كێشه‌يێن جڤاكى لناڤبه‌را بڕیارێن دادگه‌هێ و مایتێكرنێن ئه‌شیره‌تێ

كێشه‌يێن جڤاكى لناڤبه‌را بڕیارێن دادگه‌هێ و مایتێكرنێن ئه‌شیره‌تێ

 

azaza

وار – دهۆک :

ژبه‌ر وێ‌ باندۆرا ئه‌شیره‌تێ‌ د ناڤا جڤاكێ‌ كورده‌واری دا هه‌یه‌، رۆژانه‌ ب ده‌هان كێشه‌یێن كوشتنێ‌ ب هێجه‌تا پاقژكرنا نامووسێ‌ ل هه‌رێما كوردستانێ‌ دهێنه‌ روودان و داكو كێشه‌ بهێته‌ بێده‌نگكرن پرانیا ڤان كێشه‌یا ب سه‌ده‌ما ده‌ستێوه‌ردانێن ئه‌شیره‌تان ل ده‌رڤه‌ی دادگه‌هێ‌ دهێنه‌ چاره‌كرن، لێ‌ پرانیا وان سه‌رهه‌لده‌نه‌ڤه‌ و كێشه‌ ئالۆزتر لێدهێن‌ و تاوانبار ناگه‌هیته‌ سزایێ‌ خوه‌، بۆ وه‌رگرتنا پتر پێزانین و بۆچوونان لسه‌ر ڤى بابه‌تى رۆژنامه‌یا وار ‌بۆچوونا چه‌ند ئاغان چالاكڤان و پارێزه‌ران د ڤێ راپۆرتێ دا وه‌رگرتیه‌.

پارێزه‌ر (رزگار صدقی شه‌كر نێروه‌یی) ل سه‌رده‌مێن به‌رێ ژبه‌ر نه‌بوونا دادگه‌هان دبیت گه‌له‌ك كێشه‌ و گرفتێن وه‌لاتییان‌ ب رێكا ئه‌شای، ئاغا و رهسپیان دهاتنه‌ چاره‌كرن لێ‌ ئیرو قانوونێ‌ جهێ‌ خوه‌ یێ‌ گرتی و زێده‌تر بۆ وار گۆت: قانوون سه‌روه‌ره‌ و هه‌ر كێشه‌یه‌كا دروست دبیت قانوون وێ‌ رێكێ‌ ناده‌ت ب رێكێن ئه‌شایری و مرۆڤانی بهێنه‌ چاره‌كرن، چونكی ب دروستاهی مافێ‌ تاوانلێكری ناده‌نێ‌ یان تاوانبار ناگه‌هیته‌ سزایێ‌ خوه‌ یێ‌ ب دروستاهی و دبیت ده‌ستێوه‌ردانێن ناڤخۆیی یێن ئه‌شایری ئه‌ڤ كه‌یسه‌ ب دروستاهی نه‌هێته‌ چاره‌كرن، به‌لكو ئه‌ڤ كه‌سێ‌ تاوانبار ده‌ستهه‌لاتا هه‌ی و خودان شیانه‌ و خودان مرۆڤه‌ دبیت دێ‌ تاوانه‌كا مه‌زن كه‌ت و كه‌سوكار و ئه‌شیره‌تا وی دێ‌ هاریكاریا وی كه‌ن و پارێزن ، ل ڤی ده‌می دێ‌ كه‌سه‌كێ‌ دی چاڤ ل وی كه‌ت و ل ڤێره‌ دبیت ئه‌ڤه‌ نه‌بیته‌ وانه‌یه‌ك بۆ وی كو دووباره‌ نه‌كه‌ت.
رزگار دیسا گۆت ژى: قانوون بۆ هندێ‌ یا هاتی وه‌كهه‌ڤیا مرۆڤایه‌تی په‌یداكه‌ت داكو بیته‌ سنۆره‌ك بۆ ڤی جڤاكی كو شاشییان نه‌كه‌ن و زولم نه‌هێته‌كرن، تایبه‌ت ده‌ما كێشه‌ دروست دبن باوه‌رم ده‌ستێوه‌ردانا ئاغا و رهسپی و ئه‌شیره‌تێ‌ كێشه‌ گه‌له‌ك جاران مه‌زنتر لێدهێت و دبیته‌ سه‌ده‌م ئه‌ڤ مرۆڤه‌ سوباهى تاوانه‌كا دی بكه‌ت یان هنده‌ك كه‌سێن دی دێ‌ بێژن ئه‌گه‌ر سوباهى تاوانه‌كێ‌ بكه‌م دێ‌ هێمه‌ لێبۆرین، لێ‌ ده‌ما دچیته‌ هه‌مبه‌ری دادگه‌هێ‌ لڤێره‌ دادگه‌هـ ب ره‌نگه‌كێ‌ سه‌ره‌ده‌ریێ‌ دگه‌ل دكه‌ت هه‌موو كه‌سان وه‌ك ئێك دانیت مافێ‌ تاوانلێكری و تاوانباری دده‌تێ‌ و لدووڤ برگێن قانوونی دێ‌ پێرابوون دگه‌ل هێنه‌ وه‌رگرتن، رزگار خویاركر ژى ده‌مێ رۆلێ قانوونى ب دروستى جهێ خوه‌ بگریت كه‌سێ‌ خودان هێز و شیان و كه‌سێ‌ لاواز و هه‌ژار وه‌ك ئێك لێدهێن و قانوون ب ئێك چاڤ ته‌ماشه‌ی وان دكه‌ت، ده‌ما قانوون پێرابوونان وه‌ردگریت سنۆره‌كێ بۆ كه‌سێ‌ به‌رامبه‌ر دروست دكه‌ت داكو دووباره‌ وى تاوانى نه‌كه‌ت و ئه‌و كه‌سێن هه‌مبه‌ری وی ژی دێ‌ گه‌هنه‌ مافێ‌ خوه.
لدۆر گازنده‌یێن كه‌سێ زولم لێكرى بۆ مایتێكرنا ئه‌شیرێ د كاروبارێن وى دا رزگار دبێژیت: ئه‌گه‌ر كه‌سێ‌ زولم لێ‌ هاتیه‌كرن بچیته‌ دادگه‌هێ‌ و بێژیت فلان ئاغای یان فلان كه‌سێ‌ نه‌هێلا كێشه‌یا خوه‌ بینمه‌ دادگه‌هێ،‌ دبیت دادگه‌هـ لێپرسینێ‌ دگه‌ل وی كه‌سی بكه‌، ئه‌گه‌ر ده‌ستێوه‌ردان هه‌م ژبۆ هندێ‌ بیت كو كێشه‌ چاره‌بیت، دبیت دادگه‌هێ ئه‌و ماف نه‌بیت پێرابوونا دژی ڤی كه‌سی یان ڤێ‌ ئه‌شیره‌تگه‌ریێ‌ وه‌ربگریت، چونكی چو به‌ندێن قانوونی نینن ڤی كه‌سی تاوانبار بكه‌ت، لێ‌ ئه‌گه‌ر گه‌ف ل وی كه‌سێ‌ زولم لێهاتیه‌كرن بهێنه‌كرن كو ڤێ‌ كێشه‌یێ‌ به‌حس نه‌كه‌ت و به‌رزه ‌كه‌ت ل وی ده‌می ئه‌گه‌ر ئه‌ڤ كه‌سه‌ بچیته‌ دادگه‌هێ‌ و داخوازا مافێ‌ خوه‌ بكه‌ت، ل وی ده‌می دادگه‌هـ دێ‌ پێرابوونا وه‌رگریت و دێ‌ ئه‌ڤ كه‌سه‌ وه‌ك تاوانبار هێنه‌ بانگهێشتكرن بۆ دادگه‌هێ، لێ هه‌ر چه‌وا بیت باشترین رێك بۆ چاره‌كرنا هه‌ر جۆره‌ كێشه‌یه‌كێ دادگه‌هه‌.
(عایشا عه‌لی) مامۆستا و چالاكڤان د بیاڤێ‌ ژنان دا دیاركر رۆژانه‌ ژن دهێته‌ كوشتن لسه‌ر ب به‌هانه‌یا‌ شه‌ره‌ف و نامووسێ‌ كو كریه‌ په‌رده‌یه‌ك بۆ تاوانا خوه‌ و زێده‌تر بۆ وار دبێژیت: ‌ یا ژوان زه‌لامان ڤه‌ ڤه‌ نامووس وشه‌ره‌فا وان هه‌موو یا ب ژنێ‌ ڤه ‌گرێدایه‌! گه‌له‌ك جاران دێ‌ بینین ژنه‌ك دبیت سه‌را تشته‌كێ‌ بچووك یا دهێته‌ كوشتن‌، یا ژهه‌موویێ‌ نه‌خۆشتر ئه‌وه‌ ئه‌ڤ كه‌سێن ڤان تاوانێن مه‌زن دكه‌ن ناهێنه‌ سزادان ئه‌گه‌ر بهێنه‌ سزادان ژی ب رێكا واسته‌یێ‌ پشتی ده‌ربازبوونا چه‌ند مه‌هان دهێنه‌ ئازادكرن، له‌ورا پێدڤییه‌ وانه‌یه‌ك بۆ ڤان كه‌سان بهێته‌دان یێن ڤان تاوانان دكه‌ن، وه‌كی كچه‌كا د ژیێ‌ 15سالی دا ب ره‌نگه‌كێ‌ هۆڤانه‌ دهێته‌ كوشتن و ده‌رڤه‌ی دادگه‌هێ‌ هاتیه‌ ماره‌كرن، ناڤبرى خویاكر ژى پێدڤییه‌ ئه‌و مه‌لایێن ب ڤان كاران رادبن سزایه‌ك بۆ بهێته‌دان، دیسا ده‌ما زه‌لامه‌ك ژنا خوه‌ دكۆژیت په‌نایێ‌ بده‌ته‌ هه‌مبه‌ری ئه‌شیره‌تێ‌ و ئاغا و رهسپیا، لڤێره‌ دڤێت قانوون رۆلێ‌ خوه‌ بینیت و كه‌س ژقانوونێ‌ مه‌زنتر نینه، فه‌ره‌ ئه‌ڤ كێشه‌ ب رێكێن قانوونی بهێنه‌ چاره‌كرن بێ‌ هه‌بوونا چو ده‌ستان د ناڤدا یان واسته‌یێه‌كێ.
عایشایێ لدۆر رۆلێ ئه‌شیره‌تێ د چاره‌كرنا هنده‌ك كێشه‌یان دا كو گه‌هشتینه‌ ئه‌نجامێ ئه‌ڤ گۆتنه‌ هه‌بوو: دبیت هنده‌ك كێشه‌ ژ لایێ‌ ئه‌شیره‌تێ‌ ڤه‌ بهێنه‌ چاره‌كرن و ئه‌ڤه‌ باشه‌، لێ‌ هنده‌ك كێشه‌ یێن هه‌ین نابیت ئه‌شیره‌ت و مه‌زنێن ئه‌شیره‌تان مایتێكرنێ‌ دناڤدا بكه‌ن، كو بێژیت ئه‌ڤه‌ كچا منه‌ یان به‌س من مافێ‌ هه‌ی، چونكو ئه‌ڤه‌ نابیت، راسته‌ كچا وییه‌ لێ‌ وه‌ك مرۆڤ چاڤێ‌ خوه‌ بده‌تێ‌ و ته‌ماشه‌ بكه‌ت دڤێت تاوانبار ب توندی بهێته‌ سزادان, ده‌ما ئه‌شیره‌ت كێشا كوشتنا ژنان دناڤا خوه‌ دا چاره‌ دكه‌ن، ئه‌ڤه‌ ژهه‌موویێ‌ خرابتره‌ ژن هه‌موو ده‌ما دبیته‌ قوربانا ئێكێ‌ د ناڤا جڤاكی وخێزانێ دا و ئه‌شیره‌تێ‌ دا، بۆچی ئه‌گه‌ر زه‌لامه‌ك بهێته‌ كوشتن لێبۆرین بۆ نینه؟‌ لێ‌ بۆچی ده‌ما ژنه‌ك دهێته‌ كوشتن هه‌ر وه‌كی چو چێنه‌بووی؟ ئینه‌ما تشته‌كێ‌ بچووكه‌ دروستبووی ئه‌ڤه‌ مه ‌ئێكودو عه‌فو كر، نها سالا2014 رۆلێ‌ ئه‌شیره‌تگه‌ریێ‌ نه‌مایه‌ دڤێت دادگه‌هـ رۆلێ خوه‌ ببینیت، ناڤبرى خویاكر ژى ل هنده‌ك ده‌ڤه‌ران گرنگی ب ژنێ‌ ناهێته‌دان، جاران ته‌ماشه‌ی ژنێ‌ دكه‌ن حه‌تا نه‌مرۆڤ ژی, به‌رێ‌ ل سه‌ر ده‌مێ‌ باب و باپیرا ئه‌ڤ كێشه‌یێن نها روودده‌ن گه‌له‌ك دكێمبوون یان نه‌بوون ئه‌گه‌ر هه‌بان دا گوندی ب ره‌نگه‌كێ‌ جوان رابن ڤێ‌ كێشه‌یێ‌ چاره‌كه‌ن، لێ‌ نه ‌ل ڤی رادده‌ی وه‌كی نها ئه‌م دبینین سنۆر بهێنه‌ به‌زاندن، ل سه‌رده‌مێ به‌رێ حه‌ز‌ژێكرنا كور و كچان لسه‌ر بنه‌مایێ‌ رێزگرتن و ڤیانێ‌ بوویه،‌ نها به‌روڤاژی یه‌ سه‌ره‌رای ئه‌و ته‌كنۆلۆجیا نها دناڤ مه‌دا و ئه‌ڤ هوشیاریا نها ئه‌م تێدا رێزگرتن ل ئه‌ڤینێ نینه‌.
پارێزه‌ر رزگار به‌حسێ په‌یدا نه‌بوونا كێشه‌یان ل پشتى دادگه‌هكرنێ دكه‌ت و دبێژیت: گه‌له‌ك جاران دادگه‌هـ دگه‌ل وێ‌ چه‌ندێیه‌ ئاشتبوون دروست بیت، لێ‌ نه‌كو ئه‌ڤ تاوانبارێن هه‌ نه‌چنه‌ به‌رده‌م دادگه‌هێ‌ ب ته‌نێ‌ ئاشتبوون بر هندێ‌ باشه‌ داكو كێشه‌ به‌رفره‌هتر لێ‌ نه‌هێت، ئه‌گه‌ر ئه‌ڤ ده‌ستێوه‌ردانا ئه‌شایری هه‌بیت بۆ ئارامكرنا بارودوخی باشه‌، لێ‌ نه‌بیته‌ بنپێكرنا قانوونێ‌ و قانوونێ‌ چو رۆل نه‌بیت، ناڤبرى گۆت ژى هنده‌ك كێشه‌ یێن هه‌ین دبچووكن ئه‌گه‌ر ئاشتبوون دناڤبه‌را هه‌ردو لایه‌نان هه‌بیت باشه و لڤێره‌ دادگه‌هـ و قانوون ژی دگه‌ل وێ‌ چه‌ندێ‌ دانه‌، لێ‌ هنده‌ك كێشه‌یێن هه‌ین وه‌كی یا به‌ری چه‌ند رۆژان یا كوشتنا وێ‌ ژنا 15 سالی پێدڤییه‌ ئازادیه‌كا ته‌مام بده‌نه‌ دادگه‌هێ،‌ داكو دادگه‌هـ یا ئازاد بیت و پێرابوونێن قانوونی ده‌رهه‌قا تاوانباران دا بهێته‌ وه‌رگرتن, گه‌له‌ك كێشه‌ ب رێكێن ئه‌شایری هاتینه‌ چاره‌كرن، بۆ نموونه‌ ده‌مێ گه‌نجه‌ك دێچیت ترومبێلێ‌ دهاژۆت و دێ‌ روودانه‌كێ‌ چێكه‌ت، ئێكسه‌ر به‌ری ئه‌ڤ كێشه‌یه‌ بچیته‌ دادگه‌هێ‌ وه‌كو خه‌لك و گوند و ئه‌شیره‌ت دێ‌ مایتێكرنێ‌ كه‌ن و دێ‌ ڤێ‌ كێشه‌یێ‌ چاره‌كه‌ن، ئه‌گه‌ر ڤى تاوانبارى ده‌ستووریا هاژۆتنا ترومبێلێ‌ نه‌بیت لڤێره‌ گه‌نجه‌كێ‌ نه‌ئارامه‌ و حه‌ز ‌ژ كێشه‌یان دكه‌ت‌، ب رێكا مایتێكرنا ئه‌شیرێ دێ ئه‌ڤ كیشه‌‌ ئالوزتر لێهێت یان ژی دێ‌ بیته‌ ده‌رفه‌ته‌ك بۆ گه‌له‌ك گه‌نجێن دی هه‌مان شێوه‌ ره‌فتارێ‌ بكه‌ن و شاشیا بكه‌ن.
(بشار مشیر ئاغا گۆران) په‌رله‌مانتار و ئاغایێ‌ ئه‌شیره‌تا گۆران خویاكر مه‌ پێخوشه‌ هه‌م ئه‌شیره‌تێ‌ و هه‌م دادگه‌هێ‌ هه‌ڤكارى دگه‌ل ئێكدو هه‌بیت ب رێكا ئاشتبوونا ئه‌شائیری و ب رێكا دادگه‌هێ‌ ژی و زێده‌تر بۆ وار دبێژیت: بڕیارا دادگه‌هى بتنێ‌ سزای دده‌ته‌ تاوانباری و ئه‌ڤ چه‌نده‌ نابیته‌ ئاشتبوون، بۆ نموونه‌ تاوانبار دێ‌ 15سالان سزایێ‌ خوه‌ وه‌رگریت و دێ‌ ژ زیندانێ‌ ده‌ركه‌ڤیت و پشتی ده‌ردكه‌ڤیت كێشه‌یێن جڤاكى هه‌ر دمینن، ئه‌گه‌ر ئاشتبوونا ئه‌شائیری بهێته‌كرن و سزایێ‌ خوه‌ ل دادگه‌هێ‌ و ب رێكێن قانوونی وه‌ربگریت، داكو كه‌سێ‌ دی چاڤ ل وی نه‌كه‌ت.
بشار لدۆر وان كێشه‌یێن وان چاره‌كرین دبێژیت: ب سه‌دان كێشه‌ مه‌ چاره‌ كرینه‌ و مه‌ پێكول كریه،‌ هه‌ردو لایه‌نان رازی بكه‌ین و مه‌ زۆرداری و خورتی ل چو لایه‌نان نه‌كریه، ئانكو‌ ب رازیبوونا هه‌ردو لایه‌نان كێشه‌ هاتینه‌ چاره‌كرن و هه‌ردو لایه‌ن پێكهاتینه‌ و ل ده‌مێ‌ ل دادگه‌هێ‌ ژی پێرابوونێن قانوونی هاتینه‌ وه‌رگرتن، ژ سه‌رجه‌مێ‌ وان كێشه‌یێن مه ب رێكا ئه‌شیره‌تگه‌ریێ‌ ‌چاره‌كرین 99% سه‌ركه‌ڤتن ئینایه‌ و چاره ‌بووینه‌ و تا نها سه‌رنه‌هه‌لداینه‌ڤه‌ و پشتی هنگی چو ئاریشه‌ نه‌بووینه‌، لێ‌ دڤێت ئه‌و لایه‌نێن پشكدار د كێشه‌یان دا زۆرداریێ‌ ل ئێكدو نه‌كه‌ن و نه‌كه‌ڤنه‌ دبن فشارا چو كه‌سان و بلا بگه‌هنه‌ وێ‌ باوه‌ریێ‌ ب تۆلڤه‌كرن و خوینداریێ‌ چو ئاریشه‌ هه‌تا هه‌تایێ‌ چاره ‌نابن و دێ‌ ره‌وش لاوازتر لێهێت، دڤێت رهسپی و ماقویل رۆلێ‌ خوه‌ دچاره‌كرنا ئاریشه‌یان دا ببینن، مه ‌دڤێت قانوون سه‌روه‌ربیت و هه‌ماهه‌نگی دگه‌ل وه‌لاتییان و ئه‌شیره‌تان و دادگه‌هان هه‌بیت، چونكی جڤاكێ‌ مه‌ یێ‌ ئه‌شائیرییه‌ و پێدڤیه‌ رۆلێ‌ ئاشتبوونا ئه‌شائیری دناڤ كێشه‌یێن مه ‌دا هه‌بیت و دڤێت ئه‌م رۆلێ‌ دادگه‌هێ‌ ژی ژبیر نه‌كه‌ین ژبه‌ركو ئه‌م یێن به‌ره‌ڤ دیموكراتیه‌تێ‌ دچین و به‌ره‌ڤ سیسته‌مه‌كێ‌ دی دچین.
(عایشا) وه‌كو چالاكڤانه‌ك به‌حسێ رۆلێ جڤاكى د تاوانێن زه‌لامان دا دكه‌ت و دبێژیت: ئه‌گه‌ر سپێدێ‌ تا ئێڤاری زه‌لام هه‌ما چو كارێن خراب بكه‌ت دروسته‌ چونكی زه‌لامه،‌ لێ‌ ئه‌گه‌ر كچ سلاڤی هه‌ڤاله‌كێ‌ خوه‌ كر دێ‌ بێژن ئه‌ڤه‌ مه‌زنترین تاوانه! ‌ئه‌رێ‌ باشه‌ ما ئه‌ڤ كچه‌ ژی نه‌مرۆڤه‌, سه‌باره‌ت كا نها ئه‌شیره‌تێ‌ رۆل د ڤی بابه‌تی دا مایه؟‌ عایشا دبێژیت: به‌لێ‌ رۆلێ خوه‌ یێ‌ مای، ل هنده‌ك ده‌ڤه‌ران یا كێمبووی و هوشیاری یا په‌یدابووی، لێ‌ ل گه‌له‌ك ده‌ڤه‌ران رۆلێ‌ ئه‌شیره‌تێ‌ د ڤان كێشه‌یان دا گه‌له‌كا بهێزه‌ و هیڤییا ژنان ژ حوكمه‌ت و لایه‌نێن په‌یوه‌ندیدار ئه‌وه‌ كو هه‌ر كێشه‌یه‌كا رووبده‌ت، هه‌موو هه‌ول بده‌ین تاوانباری به‌ینه‌ هه‌مبه‌ری دادگه‌هێ و بلا قانوون سه‌روه‌ر بیت و كه‌س ژقانوونێ‌ مه‌زنتر نه‌بیت و ئه‌شیره‌ت مایتێكرنێ‌ نه‌كه‌ته‌ د ناڤا ڤان كه‌یسه‌یان دا، حاله‌ت هه‌بوویه‌ ل ئێك ژ ده‌ڤه‌رێن سه‌رب ئامێدیێ‌ ڤه‌، كچ هاتیه‌ كوشتن و كۆر ئێك رۆژ نه‌مایه‌ د زیندانێ‌ ڤه‌، نها ب سه‌ربلندی دهێت و دچیت و بۆ خوه‌ وه‌ك شانازی دزانن كو ئه‌شیره‌تا وان ئه‌ڤ رێكه‌ گرتیه‌به‌ر و نه‌چووینه‌ هه‌مبه‌ری دادگه‌هێ‌.
ئایا نها دادگه‌هـ رۆلێ‌ خوه‌ دبینیت و قانوون سه‌روه‌ره؟ بۆ ڤێ پرسێ‌ بشار مشیر ئاغا ئه‌ڤ گۆتنه‌ هه‌بوو: ل پارێزگه‌ها دهۆكێ‌ قانوون گه‌له‌ك گه‌له‌ك سه‌روه‌ره،‌ دادگه‌هـ نه‌كه‌ڤتینه‌ لبن چو فشاران نه ‌ب ره‌خێ‌ ده‌ستهه‌لاتێ‌ نه ‌ب ره‌خێ‌ پارتێن سیاسی و نه ‌ب كه‌سان و نه ‌ب ئاغایا و ئه‌شیره‌تان، ئه‌ڤان لایه‌نان هه‌موویان نه‌شیاینه‌ كارێ‌ خوه‌ ب دروستی نه‌كه‌ن و دادگه‌هـ رۆلێ‌ خوه‌ ب دروستاهی دگێریت.
بۆچی ل كوردستانێ‌ ده‌ما كچه‌ك یان كۆره‌ك تاوانه‌كی دكه‌ت زێده‌تر كۆر دهێته‌ پاراستن و كچ دهێته‌ پشتگوهاڤێشتن؟ بۆ ڤى بابه‌تى (بشار) دبێژیت: چو جوداهی دناڤبه‌را كۆر و كچان دا نینه،‌ پێدڤییه‌ چاڤێ‌ مه‌ زێده‌تر ل كچێ‌ بیت ده‌ما كێشه‌ رووده‌ت، هه‌ردوو لایه‌ن دخه‌له‌تن و كه‌لتوری ئه‌شیره‌تگه‌ری یێ‌ زاله‌ لسه‌ر جڤاكى، دگه‌ل هندێ‌ نینم جوداهی دگه‌ل كۆر و كچان دا بهێته‌كرن و هندی ئه‌م بشێین دێ‌ هه‌ردو لایه‌نان پێكئینین، لڤێره‌ ب ته‌نێ‌ دو كه‌س دخه‌له‌تن و چو قانوون نینن و رێكێ‌ ناده‌ن تو بنه‌ماله‌كی یان ئه‌شیره‌ته‌كێ‌ یان ده‌ڤه‌ره‌كێ‌ تاوانبار بكه‌ی، بۆ نموونه‌ كۆر و كچه‌كن كو كێشه‌یه‌ك لناڤبه‌را وان دا چێبوویه‌، له‌ورا دڤێت كه‌سوكارێن وان بگه‌هنه‌ ئه‌نجامه‌كی و ئه‌ز به‌رده‌وام یێ‌ به‌رهه‌ڤم بۆ چاره‌كرنا ڤان كێشه‌یان كو ب رێكا قه‌ناعه‌تێ‌ و دووری زولم و زۆرداریێ‌ و فشاران به‌شدارى چاره‌كرنا ڤان كێشه‌یان بم.
رێژه‌یا كێشه‌ و تاوانان لڤی سه‌رده‌می زێده ‌بووینه، ئه‌گه‌ر بۆ چو دزڤریت؟ بشار مشیر گۆت: ئه‌ڤ مافێ‌ ژنا و پشتگیریا ژنا بۆ ژنێ‌ و شاش تێگه‌هشتنا بابه‌تى كاریگه‌ره‌، ئه‌م یێ‌ به‌ره‌ڤ دیمۆكراتیه‌تێ‌ دچین، تا نها ئه‌م ب دروستاهی د تێگه‌هێ‌ دیمۆكراتیه‌تێ‌ نه‌گه‌هشتینه‌ و مافێ‌ ژنێ‌ دڤێت دیموكراتیه‌ت100% ل كوردستانێ‌ هه‌بیت و ژن ژی ده‌ما دبینیت هنده‌ك یێ‌ پشته‌ڤانیێ‌ لێدكه‌ن، پیچه‌ك سه‌ردا دچیت و (مغرور) دبیت، دیسان گه‌له‌ك جاران خیانه‌تا هه‌ڤژینی دروست دبیت، كو ئه‌ڤ كاره‌ جهێ‌ ره‌زامه‌ندیێ‌ نینه‌، چه‌وا ژن به‌رگریێ‌ ل مافێ‌ ژنێ‌ دكه‌ت مه ‌ژی دڤێت ژن بزانیت زه‌لام ژی خودان غیره‌ته‌ و خودان هه‌سته‌ و رازی نابیت ژن خیانه‌تێ‌ لێ‌ بكه‌ت، دڤێت ژن ژنێ‌ فێری وێ‌ چه‌ندێ‌ بكه‌ت كا چه‌وا دێ‌ سه‌ره‌ده‌رییا دروست دگه‌ل زه‌لامێ‌ خوه‌ كه‌ت.

بابه‌تێن ب ڤێ مژارێ ڤه‌ گرێدای