كوڕێن دهۆكێ ده‌لیڤه‌یا ده‌ربازبوونێ ژ ده‌ستدا به‌لێ ئاسته‌كێ باش پێشكێشكر

كوڕێن دهۆكێ ده‌لیڤه‌یا ده‌ربازبوونێ ژ ده‌ستدا به‌لێ ئاسته‌كێ باش پێشكێشكر

وار – دهۆک :

تيما ته‌پاپێی یا یانه‌یا دهۆك ده‌لیڤه‌یا ده‌ربازبوونێ بۆ یاریێن دوماهییا خولا ئیراقێ ژ ده‌ستدا پشتی دگه‌ل یانه‌یا جه‌وییه‌ ب دو گۆلان هاتییه‌ دۆراندن، دیارییا واندا ئه‌وا ل شه‌ڤا شه‌مبییا بۆری ژ چوارچووڤه‌یێ یاریێن گه‌ڕا پێنچێ ژ كۆما دووێ یا قۆناغا دوماهییا خولێ ل یاریگه‌ها شه‌عب هاتییه‌كرن. د ماوه‌یێ نیڤا ئێكێ دا یاریكه‌رێن جه‌وییه‌ گڤاشتن لسه‌ر گۆلا دهۆكێ كرن و شیان مه‌ترسیه‌كا به‌رچاڤ لسه‌ر په‌یدابكه‌ن، به‌لی گۆلچیێ دهۆكێ كاوه‌ دینۆ شیا دو جارا تیما خۆ ژ گوله‌كێ قۆرتالبكه‌ت دخوله‌كێن 28ێ و 41ێ، به‌لێ د خوله‌كا 45ی ده‌رئه‌نجامێ خه‌له‌تیه‌كا یاریكه‌رێ هێلا به‌رگرییا دهۆكێ موسته‌فا كه‌ریم شیا گۆلا ئێكێ بۆ تیما خۆ جه‌وییه‌ تۆمابكه‌ت، دڤێ نیڤێ دا شێوازی یارییا دهۆكێ به‌رگری بوو به‌ری ئێرشبرنێ. دنیڤا دووێ دا هه‌ردو تیم ب هه‌مان ئاست هاتنه‌ دناڤ یاریی دا و پشتی بۆرینا شه‌ش خوله‌كان موسته‌فا كه‌ریم زڤڕیڤه‌ گۆلا دووی بۆ یانه‌یا خۆ تۆماركر، دماوه‌یێ مایی دا یاریكه‌رێن دهۆكی هنده‌ك بزاڤێن كێم هه‌بوون به‌لێ كێم شاره‌زاهییا وان نه‌شیان مفایی ژێ وه‌ربگرن تا فیركا دادڤانی ب سه‌ركه‌ڤتنا جه‌وییه‌ ب دو گۆلان ب دوماهی هاتی.
ژلایه‌كێ دیڤه‌ و دهه‌مان كۆمدا مینا سه‌ركه‌ڤتن لسه‌ر نه‌فت ئه‌لجنۆب تۆماركر ب گۆله‌كێ بێی به‌رامبه‌ر. بڤان ئه‌نجامان یانه‌یا جه‌وییه‌ وه‌كو خودانا رێزا ئێكێ ب10 خالان و ده‌ربازبوو یارییا دوماهیێ، مینا ب هه‌مان خال كێمترییا گۆلان لرێزا دووێ دهێت و ده‌ربازبوو یارییا ده‌ستنیشانكرنا خودانا رێزا سێیێ، نه‌فت ئه‌لجنۆب و دهۆك ب پێنج خالان لرێزێن سێیێ و چارێ هاتن.
تێ زانین د كۆما ئێكێ دا یانه‌یا نه‌فت ئه‌لوه‌سه‌ت ب 14 خالان ده‌ربازبوو یارییا دوماهییا خولێ و شورته‌ ب 10 خالان خودانا رێزا دووێ بۆ یارییا ده‌ستنیشانكرنا رێزا سێیێ ده‌ربازبوو یاریێن دوماهیێ.
– ل 10/7/2015 (شورته‌×مینا).
– یارییا دوماهیێ 11/7/2015 (جه‌وییه‌×نه‌فت ئه‌لوه‌سه‌ت).
لدۆر یارییا دهۆكێ و ئاستێ وێ ئاشتی مسته‌فا هاریكارێ راهێنه‌رێ دهۆكێ گۆت دۆراندن همبه‌ری جه‌وییه‌ ب ئاسایی دهه‌ژمێرین ژبه‌ركو خالێن سه‌ركه‌ڤتنێ لده‌ڤ هه‌بوون ئه‌وژی تیمه‌كا پری ستێرێن ته‌پاپێی یێن هه‌لبژارتیێ ئیراقی و پیشه‌كارێن سوری بوون، دیسان یاری دناڤ ئه‌رد و جه‌ماوه‌رێ خۆ دا دكر، هه‌رچه‌نده‌ ئه‌م كێماتیێ بۆ تیما خۆ ژی نا دانیت سه‌ره‌رایی كاودانێن تیمێ ژ هه‌مو لایه‌نانڤه‌ كو تیمه‌كا خودان یاریكه‌رێن كێ شاره‌زابوویه‌، به‌لی دڤی یاریێ دا تیما مه‌ تا راده‌یه‌كی ئه‌و ئاستێ چاڤه‌ڕێكری نیشان نه‌دا و هنده‌ك یاریكه‌ر ژبه‌ر گڤاشتنێن جه‌ماوه‌ری و هۆكارێ ده‌رۆنی بۆ ئه‌گه‌ر خه‌له‌تیێن كه‌سۆكی دناڤ هنده‌ك یاریكه‌ران دا په‌یدابن و جه‌وییه‌ ب شاره‌زاهییا یاریكه‌رێن خۆ گولێ تۆماربكه‌ن، هه‌رچه‌نده‌ لدویڤ كاودانان ئه‌م ژ ئاستێ یاریكه‌ران رازینه‌، به‌لێ گه‌شبینم بۆ وه‌رزێ بهێت تیم بڤان یاریكه‌ران دێ باشتر بیت دگه‌ل گوهۆریێن كارگێری دناڤ تیمێ دا دكه‌ت، لدوماهیێ ئاشتی موسته‌فایی هاتنا تیمێ بۆ ڤێ قۆناغێ ب ده‌ستكه‌ڤت قه‌له‌م دا و گۆت، كورێن دهۆكێ قه‌با هه‌ر زه‌حمه‌ته‌ك و نه‌خووشی و كاودانێن یانێ كر و شیان تیمێ بگه‌ینه‌ ڤێ قۆناغێ همبه‌ری وێ گه‌له‌ك تیمێن ملیارات پارڤه‌كرین نه‌شیان بگه‌هنه‌ ڤێ قۆناغێ ده‌ستخووشیا یاریكه‌ران و كادرێ راهێنانێ دكه‌ین و هه‌روه‌سان كارگێرییا یانه‌یێ و پارێزگه‌رێ دهۆكێ ئه‌وێ لدویڤ شیانان پشته‌ڤانییا تیمێ دكرن.
ژلایه‌كێ دیڤه‌ فالح موسا ئه‌ندامێ ئێكه‌تییا ته‌پاپێی یا ئیراقێ په‌سنا یاریكه‌ر و راهێنه‌ر و كارگێرییا یانه‌یا دهۆكێ كر ژبه‌ر رۆلێ وان یێ مه‌زن و راوه‌ستیان همبه‌ری نه‌خووشترین ده‌م و نه‌بوونا هه‌ڤبه‌ست و مووچه‌ و چوونا یاریكه‌ر وراهێنه‌رێن وێ گۆت، ئه‌گه‌ر یانه‌یا دهۆك ده‌ربازنه‌با قۆناغا دوماهیێ ژی كه‌سێ چو گازنده‌ لسه‌ر نه‌بوون، به‌لێ ده‌ربازبوون و هه‌ڤڕكی بۆ پلێتا یاریێن دوماهیێ ئه‌و جهێ راوه‌ستیانێیه‌، چونكو گه‌له‌ك یا بزه‌حمه‌ته‌ یانه‌یه‌ك بشێت و دكاودانین نه‌خووش دا و بێی یاریكه‌رێن شاره‌زا ئه‌نجامان بده‌ستخۆڤه‌بینت، ده‌ستخووشا یانه‌یا دهۆكێ دكه‌م و هیڤییا مه‌ ئه‌وه‌ ئه‌و به‌رده‌وامیێ بده‌نه‌ پشت به‌ستنێ لسه‌ر یاریكه‌رێن خۆ بۆ وه‌رزێ بهێت چنكو پێكهاتییه‌كێ نموونه‌یه‌.
ژلایه‌كی دیڤه‌ ره‌شید هوشیار ره‌شید ئێك ژ جه‌ماوه‌رێن یانه‌یا دهۆك دیاركر كو هاتنا تیما دهۆكێ بۆ ڤێ قۆناغێ ده‌ستكه‌ڤتا دووێ بوو پشتی یا 2009ێ و گۆت، هه‌رچه‌نده‌ دۆراندنا تیمێ دگه‌ل جه‌وییه‌ هنده‌ك ئه‌گه‌ر هه‌بوون كو گرێدایی ب ئاست و شیانێن ژێك جیاواز یین هه‌ردو تیماڤه‌ بوون كو تیما جه‌وییه‌ خودان یاریكه‌رێن شاره‌زا و پیشه‌كار همبه‌ری وی تیما دهۆكێ كێم شاره‌زاهی هه‌بوو و یاریكه‌رێن گه‌نج، دیسان دناڤ ئه‌رد و جه‌ماوه‌ری خۆ دا دكر، به‌لێ ئه‌ز هاتنا تیمی بۆ قۆناغا دوماهیێ ب ده‌ستكه‌ڤت و دیرۆكه‌كا مه‌زن دبینم هه‌روه‌كو ده‌ستكه‌ڤتا ناسناڤێ خولا ئیراقێ یا وه‌رزێ 2009/2010ێ، هیڤییا مه‌ ئه‌وه‌ كارگێرییا یانه‌یێ بۆ وه‌رزێ بهێت ئه‌ڤێ تیمێ بهێلیت و سی پیشه‌كاران لسه‌ر تیمی زێده‌كه‌ت دگه‌ل ئینانا راهێنه‌ره‌كی خودان شیان.

بابه‌تێن ب ڤێ مژارێ ڤه‌ گرێدای