كۆمبوونێن پێنچ قۆلى و قه‌یرانێن وه‌لاتییان

خێرهات نێروه‌یی

ل رۆژا پێنچ شه‌مبا ده‌ربازبوویی، بۆ جارا نه‌هێ‌ هه‌رپێنج لایه‌نێن سیاسی (پارتی، ئێكه‌تی، گۆڕان، یه‌كگرتوو، كۆمه‌ل) ل باژێرێ‌ سلێمانیێ‌ جڤیان و چاڤێ‌ هه‌موو خه‌لكێ‌ كوردستانێ‌ ل هه‌رپێنچ لایه‌نان بوو، داكو پشتی هه‌شت جڤینێن بێ‌ ئه‌نجام و نه‌دانا سێ‌ مووچه‌یان و نه‌بوونا گه‌ره‌نتییا ژیانێ‌، وه‌لاتییان دگۆت سوپاس بۆ خودێ ره‌نگه‌ ئه‌ڤه‌ داوی جڤین بیت و جڤیناكه‌كا پڕی ئه‌نجام و بریار بیت. هه‌ژماره‌كا به‌رچاڤا وه‌لاتییان خوه‌پیشاندان ل همبه‌ری وێ‌ ئۆتیلێ‌ كر، یاكو جڤین تێدا و چه‌ندین به‌ر و شووشه‌ لسه‌ر سه‌رێ‌ وان هاڤێتن، داكو بیر ل به‌رژه‌وه‌ندییا گشتی بكه‌ن و فشارێ‌ بێخنه‌ سه‌ر وان و بگه‌هنه‌ وێ‌ سازانێ‌، یاكو ئیسال ب هزاره‌ها جاران وان لایه‌نان ب ده‌ڤێ‌ خوه‌ گۆتى، لێ‌ په‌رێ‌ وه‌كی به‌رێ‌ ده‌ركه‌ت.

جڤینا نه‌هێ‌، ژ هه‌موو جڤینان كلێستر و وێرانتر بوو، چونكو چو رێز ل ئیراده‌یا خه‌لكێ‌ كوردستانێ‌ نه‌گرت، رێز ل كه‌سوكار و دایكێن شه‌هیدێن شه‌رێ‌ داعشێ‌ و هێزێن پێشمه‌رگه‌ی ل به‌ره‌یێن شه‌ری نه‌گرت، رێز ل وان ماموستا و فه‌رمانبه‌ران نه‌گرت یێن كو سێ‌ مووچه‌ لسه‌رئێك نه‌وه‌رگرتین و مانگرتن راگه‌هاندی، دیسان رێز ل وان خێزانان‌ نه‌گرت یێن پاره‌یێ‌ كڕینا قایشه‌كا پشتێ‌ بۆ زارۆكێ‌ خوه‌ نه‌بیت و بابێ‌ وی ل به‌رۆكێن شه‌ری! ئانكو هه‌رپێنچ لایه‌ن سڤكاتیێ‌ ب هه‌ست و سۆزێن خه‌لكێ‌ كوردستانێ‌ دكه‌ن و چو حسابێ بۆ ناكه‌ن و هه‌ر لایه‌نه‌كی خوه‌زییه‌ك و داخوازییه‌ك هه‌یه‌ و هه‌موو داخوازی بۆ كورسیكێ‌ و به‌رژه‌وه‌ندییا وانه‌، ملله‌ت د جڤینێن واندا تونه‌یه‌ و بۆ جارا نه‌هێ‌ لسه‌ر سازانا پله‌ و پایه‌ و كورسیكێ‌ نه‌گه‌شتن رێككه‌ڤتنێ‌ و بۆ وان نه‌خه‌مه‌، ژبه‌ر كو مووچه‌یێ‌ وان یێ‌ مه‌هه‌كێ‌ 10جاران هندی یێ‌ فه‌رمانبه‌ره‌كییه‌، قه‌یرانا دارایی چو كارتێكرنێ‌ ل وان ناكه‌ت و بلا گه‌ل ژى ژ برسان بمریت.

یاكو ژ هه‌موویێ‌ حێبه‌تیتر ئه‌وه‌؛ ژبلی ئه‌ندام په‌رله‌مانه‌كی، تاكو نهۆ چو وه‌زیر و په‌رله‌مانتاران گه‌فا ده‌ست ژكاركێشانا خوه‌ رانه‌گاهندییه‌، داكو بۆ خه‌لكه‌كی هه‌لوه‌ستێ‌ خوه‌ دیار بكه‌ن و بێژن به‌لێ‌ ئه‌م دگه‌ل خه‌مێن وه‌ینه‌. ئانكو جڤینا نه‌هێ‌ یا لایه‌نان ئه‌وه‌ كو نه‌شیان بێژن دێ‌ جڤینا 10ێ كه‌ین، وان گۆت مه‌ جڤین راگرتینه‌ بۆ ده‌مه‌كێ‌ نه‌دیار، حه‌تا جاره‌كێ‌ خودێ‌ دلێ‌ وان نه‌مرم بكه‌ت. ب راستی ل سه‌ده‌یا 21 رۆژ بۆ رۆژێ‌ دیتن و روودانێن عنتیكه‌ روودده‌ن و هه‌رئێك ژ یادی بالكێشتره‌، ماده‌م دجڤیناندا چو ئه‌نجام نینن و داخوازیێن هه‌موو لایه‌نان د هه‌موو جڤیناندا گۆڕانكاری بسه‌ردا نه‌هاتینه‌ و كه‌س ژ وان ده‌ست ژ پیچه‌ك ژ داخوازیێن خوه‌ به‌رنه‌ده‌ت، ئێدی بلا به‌س بن جڤین و ته‌ماشه‌ی چاره‌یه‌كا دی و رێكه‌كا دی بكه‌ن.

بابه‌تێن ب ڤێ مژارێ ڤه‌ گرێدای