كچه‌كا ئێزدى باسێ ئازارێن خوه‌ لژێر سیبه‌را داعشێ دكه‌ت

كچه‌كا ئێزدى باسێ ئازارێن خوه‌ لژێر سیبه‌را داعشێ دكه‌ت

Capture

وار – كوردۆ رۆژهات :

كچه‌كا ئێزدى كو ژ بال ده‌وله‌تا ئیسلامی (داعش) ڤه‌ هاتبوو ده‌سته‌سه‌ركرن، باسێ چیرۆكا خوه‌ د‌كه‌ت لژێر ده‌ستهه‌لاتا ده‌وله‌تا ئیسلامی دا، كا چاوا وه‌كو كه‌نیزه‌ك مامه‌له‌ د گه‌ل وێ دا دكه‌ن و ب ئاوا‌یه‌كی دوور ژ هه‌موو ئاداب و ره‌وشتێن مرۆڤایه‌تیێ ده‌ستدرێژى دكرنه‌ لسه‌ر وێ.
مایات ناڤێ ئاشۆپیێ ڤێ كچا ئێزدییا 17 سالییه‌ كو ل رۆژا 3ی ته‌باخا 2014ێ، د هێرشه‌كا چه‌كدارێن داعش دا بۆ ده‌ڤه‌را شنگالێ هاتییه‌ گرتن و هه‌تا نوكه‌ ژى لده‌ف ڤان چه‌كدارانه‌.

مایات كو‌ پیچه‌كا زمانێ ئینگلیزی د‌زانیت و لبه‌ر بوو ژده‌رڤه‌ى وه‌لاتى بخوینیت، ژ بال چه‌كدارێن داعش ڤه‌ رێ پێ هاتییه‌دان كو په‌یوه‌ندیێ ب مالا خوه‌ بكه‌ت، لێ ئه‌ڤ په‌یوه‌ندییه‌ یا جودایه‌ ژ وان په‌یوه‌ندیێن كو هه‌ر كچه‌كا دوورى وه‌لاتى، دگه‌ل مالا خوه‌ دكه‌ت، ژبه‌ركو چه‌كدارێن داعش مایات نه‌چار كرییه‌ د وان په‌یوه‌ندییان دا، باسێ وان ده‌ستدرێژییان بكه‌ت كو ژ بال چه‌كدارێن داعش ڤه‌ لسه‌ر وێ دهێنه‌كرن.
مایات دبێژیت: ”بۆ وێ ئێكێ كو چه‌كدارێن داعش مه‌ گه‌له‌ك پتر ئازار بده‌ن، ئه‌م نه‌چار دكرین كو په‌وه‌ندیێ ب خێزانێن خوه‌ بكه‌ین و ب هوورى باسێ وان ده‌ستدرێژییان بكه‌ین كو ئه‌و چه‌كداره‌ لسه‌ر مه‌ دكه‌ن”.
دایبابێن مایاتێ كو‌ نوكه‌ ئاواره‌نه‌، هه‌ژمارا ته‌له‌فۆنا كچا خوه‌ دایه‌ رۆژنامه‌یه‌كا ئیتالی ب ناڤێ (Italian paper La Repubblica).
د ڤێ هه‌ڤپه‌یڤینێ دا كو وێ رۆژنامه‌یا ئیتالى دگه‌ل مایاتێ كرییه‌، ئه‌و كچا ئێزدى هیڤى ل وان كرینه‌‌ كو ناڤێ دروستێ وێ بلاڤ نه‌كه‌ن و ب وان راگه‌هاندییه‌، ”ئه‌ز گه‌له‌ك شه‌رمێ دكه‌م ژ ئه‌وا ب سه‌رێ مه‌ ئیناى”.
مایا دبێژیت: ”گه‌له‌ك جاران حه‌زدكه‌م بمرم و لژێر ئاخێ من ڤه‌شێرن و هه‌تا هه‌تا ل وێرێ بمینم، لێ هنده‌ك جاران ژى ئۆمێدا وێ ئێكێ دكه‌م، قورتالبم و جاره‌كا دى هه‌مبێزا خێزانا من لبه‌ر من ڤه‌بیت”.
نێزیكى 40 كچ و ژنێن ئێزدی كو‌ لدووڤ ئاخڤتنا مایاتێ، ژیێ وان د ناڤبه‌را 12 – 30 سالیێ دانه‌، ژ بال چه‌كدارێن داعش ڤه‌ هاتینه‌ ڕه‌ڤاندن و برینه‌ جهه‌كێ به‌رزه‌ كو كه‌س چو ژێ نه‌زانیت.
ده‌ما كو وى رۆژنامه‌ڤانێ ئیتالى پرسیارێ ل مایاتێ د‌كه‌ت كا چه‌كداران چو ل وان دكه‌ن، ئه‌ڤ كچا ئێزدى به‌رسڤدا و گۆت: ”ما دێ چو ل مه‌ كه‌ن؟ ئه‌ز گه‌له‌ك شه‌رم دكه‌م باسێ ڤێ ئێكێ بكه‌م، ب راستى نزانم چاوا دێ باسێ وان ئازار و ئه‌شكه‌نجه‌دانان كه‌م”.
د هه‌مان هه‌ڤپه‌یڤین دا، مایات باسێ وێ ئێكێ دكه‌ت كو ”چه‌كدارێن داعش ئه‌و كرینه‌ د چه‌ند خانییان ڤه‌ و ب هوورى چاڤدێرییا وان دكه‌ن”. ئه‌و كچا ئێزدى ئه‌و ئێكه‌ ژى گۆت: ”سێ ژۆرێن گه‌له‌ك ب ترسن هه‌نه‌ كو ده‌ستدرێژیێن سێكسی تێدا دهێنه‌كرن، گه‌له‌ك جاران د رۆژه‌كێ دا چه‌ند چه‌كداره‌ك ده‌ستدرێژییا سێكسی د‌كه‌نه‌ سه‌ر كچه‌كێ”.
مایات ئه‌و ژى باسكر، ”هه‌كه‌ر ئه‌و بزاڤا به‌ڕه‌ڤانیكرنێ ل خوه‌ بكه‌ن، چه‌كدارێن داعش وان دترسینن و گه‌له‌ك ئازار ژى دده‌ن، له‌و گه‌له‌ك جاران هیڤییان دكه‌م كو من هند ئازار بده‌ن هه‌تا كو ئه‌ز گیانێ خوه‌ ژده‌ست بده‌م”.
دیسان زێده‌تر وه‌ها دبێژیت: ”هنده‌ك ژ وان كچان‌ گره‌ف ژ ئاخڤتنێ گرتبوو و ژبه‌ر ڤێ ئێكێ ژى هاتینه‌ دوورئێخستن و چاره‌نڤیسێ وان دیار نینه‌، هه‌تا نوكه‌ ژى گه‌له‌ك ژ كچێن ڕه‌ڤاندى، بزاڤێن خوه‌كوشتنێ كرینه‌”.
مایاتێ گۆتژى، ”گه‌له‌ك جاران وه‌سا هه‌ستدكه‌م كو چو ئه‌ڤ زۆردارییا لسه‌ر مه‌ ب دووماهى ناهێت، و هه‌كه‌ر هاتو ب دووماهى ژى هات، هه‌تا هه‌تا ئه‌ڤ ئازاره‌ دێ دگه‌ل مه‌ دا مینن”.
مایاتێ ب ڤێ گۆتنێ دووماهى ب هه‌ڤپه‌یڤینا خوه‌ دگه‌ل وێ رۆژنامه‌یا ئیتالى ئینا، ”چه‌كدارێن داعش دووماهى ب له‌شێ من ئینایه‌ و نوكه‌ مژوولن كو دووماهیێ ب روحا من بینن”.

بابه‌تێن ب ڤێ مژارێ ڤه‌ گرێدای