‌ین:
به‌ردان: ئه‌و ب خوه‌ ژ جودابوون و قورتالبوون ژ باره‌كێ نه‌خوه‌ش هاتییه‌، یان باره‌كێ ئالۆزه‌ و دێ خوه‌ ژێ قورتالكه‌ى، د قانوون و شه‌رعى دا هاتییه‌ كو ژن و مێره‌ك ژێكجودادبن پشتى وێ ئێكێ كو ب گرێبه‌ستا هه‌ڤژینیێ گه‌هشتبنه‌ ئێك. به‌ردان د دادگه‌هێ دا ب وان باران دهێته‌ گۆتن كو زه‌لامى ب جۆره‌ك ژ جۆران به‌ردان خواستییه‌ و پشتى هینگێ دادگه‌هـ بڕیارا خوه‌ لسه‌ر دده‌ت.
ژێكجوداكرن (ته‌فریق): پێكدهێت ژ وان باران كو ژن و مێره‌كێ گه‌له‌ك گرف و كێشه‌یێن خێزانى هه‌بن و په‌نایێ دبه‌نه‌ به‌ر دادگه‌هێ بۆ چاره‌سه‌ریێ، ڤێجا هه‌ر ئالییه‌ك ژ وان بیت ژن یان زه‌لام، ب زۆرى ژى داخوازا جودابوونێ دكه‌ن، دادگه‌هـ ژى بڕیارا خوه‌ لسه‌ر دده‌ت.
بێگومان ب هه‌ر جۆره‌كى بیت، ئانكو لێكڤه‌بوون و جودابوونا دووماهیێ، ئانكو ژناڤچوونا خێزانه‌كێ و نه‌مانا به‌رێ بنیاتێ جڤاكى، ئانكو سه‌رگه‌ردانكرنا چه‌ند زاڕۆ و ژنان، ئانكو دروستبوونا دوژمنایه‌تیێ د هنده‌ك باران دا.
بێگومان به‌ردان پێكدهێت ژ دووماهى چاره‌، له‌و پێدڤییه‌ چه‌ند پێنگاڤه‌ك بهێنه‌ هاڤێژتن، هه‌كه‌ر چو رێیه‌ك نه‌ما، ل وى ده‌مى به‌ردان ببیته‌ چاره‌.

بابه‌تێن ب ڤێ مژارێ ڤه‌ گرێدای