كچه‌كا ئێزدی: چه‌كدارێن داعشێ گه‌له‌ك كچێن ئێزدی برینه‌ وه‌لاتێن ئیسلامی

كچه‌كا ئێزدی: چه‌كدارێن داعشێ گه‌له‌ك كچێن ئێزدی برینه‌ وه‌لاتێن ئیسلامی

Capture

وار – ده‌رمان باعه‌دری :

كچه‌كا ئێزدییا خه‌لكا شنگال ب ناڤێ‌ (ع.ع.ا) كو ژیێ بیست ساله‌، پشتی دگه‌ل خێزانا خوه‌ كه‌ڤتییه‌ د ده‌ستێن‌ تیرۆرستێن داعشێ‌ دا، د هه‌یاما چه‌ند رۆژه‌كان دا شیا خوه‌ ژ ده‌ستێن وان قورتال بكه‌ت. ئه‌ڤ كچا ژ ده‌ستێن داعشێ ڕه‌ڤى؛ چیرۆكا خوه‌ و هنده‌ك دیمه‌نێن ب چاڤێ خوه‌ دیتین، بۆ وار ڤه‌گه‌راندن.
ڤێ كچا كو ل ده‌مێ هێرشكرنێ بۆ سه‌ر شنگالێ، كه‌ڤتبوو د ده‌ستێن چه‌كدارێن داعش دا، دبێژیت: ”ل ده‌مێ‌ تیرۆرستێن داعشێ‌ هێرشكرینه‌ سه‌ر ده‌ڤه‌را مه‌، ئه‌ز دگه‌ل هه‌ڤژین و زاڕۆیێ خوه‌ دگه‌ل خه‌لكێ‌ گوندی به‌ر ب ئالیێ‌ چیایێ‌ شنگالێ‌ ڤه‌ چووین، ب رێیێ‌ ڤه‌ ل نێزیكی جدالێ،‌ مه‌فره‌زا داعشێ ئه‌م هه‌موو ده‌سته‌سه‌ر كرین و خڕڤه‌كرینه‌ لده‌ف ئێك و گۆتنه‌ مه‌؛ چو لسه‌ر هه‌وه‌ نینه‌ و ئه‌م چو ل هه‌وه‌ ناكه‌ین. لێ‌ پشتی چه‌ند ساتان، زه‌لامێن گه‌ل مه‌ هه‌موو جوداكرن و ل به‌ر چاڤێن ب كۆم كوشتن و پشتی هینگێ ئه‌م پترى 120 كچ و ژنان ل ترومبێلان سواركرین و برینه‌ به‌عاجێ و ئه‌م هه‌موو ل مه‌خفه‌را پۆلیسان خڕڤه‌كرین و دگۆتنه‌ مه‌؛ هوون دێ‌ هێنه‌ سه‌ر ئۆلا مه‌، ژبه‌ركو ئۆلا هه‌وه‌ باش نینه‌”.
زێده‌تر ب ڤى ئاواى درێژى پێدا: ”پشتی چه‌ند ساتان ل به‌عاجێ، جاره‌كا دی ئه‌م هه‌موو ل ترومبیلان سواركرین و به‌ره‌ڤ باژاڕێ‌ مووسلێ ڤه‌ برین و ل مووسل ژى ئه‌م د ناڤ هۆله‌كێ‌ دا ئاكنجی كرین و رۆژانه‌ وان ئه‌م ئازار دداین و زۆلم و زۆردارى ل مه‌ دكرن و ره‌فتارا وان دگه‌ل مه‌ دا گه‌له‌ك خراب بوو و خوارن ژی گه‌له‌ك كێم ددانه‌ مه‌ و هه‌ر چه‌ند ساتان جاره‌كێ‌ ئه‌میره‌كی وان دادگه‌هـ‌ ب مه‌ دكر و دره‌و دكرن، دگۆتن؛ ئه‌م دێ‌ هه‌وه‌ زڤریننه‌ مالیێن هه‌وه‌، لێ‌ د‌ره‌و ل مه‌ دكرن و هه‌ر جاره‌كێ‌ چه‌ند كچ لناڤ مه‌ ژێ دگرتن و دگۆتنه‌ ئێكدو ئه‌م دێ‌ ڤان به‌ینه‌ وه‌لاتێن ئیسلامی”.
ڤێ كچا ئێزدى باسێ خوه‌ ژى كر كا ئه‌میر و چه‌كدارێن داعشێ دخواست چو ب سه‌رێ وێ بینن، ”رۆژ بۆ رۆژی هنده‌ك ژن د ناڤ مه‌ دا دبرن، پشتی ئه‌ز ژی بریمه‌ د ماله‌كێ‌ دا و زاڕۆیێ من یێ‌ بچووك ژی دگه‌ل من بوو و ژنه‌كه‌ دانعه‌مر د وێ‌ مالێ‌ دا بوو، وی ئه‌میرێ داعشێ كو ئه‌ز بریم، گۆته‌ من؛ دێ‌ ته‌ بو خوه‌ به‌م، لێ‌ من ئه‌و ئێكه‌ ره‌تكر و من گۆتێ؛‌ من دڤێت توو من بكوژی و ئه‌ز وه‌ناكه‌م. ئه‌ڤجا پشتی من ره‌تكری، په‌یوه‌ندى ب ئێكی كر و گۆتێ‌ سوبه‌هى وه‌ره‌ ڤێ‌ كچێ‌ ببه‌ وه‌لاتێ‌ سووریا و پشتی بوویه‌ شه‌ڤ، ئه‌ز ب تنێ‌ د خانی ڤه‌ بووم، من ده‌رگه‌هـ شكاند و ئه‌ز ب ڕه‌ڤ هه‌ر چووم هه‌تا ل خێزانه‌كێ‌ راست بووم و من خوه‌ هاڤێته‌ به‌ختێ‌ وان و چیرۆكا خوه‌ بۆ وان گۆت، ب راستی وان پێشوازی ل من كر و پشتی دو رۆژان ل مالا وان، په‌یوندی ب ئێكی كورد كرن و وی ئه‌ز گه‌هاندمه‌ سنورێ‌ هێزێن پێشمه‌رگه‌ لێ”.

بابه‌تێن ب ڤێ مژارێ ڤه‌ گرێدای