كچه‌كا ئێزدی: چەكدارێن داعش دگۆتن، بێژنه‌ جیهانێ چ ب سه‌رێ هه‌وه‌ دهێت؟!

كچه‌كا ئێزدی: چەكدارێن داعش دگۆتن، بێژنه‌ جیهانێ چ ب سه‌رێ هه‌وه‌ دهێت؟!

Capture

وار – كوردۆ رۆژهات :

”نابیت جیهان ژ وان تاوانێن كو دەولەتا ئیسلامی (داعش) ل دژی ژنان كرین، بێدەنگ بیت”، ئەڤە گۆتنا پەخشان زەنگەنەیه‌ سەرۆكا جڤاتا كاروبارێن خانمان ل هەرێما كوردستانێ.
”پێدڤییە نەتەوەیێن ئێكگرتى و ئێكه‌تییا ئۆرۆپا، ئه‌وا كو ل به‌رانبه‌رى ژن و زاڕۆیێن مه‌ هاتییه‌كرن، ژبیر نه‌كه‌ن”، په‌خشان زەنگەنە داخوازێ دكه‌ت كو جیهان ل همبه‌رى ڕه‌ڤاندنا زاڕۆ و ژنان ژ بال چه‌كدارێن جیهادى ڤه‌ ب ده‌نگ بهێت و كار د ڤێ ئێكێ دا بكه‌ن.
هه‌ژمارا دروستا قوربانیێن ڤێ تاوانا ل دژى ژن و زاڕۆیان، نه‌هاتییه‌ زانین، لێ هه‌تا نوكه‌ ژى ب سه‌دان ژن و زاڕۆ وه‌كو ئخسیر هاتینه‌ زیندانیكرن. ژن ب زۆرى دهێنه‌ ماره‌كرن و دبنە قوربانی. زاڕۆیێن ڕه‌ڤاندى ژى د ئێتیمخانه‌یان دا دهێنه‌ كۆمكرن، یان ب خێزانێن بسورمان دده‌ن، داكو وان ب خودان بكه‌ن. دیده‌ڤانێن ڤان تاوانان دبێژین؛ هه‌تا زاڕۆیێن كچ یێن 13 سالى ژى دیتینه‌ كو ده‌ستدرێژى لسه‌ر هاتینه‌كرن.
”ئه‌ڤه‌ تاوانێن دژى مرۆڤایەتیێنه‌”، زەنگەنە دبێژیت: ”ئه‌و تاوانه‌ دژى هه‌موو تشته‌كێ دى ژى نه‌ و هه‌تا دژى ئاینان ژى نه‌”.
هنده‌ك ژ ژنێن ژ بال چه‌كدارێن داعش ڤه‌ ده‌ستته‌سه‌ركرى باسێ وێ ئێكێ كرینه‌ كو د هولێن مه‌زن دا و ل جهێن وه‌كو مووسل هاتینه‌ ڕاگرتن و رۆژانه‌ ده‌ستدرێژى لسه‌ر وان دهێنه‌كرن.
كچه‌كا 17 سالى كو رۆژنامەیا لا ریپۆبلیكایا ئیتالی هه‌ڤپه‌یڤینه‌ك ب رێیا تێلەفۆنێ دگه‌لدا كرییه‌، گۆتییه كو چەكدارێن داعش رێ ب وان ددا تێلەفۆنان بكاربینن، داكو جیهان ژ وێ ئێكێ بهێته‌ هایداركرن كو چو ل همبه‌رى وان ژنان دهێنه‌كرن.
”بۆ وێ ئێكێ كو زێده‌تر ئازارێ بگه‌هیننه‌ مه‌، چه‌كداران دگۆتنه‌ مه‌ ب هوورى ئه‌و روودانێن ب سه‌رێ هه‌وه‌ دا دهێن، بۆ دایبابێن خوه‌ باسبكه‌ن”. وێ كچا گه‌نج ب ڤى ره‌نگى ب وێ رۆژنامه‌یا ئیتالى راگه‌هاندییه‌؛ ”ئه‌و ب مه‌ دكه‌نه‌ كه‌نى، وه‌سا هزردكه‌ن هه‌تا هه‌تا دێ مینن”.
ب ئاوایه‌كێ به‌رفره‌هـ، كچ و ژنێن ئێزدی ل ڤان دووماهییان شیاینه‌ ل زیندان و ئخسیرییا ده‌ستێ داعشێ خوه‌ ئازادبكه‌ن. هنده‌ك ژ وان ل ده‌مێن ڕه‌ڤینا چەكدارێن داعشێ ژ ترسا بۆردومانێن فڕۆكەیێن شه‌ڕیێن ئەمریكایێ، ده‌لیڤه‌ بۆ په‌یدا بووینه‌ كو خوه‌ ئازادبكه‌ن.
كارمەندێن رێكخراوێن خێرخوازیێن ده‌ڤه‌را دهۆكێ دبێژن؛ ئەو 29 ژنان دنیاسن كو ل ڤێ دووماهیێ ب دیتنا خێزانێن خوه‌‌ شاد بووینه‌ڤه‌. لێ وه‌سا دبینن، گه‌له‌ك ژنێن دى ژ ڤان هه‌نه‌ و خوه‌ ئاشكرا نه‌كرینه‌.
لدووڤ گۆتنا وان ژنێن كو ژ ده‌ستێ داعشێ ڕه‌ڤیاین، هنده‌ك جاران چەكدارێن داعش پەشێمانییا خوه‌ دەربڕییە و رێ بۆ ژنێن زیندانیكرى خوه‌شكرینە هه‌تا كو بڕه‌ڤن.
كچه‌كا 16 سالى یا ڕه‌ڤیاى، ب (رووداو) راگەهاند، د ده‌مه‌كى دا كو چەكدارێن داعشێ ژ وى خانیێ ئه‌و تێدا زیندانیكرى، دووركه‌ڤتبوون، خه‌لكێ سڤیلێ وێ ده‌ڤه‌رێ هاتینه‌ و ده‌رگه‌هێ وى خانى شكاندییه‌.
ڤێ كچا ئێزدى كو دیاركر، د مه‌ها بۆرى دا ژ گونده‌كێ ده‌ڤه‌را شنگالێ بۆ چەندین جهێن دى هاتییه‌ ڤه‌گوهاستن و پاشان ئه‌و ل مووسل هێلایه‌. ل مووسل گڤاشتن لسه‌ر وێ هاتینه‌كرن كو ببیته‌ بسورمان و خوارن ژى نه‌دایه‌ وێ. چه‌ند ژنه‌ك، كو د گه‌ل ڤێ كچا ئێزدى دا بوون، گۆتینه‌ چه‌كدارێن داعش؛ باشه‌ ئه‌م دێ بینه‌ بسورمان. پاشان چه‌كداران ژى وانه‌یێن قورئانێ ب وان ژنان داینه‌.
پاشان كەسێن نەناسكرى هاتن و ئه‌و ژنه‌ برن. ل ده‌ستپێكێ كچێن جوان دبرن. ئه‌وێن دى داینه‌ سه‌ركرده‌یێن داعشێ، ”مه‌ گوهـ لێ بوو دگۆتنه‌ ئه‌میرێن خوه‌، ئه‌ڤه‌ دیاریێن مه‌نه‌ بۆ هه‌وه‌”. ڤێ كچا لاو ئه‌ڤ ئێكه‌ دگۆت. ئه‌ڤ كچه‌ د گه‌ل هه‌ڤاله‌كا خوه‌ دا ل ڤێ دووماهیێ شیا ب دیتنا خێزانا خوه‌ شادببیته‌ڤه‌.
پەخشان زەنگەنە پێ سەیربوو كو دەولەتێن ئیسلامی و ئەرەبی هه‌تا نوكه‌ بێدەنگى هه‌لبژارتییه‌ لدۆر ڤان تاوانێن كو وه‌كو وێ گۆتى ”لژێر ئالایێ لا الە الا اللە دهێنه‌كرن”.
پەخشان ژ وان وه‌لاتێن كو پێشتر پشته‌ڤانییا داعش كرینه‌ و هەموو ئەو ئالیێن كو كاریگەرى لسەر داعشێ هەیە، داخوازێ دكه‌ت كو هەر چو تشتێ ژ ده‌ستێن وان دهێت، بلا بكه‌ن بۆ ئازادكرنا وان ژن و زاڕۆیێن زیندانیكرى.
دەزگه‌هێن حوكمەتا هەرێما كوردستانێ كار لسەر كەیسا وان ڕه‌ڤاندییان دكه‌ت، لێ ئه‌و نووچه‌یێن كو ئاماژه‌یێ ب وێ ئێكێ دكه‌ن كو دبیت وان ژنێن ڕه‌ڤاندى بكڕنه‌ڤه‌، دوورن ژ راستیێ.
پەخشان داخوازێ ژ وان كه‌سان دكه‌ت كو ئەو ژنە زیندانی كرینه‌، رێیێ ب وان بده‌ن كو ڤه‌گه‌ڕنه‌ڤه‌ د ناڤ كه‌سوكارێن خوه‌ دا و بلا بزانن كو ئه‌ڤ ژنه‌ كۆله‌ نینن، به‌لكو مرۆڤن. ئەو دایك و خووشك و كچێن خه‌لكه‌كینه‌.
چیرۆكا وێ ئێكێ ژى كو هنده‌ك ژ ڤان ژنێن ڕه‌ڤاندى ژ بال ئه‌ره‌بان ڤه‌ هاتینه‌ كڕین و پاشان ب نهێنی رەوانەی لده‌ف خێزانێن وان هاتینه‌كرن.
سەرۆكا جڤاتا كاروبارێن خانمان ل هەرێما كوردستانێ داخوازێ دكه‌ت، رێز ل وان ژنێن بهێته‌گرتن كو ژ دەستێ داعشێ ڕه‌ڤینه‌ و ب چاڤه‌كێ دى نه‌هێنه‌ ته‌ماشه‌كرن”. داخوازێ ژ مه‌زنێن ئێزدی و توركمان و مەسیحی و شەبەكان دكەم كو ڤێ ئێكێ بۆ خه‌لكێ خوه‌ رۆنبكه‌ن؛ دڤێت وه‌كو قوربانى ته‌ماشه‌ى ڤان ژنان بكه‌ن، نه‌كو وه‌كو وێ ئێكێ كو وان تاوانه‌ك كربیت”.

بابه‌تێن ب ڤێ مژارێ ڤه‌ گرێدای