كولتۆرێ 50-50 و دیالۆگه‌كا خرش

 

ته‌حسین ناڤشكى :

به‌رى پترى ژ 22 سالان، ده‌مێ هه‌لبژاردنێن نه‌خریێن په‌رله‌مانێ هه‌رێما كوردستانێ هاتینه‌ ئه‌نجامدان، ئه‌نجامێن هه‌ردو ده‌ڤه‌رێن زه‌ر و كه‌سك گه‌له‌ك نێزیكى هه‌ڤ بوون، ژبه‌ر هندێ پشتى دانوستانده‌كا ماراتۆنى ل ناڤبه‌را هه‌ردو سه‌ركرداتیێن ده‌ستهه‌لاتا هه‌رێمێ ل وى وه‌ختى، دوماهیێ پارتى و ئێكه‌تى، گه‌هشتنه‌ دارشتنه‌ك (ته‌وافقى) كو سیسته‌مێ په‌رله‌مانێ كوردستانێ 50-50 ل ناڤبه‌را هه‌ردو ئالیێن هه‌ڤڕك بهێته‌ پارڤه‌كرن.
سه‌ره‌رایى وان گوهۆڕینێن ل ڤان سالێن بۆهرین ب سه‌ر جیهانێ و ده‌ڤه‌رێ دا هاتین، دیاره‌ هه‌تا نها ده‌ستهه‌لاتا هه‌رێما كوردستانێ نه‌كارییه‌ خوه‌ ژ گرێیا كولتۆرێ 50-50 رزگار بكه‌ت. دێ بینین هه‌تا ناڤێن رێكخراوێن توێژێن جوداجودا یێن سه‌ر ب ڤان هه‌ردو حزبانڤه،‌ د سازیێن فه‌رمى دا ب شێوه‌یێ 50-50 دهێنه‌ بكارئینان. تنێ بۆ نموونه‌، د چوارچۆڤه‌یێ په‌رله‌مانى و حوكمه‌تێ دا، ده‌مێ كاربده‌سته‌ك ناڤێ فێرخوازى یان ره‌گه‌زێ مێینه‌ دهینت، دڤێت بێژت: (قوتابى و خویندكار، ئافره‌ت و ژن))… هتد.
دبت هه‌تا نۆكه‌ ژى خه‌لكه‌ك هه‌یه‌ ره‌خنه‌یێ ل ڤى كولتۆرى دگرت كو هه‌ردو لایه‌ن نه‌كارینه‌ خوه‌ ژ ڤێ گرێیا به‌رته‌نگا حزبایه‌تیێ رزگار بكه‌ن. خالا بالكێش، پشتى هه‌لبژاردنێن جڤاتێن پارێزگه‌هان و په‌رله‌مانێ ئیراقێ به‌رى نێزیكى 8 مه‌هان هاتینه‌ ئه‌نجامدان، ریالستێ هه‌یى دیاركر، هه‌مان گرێ نه‌ تنێ د ناڤبه‌را پارتى و ئێكه‌تى دا هه‌یه‌، دبت د ناڤبه‌را ئێكه‌تیێ و گۆڕانێ ژى دا هه‌یه‌.
هه‌چیێ ئاگه‌هـ ژ ڤێ مژارێ هه‌بت، د ڤان 6-7 مه‌هێن ده‌ربازبووین دا، دیالۆگا خرشا ل ناڤبه‌را ڤان هه‌ردو حزبان، ل ده‌ڤه‌را به‌رێ كه‌سك و نها مۆر و كه‌سك، ژ سینۆرێ دیالۆگێ ده‌رازبوو و به‌ره‌ڤ ئازراندن و جڕه‌كێشانه‌ك به‌رده‌وام دچۆ، بێى بگه‌هنه‌ ئه‌نجامێن كو خه‌لك پێ رازیى ببت. راسته‌ رێژه‌یا گۆڕانێ ل سلێمانیێ، د هه‌لبژردنێن 31- نیسانا ئه‌ڤ ساله‌ دا، نێزیكى كورسیكه‌كێ پتربوو ژ ئێكه‌تیێ، لێ ئێكه‌تیێ چاوا ل هه‌لبژاردنێن 19-5-1992 داگێڕان بۆ پارتى نه‌كر، سه‌ره‌رایى رێژه‌یا پارتى پتر بده‌ستڤه‌ئیناى، وه‌سا بۆ گۆڕانێ ژى نه‌كر و هینگێ راوه‌ستیا، هه‌تا كولتۆرێ 50-50 ل ده‌ڤه‌را كه‌سك ژى سه‌پاندى!
ئه‌ڤ ره‌فتارا لجه‌م لایه‌نێن ده‌ستهه‌لاتێ ل هه‌رێما كوردستانێ دیار دكه‌ت كو راسته‌ ب رۆخسارى ئه‌ڤ حزبه‌ خوه‌ دگه‌ل جیهانه‌ك شارستانى دبینن، لێ ریالست به‌ره‌ڤاژه‌ و هێشتا ب ئه‌قلیه‌ته‌كا كه‌ڤن سه‌ره‌ده‌ریێ دگه‌ل كێشه‌یێن خوه‌ یێن چاره‌نڤیساز دكه‌ن و لایه‌نه‌ك داگێڕانێ پێخه‌مه‌ت به‌رژه‌وه‌ندیا گشتى بۆ هه‌ڤڕكێ خوه‌ ناكه‌ت و ئارمانجا سه‌ره‌كى پاراستنا به‌رژه‌وه‌ندیێن به‌رته‌نگه‌ د هه‌ڤڕكییا هه‌ر كێشه‌یه‌كێ دا.
هه‌لبه‌ت هه‌كه‌ سیسته‌مێ 50-50، به‌رى بیست و دوسالان ل ناڤبه‌را پارتى و ئێكه‌تى هاتبیته‌‌ لێكڤه‌كرن، ژبه‌ر لاوازییا رۆلێ حزبێن دى یێن سیاسى د ده‌ستهه‌لاتا هه‌رێمێ دا، گه‌له‌ك باندۆرا خوه‌ لسه‌ر هه‌ڤكێشا سیاسى ل هه‌رێمێ نه‌بت، ئه‌ڤرۆ حزبێن دى یێن سیاسى ژى تایبه‌ت ئیسلاما سیاسى رۆله‌ك گرنگ د ڤێ هه‌ڤكێشا سیاسى دا دگێڕن. هه‌كه‌ ئێكه‌تیێ و گۆڕانێ لسه‌ر به‌هرا ڤان حزبان، تایبه‌ت پارتى، ئێكگرتوو، كۆمه‌لێ و حزبێن دى ئه‌ڤ رێكه‌ڤتنه‌ كربت، پارسه‌نگا هه‌ڤكێشێ دێ به‌ره‌ڤ تێكدانێ چت. ژبه‌ر كو هه‌مى پارچه‌یێن هه‌رێمێ ب چارچۆڤه‌یێ گشتى یێ هه‌رێمێڤه‌ گرێداینه‌. واته‌ هه‌كه‌ سیسته‌مێ فیڤتى فیڤتیێ سلێمانیێ ئه‌ڤ حزبه‌ پشتگوهاڤێژتبن، پارتى ژى دێ ل ده‌ڤه‌را زه‌ر هه‌مان پێنگاڤێ ڤاڤێژت و ئه‌ڤه‌ ژى د به‌رژه‌وه‌ندییا گشتى دا نینه‌. پرسیار ئه‌وه‌ ئه‌رێ گۆڕان و ئێكه‌تى دێ لێزڤرینه‌كێ ل لێكڤه‌كرنا سیسته‌مێ خوه‌یێ فیڤتى فیڤتێ‌ كه‌ن و ئالیێن دى ژى رازى كه‌ن به‌شداریێ د پۆسته‌یێن ئیداریێن سلێمانیێ و هه‌له‌بجه‌ دا بكه‌ن، یان دێ دیالۆگا خرش به‌رده‌وام بت و كولتۆرێ 50-50 دێ هه‌ر خوه‌ سه‌پینت؟

بابه‌تێن ب ڤێ مژارێ ڤه‌ گرێدای