كورد ژ چوارچۆڤه‌كرنێن هه‌رێمی به‌ره‌ڤ ئازادیێن ڤه‌كریێن نێڤده‌وله‌تی

 

نووری بریمۆ :

ب به‌رده‌وامی، ملله‌تێ كورد بزاڤكرینه‌ داكو هه‌ڤده‌رێن خوه‌ یێن ئه‌ره‌ب، ترك و فارس قاییل بكه‌ت كو ئه‌ڤ پارچه‌ ئه‌ردێ جیۆسیاسی یێ كو ملله‌تێن مه‌ لسه‌ر دژین، هه‌كه‌ پێكهاتن و هه‌ڤپشكیێن سیاسی د ناڤبه‌را پێكهاتیێن وان یێن دینی، نه‌ته‌وه‌یی و تائیفیدا نه‌بن، ئه‌و نه‌شێن ب خوه‌شی و به‌خته‌وه‌ری پێكڤه‌ بژین. ئانكو ب به‌رده‌وامی لایه‌نێ كوردی دوپاتی لسه‌ر چاره‌كرنه‌كا ریشه‌یی بۆ كێشه‌یا خوه‌ یا نه‌ته‌وه‌یی دگه‌ل نه‌ته‌وه‌یێن هه‌ڤده‌رێن خوه‌ كرییه‌، لێ وه‌سا دیاره‌ كو تاكو نهۆ، لایه‌نێن په‌یوه‌ندیار به‌رێ خوه‌ نه‌دایه‌ مافێ 50 ملیۆن وه‌لاتیێن كورد، ئه‌ڤ یه‌كه‌ ژی دهێته‌كرن چنكو ملله‌تێن هه‌ڤده‌رێن كوردان د ماف و ئه‌ركێن خوه‌ نه‌گه‌هشتینه‌، هه‌ر ژبه‌ر سه‌رهشكییا رژێمێن دكتاتۆریێن كوردستان لسه‌ر خوه‌ پارڤه‌كری، كوردستانێ گه‌له‌ك شۆرش و سه‌رهه‌لدانێن ئێك لدووڤ ئێك ب خوه‌ڤه‌ دیتینه‌، پێخه‌مه‌ت گوهۆرینا ڤی ژیواری هه‌یی، داكو ل شوونا وێ ژیواره‌كێ نوو ببینیت و هه‌موو مافێن هاتینه‌ ده‌ستبسه‌رداگرتن، و جاره‌كا دیتر ئه‌و ماف بۆ خۆدانێن وان یێن ره‌سه‌ن كو كوردن، بهێنه‌ ڤه‌گه‌راندن، چنكو نهۆ كورد لسه‌ر رێیا دامه‌زراندنا ده‌وله‌تا خوه‌ یا نه‌ته‌وه‌یی لسه‌ر ئه‌ردێ باب و كالێن خوه‌ وه‌كو هه‌موو ملله‌تێن دیتر دمه‌شن.
ب داخڤه‌ ئه‌م دبێژین كو ژبلی سه‌ره‌ده‌ریێن هشك ل همبه‌ری داخوازیێن كوردان، چو دیتر نه‌هاته‌كرن، ب به‌رده‌وامی كوردان خوه‌ ل همبه‌ری ده‌رگه‌هێن گرتی و كار و گۆتنێن هنده‌كان یێن كو دبێژن كورد گاور و خودانكه‌رێن تیرۆریستانه‌، دیتینه‌، پێخه‌مه‌ت ده‌ستبسه‌رداگرتنا نامووس و داگیركرنا ئه‌ردێ وان.
ب بۆرینا وه‌ختی و تاكو ڤی سه‌رده‌مێ مه‌ یێ نهۆ كو رێكخراوا تیرۆریستییا داعش رابوویه‌ ب گه‌فكرن و داگیركرنا ده‌ڤه‌رین كوردستانی، بۆ ڤێ یه‌كێ ژی، داعش هاریكارییان ژ رژێما سووریێ و مه‌زنێن خوه‌ یێن هه‌رێمی وه‌رگریت، له‌و باوه‌ری بۆ ملله‌تێ كورد چێبوویه‌ كو چو گیان د ویدا نینه‌، ئه‌وێ ملله‌تێ كورد داخوازا دانوستاندنان دگه‌ل دكه‌ت، له‌و لسه‌ر ملله‌تێ كورد فه‌ردبیت كو كاری بكه‌ت پێخه‌مه‌ت خوه‌داقوتانێ ژ تۆزا بۆری و خوه‌ئازادكرنێ ژ وان به‌ربه‌ستێن ل همبه‌ری وی هاتینه‌ دانان، هه‌روه‌سا خوه‌قۆرتالكرن ژ دۆرپێچا هه‌رێمییا بۆ ماوه‌یێ چاخان بێهنا ملله‌تێ كورد ته‌سككری و خوه‌به‌رهه‌ڤكرن بۆ قۆناغه‌كا نوو كو ناڤێ وێ (چوونه‌ به‌ره‌ڤ ئازادیێن نێڤده‌وله‌تی) كو ل پترییا وه‌ختان، ئارامی ل وێرێ هه‌یه‌.
هه‌ر لدۆر ڤێ یه‌كێ، بۆ ماوه‌یێ گه‌له‌ك سالان، ملله‌تێ كورد بزاڤكرینه‌، داكو بازنه‌یێ هه‌ڤالێن خوه‌ یێن جیهانى به‌رفره‌هـ بكه‌ت، پشتی ئێخستنا رژێما سه‌ددام حسێنی، كورد شیاینه‌ هه‌ڤالینیێ دگه‌ل هند وه‌لاتێن ئۆرۆپی چێبكه‌ن، ب تایبه‌تی ژی دگه‌ل ئه‌مریكا، شوونده‌ستێ ژ هه‌مووان ژی پتر د پێشئێخستنا په‌یوه‌ندیێن كوردان دگه‌ل وه‌لاتێن ئۆرۆپی و ئه‌مریكادا د دیار، یێ به‌رێز مه‌سعود بارزانی سه‌رۆكێ هه‌رێما كوردستانێیه‌، چنكو جه‌نابێ وی رۆله‌كێ دیرۆكی د ڤی بابه‌تیدا گێرایه‌، داكو ملله‌تێ كورد پشته‌ڤانییا نێڤده‌وله‌تی بده‌ستخوه‌ڤه‌ بینیت پێخه‌مه‌ت پێشئێخستنا هه‌رێما كوردستانێ كو ل ڤێ دوماهیێ بوویه‌ ئه‌گه‌رێ چێبوونا هه‌ڤپه‌یمانییه‌كا نێڤده‌وله‌تی بۆ لێدانا داعشێ و هه‌ڤالێن وێ، نه‌خاسمه‌ وه‌ختێ ترسا وان نێزیكی باشۆر و رۆژئاڤایێ كوردستانێ بوویی، ئانكو هندی ئه‌وا ده‌رباره‌ی په‌یوه‌ندیێن هه‌رێمێ و ئه‌مریكا دهێته‌ گۆتن، ئه‌و ژ چو ڤالاتییان نه‌هاتییه‌، به‌لكو ئه‌و به‌رهه‌مێ وێ ستراتیژیێیه‌، یاكو به‌رێز سه‌رۆك بارزانی كێشایی.
ژبه‌ر ڤێ رێیا سه‌ركه‌ڤتییا كوردان به‌ره‌ڤ نێڤده‌وله‌تیكرنا دۆزا خوه‌، كورد پێشه‌نگا دیمه‌نێ سیاسی و له‌شكریێ ئیراقێ و سووریێ و هه‌موو ده‌ڤه‌رێنه‌، هه‌ولێر بوویه‌ قۆناغ و جهێ پووته‌پێدانا هه‌موو جیهانێ، دۆز و ده‌نگۆباسێن كوردان سه‌رپشكێن هه‌موو ده‌زگه‌هێن راگه‌هاندنا جیهانی و ناڤخوه‌یینه‌، ل هه‌مان وه‌خت ژی، ئه‌م یێ دبینین ئه‌مریكا یا گڤاشتنان لسه‌ر وه‌لاتێن هه‌رێمی دكه‌ت، داكو ئه‌و ئاسانكارییان بۆ كوردان بكه‌ن پێخه‌مه‌ت راوه‌ستیانێ ل همبه‌ری ترسا داعشێ، باشترین به‌لگه‌ژی لسه‌ر ڤێ یه‌كێ ئه‌وه‌ وه‌ختێ توركیا رێدایه‌ پێشمه‌رگه‌ دناڤ ئه‌ردێ وێرا ده‌بازی سووریێ ببن و به‌رگریێ ژ كۆبانێ بكه‌ن.
چاڤدێرێن كاروبارێن رۆژهه‌لاتا ناڤین، وه‌سا دبینن كو هاریكاریێن سه‌ربازیێن ئه‌مریكا بۆ كوردان ل كۆبانێ، ئاماژه‌یه‌كه‌ كو ئه‌مریكا دێ ستراتیژییه‌ته‌كا نوو ل ده‌ڤه‌رێ بجهكه‌ت كو خزمه‌تا كوردان بكه‌ت، ل ڤی وه‌ختێ كو قه‌یرانا سووریێ ژبه‌ر تێكه‌هه‌لبوونا كێشه‌یێن توند ل ده‌ڤه‌رێ به‌رته‌سك بوویه‌.
نهۆ لسه‌ر زمانێ كوردان، خوه‌شحالی بۆ دیتنێن ئه‌مریكا یێن نوو بۆ ده‌ڤه‌رێ دهێته‌ دیتن، و وه‌سا دهێته‌ دیتن ژی په‌یوه‌ندیێن هه‌ردو لایه‌نان به‌ره‌ڤ باشترڤه‌ دچن، كورد دێ بنه‌ هه‌ژماره‌یه‌كا كو چو شوونگرێن خوه‌ ل ده‌ڤه‌را رۆژهه‌لاتان ناڤین و د هه‌ڤپه‌یمانییا نێڤده‌وله‌تیدا دژی داعش نه‌بن. لگۆر ڤان پێشهات و روودانێن هه‌رێمی و داعشیێن دبنه‌ گه‌ف لسه‌ر گشت كوردان ب تایبه‌تی ژی لسه‌ر هه‌رێما كوردستانێ، لایه‌نێ كوردی بهێز دگه‌ل پێرابوونێن ئه‌مریكایه‌ ل ده‌ڤه‌رێ و خوه‌ پێڤه‌ گرتییه‌، كو مه‌ره‌م و ڤیانا كوردان پێ ئه‌وه‌ داكو ئێمناهییا نه‌ته‌وه‌یی یا وان ژ گه‌فێن هه‌رێمی بهێته‌ پاراستن.
هه‌رچاوا بیت، د كاودانێن نهۆ یێن رۆژهه‌لاتا ناڤیندا، هه‌ردو هه‌ڤپه‌یمان (كورد و ئه‌مریكا) مفای ژ ئێكدو دبینن، ئه‌مریكا مفای ژ كوردان دبینیت بۆ شه‌ركرنێ دژی تیرۆرێ، كوردی مفای ژ ئه‌مریكا دبینن بۆ دابینكرنا پێدڤییاتیێن خوه‌ یێن به‌رگریكرنێ ل همبه‌ری هه‌ر ترسه‌كا هه‌رێمی، هه‌روه‌سا دێ كورد مفایێن ئابۆری و له‌شكری د رێیا دانپێدانا نێڤده‌وله‌تی لژێر پیرۆزباهییا ئه‌مریكا بۆ ئاڤاكرنا ده‌وله‌تا خوه‌ یا نه‌ته‌وه‌یی بده‌ستڤه‌ ئینن.

بابه‌تێن ب ڤێ مژارێ ڤه‌ گرێدای