كوردێن شنگالێ ل همبه‌رى ئاواره‌بوون و ژده‌ستدانا كه‌رامه‌تێ لژێر ده‌ستێن داعشێ

كوردێن شنگالێ ل همبه‌رى ئاواره‌بوون و ژده‌ستدانا كه‌رامه‌تێ لژێر ده‌ستێن داعشێ

10596268_821867647853460_1416958251_n

وار: هه‌لگر :

پشتى گرتنا باژێڕكێ شنگالێ ژ بال چه‌كدارێن داعش ڤه‌، رێكخراوا نەتەوەیێن ئێكگرتى راگه‌هاند كو زێده‌تر ژ 200 هزار كه‌سێن ژ شنگالێ ئاوارەى هه‌رێما كوردستانێ بووینه‌ و پترییا وان ل چه‌ند كۆمه‌لگه‌هـ و ناوچه‌یێن پارێزگه‌ها دهۆكێ د ناڤ دبستان و هۆلان دا ئاكنجى بووینه‌ و هنده‌ك ژى لده‌ف كه‌سوكارێن وان هاتینه‌ حه‌واندن، وان ئاواره‌یان ژى ژ ترسا چەکدارێن ڤێ رێکخراوێ، جهـ و ناوچه‌یێن خوه‌ بجهـ هێلان و پترییا وان ئاواره‌یان ژى ئێزدینه‌.

ئاخڤتنكه‌رێ بابەشێخێ ئێزدییان ژى پێشتر راگه‌هاندبوو، ”چەکدارێن داعش دەستدرێژى کرینە لسەر کچ و ژنێن ئێزدییان و ژیان و نامیسا وان پتر لژێر گه‌فانه‌”.
رێکخراوا پێدڤێن خوارنێ یا جیهانی ژى راگەهاندییه‌، ب مه‌ره‌ما گه‌هاندنا هاریكارییان بۆ ئاواره‌یێن شنگالێ، مه‌ هه‌ماهه‌نگى دگه‌ل بەغدا کرییە، داكو ب زووترین ده‌م خوارن و هاریكارییان بگه‌هیننه‌ ڤان ئاواره‌یان.
زیا بوترس سەرۆكێ دەستەیا مافێ مرۆڤی یا هه‌رێما كوردستانێ، دا زانین، ”رێكخراوا پێدڤیێن خوارنێ یا جیهانی سەر ب نەتەوەیێن ئێكگرتى ڤه‌ هاریكارى و خوارنێن بله‌ز دێ گه‌هینته‌ وان ئاوارەیێن دەڤەرا شنگالێ، كو ژبه‌ر دەستبسەرگرتنا شنگالێ ژ بال داعش ڤه‌ ئاوارە بووین”.
سەرۆكێ دەستەیا مافێ مرۆڤی یا كوردستانێ، سەبارەت ب ئاوایێ دابینكردن و گەهاندنا هاریكارییان ب وان ئاواره‌یان، بۆ رووداو گۆت: ”رێكخراوا پێدڤیێن خوارنێ یا جیهانی بۆ گەهاندنا هاریكارى و خوارنێ ب ڤان ئاواره‌یان، هەماهەنگی دگەل حوكمەتا ئیراقێ كرییە بۆ وێ ئێكێ كو ب رێیا فڕۆكەیان، خوارنێ بگه‌هیننه‌ ئاواره‌یان”.
نیكۆلای میلادۆڤ هنارتیێ تایبەتێ سكرتێرێ گشتی یێ نەتەوەیێن ئێكگرتى ل ئیراقێ رایگەهاند كو ”دو سەد هزار وه‌لاتى ل ده‌ڤه‌ردارییا شنگالێ ل رۆژئاڤایا باژێڕێ مووسل ئاوارە بووینه”.
ل گۆره‌ى بەیاننامەیەكا هنارتیێ سكرتێرێ گشتی یێ نەتەوەیێن ئێكگرتى، ”رێكخراوا نەتەوەیێن ئێكگرتى ترسێن مه‌زن هەنە لسەر سلامەتییا وان وه‌لاتیێن سڤێل یێن ل چیایێ شنگالێ ئاسێ بووین ژبه‌ر چەكدارێن داعش، رۆنكر ژى كو بارودۆخێ مرۆڤیێ ڤان وه‌لاتیێن سڤێل گه‌له‌ك خرابە و وان هه‌وجه‌یى ب كەلوپەلێن سەرەتایی خواردن و ئاڤ و دەرمانان هەیه‌”.
ژ بال خوه‌ ڤه‌ كۆمسیۆنا بلندا مافێن مرۆڤى، ”هۆشیارى دا ب وێ ئێكێ كو نه‌ دووره‌ ئه‌و وه‌لاتیێن ئێزدى و توركمانێن ل چیایێ شنگالێ ئاسێ بووین، دێ تووشى كۆمكوژیێ بن، له‌و ژى داخوازكر زوو د هه‌وارا وان بچن و ژ قركرن و كۆمكوژیێ بهێنه‌ پاراستن”.
دیسان ژ ئالییه‌كێ دیڤه‌، چه‌كدارێن ده‌وله‌تا ئیسلامی ل ئیراق و شامێ ناسیار ب داعش، ژنێن ئێزدی و مه‌سیحی بۆ جهێن نه‌دیار ڤه‌دگوهێزن و وان وه‌كو كه‌نیزه‌ك دفرۆشن.
جڤاتا هه‌یڤا سوورا ئێراڤى ژى د راگه‌هاندنه‌كێ دا ئاشكراكر كو، ”داعش ل پشتى ڕه‌ڤاندنا ژن و كچێن ئێزدی و مه‌سیحی، وان بۆ جهێن نه‌دیار ڤه‌دگوهێزن و پشتى هینگێ وان وه‌كو كه‌نیزه‌ك دفرۆشن”.
محه‌مه‌د خه‌زاعی هاریكارێ سه‌رۆكێ گشتی یێ هه‌یڤا سوورا ئیراقى راگه‌هاند، ”چه‌كدارێن داعش زێده‌تر ژ‌ 100 مالباتان د ناڤ فرۆكخانه‌یا ته‌له‌عفه‌ر دا ڕه‌ڤاندینه‌ و گشت زه‌لامێن ڤان مالباتان كوشتینه‌، و نوكه‌ ئه‌ڤ مالباته‌ د دۆخه‌كێ ئالۆز و نه‌گونجاى دا دژین”.
به‌رى نیڤرۆیا دوهى ژى، ئێزدیێن هه‌رێما كوردستانێ خوه‌نیشاندانه‌ك لبه‌ر ده‌رێ په‌رله‌مانێ كوردستانێ رێكخست، بۆ رێگریكرن ژ كوشتنا ئێزدییان ژ بال چه‌كدارێن داعش ڤه‌ و دەستدرێژیکرنێ لسەر کچ و ژنێن ئێزدى ل شنگالێ. وان داخوازکر، هه‌ر چ زوویه‌، داعش د ناڤ ناوچه‌ و جهێن وان دا بهێنه‌ ده‌ركرن، به‌رى كو ئه‌و چه‌كداره‌ كۆمكوژییه‌كێ ئه‌نجام بده‌ن.
پشتى وێ خوه‌نیشاندانێ لبه‌ر ده‌رێ په‌رله‌مانێ كوردستانێ، خوه‌نیشانده‌رێن ئێزدى چوونە بەر ده‌رێ ئاڤاهیێ نەتەوەیێن ئێكگرتى ل باژێڕێ هەولێرێ و داخوازکر كو نەتەوەیێن ئێکگرتى و جڤاكێ نێڤدەولەتی بلڤن و كاره‌كى بكه‌ن بۆ دووماهى ئینان ب ڤێ كاره‌ساتا مرۆڤى كو ئێزدى كرییه‌ ئارمانج و هاریكارى و پێدڤیێن خوارنێ یێن بله‌ز بگه‌هیننه‌ وان ئاواره‌یێن ژ ترسا چه‌كدارێن داعش به‌رێ خوه‌ دایه‌ چیایێ شنگالێ.
هه‌ر دوهى ل باژێڕێ سلێمانیێ، کرێکارێن ئێزدى ب هەمان ئارمانج خوه‌نیشاندانه‌ك لسه‌ر جادده‌یا سالم رێكخست و داخوازكر، جڤاكێ نێڤده‌وله‌تى ل به‌رانه‌ر ڤان كریارێن داعش ل شنگالێ بهێنه‌ سه‌ر خه‌تى، ژبه‌ركو هه‌كه‌ر رێ ل وان نه‌هێته‌ گرتن، دێ كاره‌ساته‌ك ل ده‌ڤه‌را وان دروستكه‌ن.
هه‌ر دوهى ب هزاران كوردێن ئێزدى ل وه‌لاتێ ئه‌لمانیا خوه‌نیشاندانه‌ك ب دژى داگیركرنا ده‌ڤه‌را شنگالێ و ناوچه‌یێن ده‌وروبه‌رێن وێ، رێكخست و داخواز ژ وى وه‌لاتى و نه‌ته‌وه‌یێن ئێكگرتى و جڤاكێ نێڤده‌وله‌تى و هه‌رێما كوردستانێ كر كو ب زووترین ده‌م د هه‌وارا ئاواره‌یێن شنگالێ یێن ل چیاى ئاسێ بووین، بچن و وان ژ كۆمكوژى و كاره‌ساتێن دوور ژ مرۆڤایه‌تیێ بپارێزن و دیسان ئه‌و ئاواره‌یێن كو ژ شنگالێ به‌ره‌ڤ هه‌رێما كوردستانێ ڤه‌ ڕه‌ڤیاین، هه‌ر پێدڤییه‌كا خوارنێ و هاریكارییه‌كا مرۆڤى بۆ وان بچیت و ب زووترین ده‌م شنگال ژ ده‌ستێ چه‌كدارێن داعس بهێته‌ ئازادكرن ڤه‌.
هه‌ر لسه‌ر ره‌وشا ڤان ئاواره‌یێن ل چیایێ شنگالێ ئاسێ بووین، نووچه‌گه‌هینێ باسینۆز راگه‌هاندییه‌، كو ژبه‌ر خرابییا رەوشا وان و نەگەهشتنا ھیچ هاریكارییان ب وان ئاواره‌یێن كو لسه‌ر چیایێ شنگالێنه‌ هه‌تا نوكه‌ 8 زاڕۆیان گیانێ خوه‌ ژده‌ستدایه‌ و بارێ ساخله‌مییا هژماره‌كا دى ژى خرابه‌.
هه‌روه‌سا راگه‌هاندییه‌، كو ل گوندێ حرانی سەر بە شنگالێ چەکدارێن داعش 21 زه‌لام گوللەباران کرینه‌ و ژنێن وان ڕه‌ڤاندینه‌ و ل گوندێ بۆرکێ ژى ل ھەمان ناوچە دو خووشک و برایه‌كێ وان به‌ره‌ڤ جهه‌كێ نه‌دیار هاتینه‌ ڕه‌ڤاندن و ل کۆمەلگەهێن سیپا شێخ خدر و گرعوزێر ژى چارەنڤیسێ هژمارەکا وه‌لاتییان نه‌دیاره‌.
وه‌لاتییه‌كێ شنگالێ ژى دیاركر كو پشتى گرتنا شنگالێ ژ بال داعش ڤه‌، هژمارەکا زێده‌یا چەکدارێن عەشیرەتێن عەرەبێن دەوروبەرێن شنگالێ، هاتینە د ناڤ شنگالێ دا و مال و حالێ خەلکێ کورد تالان دکەن.
پەیامنێرێ باسنیۆز ل مووسل ژ چەند ژێده‌ره‌كان ڤه‌گوهاستییه‌ كو ل سپێده‌یا دوهى 88 گه‌نجێن ئێزدى ژ بال چه‌كدارێن داعش ڤه‌ هاتینه‌ سێداره‌دان، هه‌مان ژێده‌ر دیاركرییه‌ ژى كو ئەو گەنجە ل شەڤا دى ل سیپا شێخ خدر هاتینه‌ گرتن.
وان ژێده‌ران دایه‌ زانین ژى كو ب دەهان گەنجێن ئێزدی، ژ ترسا سێدارەدانێ و گه‌فێن به‌ردەوامێن چەکدارێن داعش، ب نه‌چاری ئاینێ خوه‌ گوهۆڕینه‌ و بووینه‌ بسورمان.
دهێته‌ زانین ژى هه‌ر ده‌مێ هاتنا ئاواره‌یێن شنگالێ ب سه‌دان ژ خه‌لكێ پارێزگه‌ها دهۆكێ ب هه‌وارا وان چووینه‌ و ب چه‌ند ئاوایان هاریكارى گه‌هاندینه‌ وان، و چه‌ند سازییه‌كێ میرى و رێكخراوێن جڤاكێ سڤێل هاریكاریێن دراڤى و پێدڤیێن خوارن و ژیانا رۆژانه‌ گه‌هاندینه‌ وان و ئه‌ڤ ده‌ستێ هاریكارییا هێشتا به‌رده‌وامه‌.

بابه‌تێن ب ڤێ مژارێ ڤه‌ گرێدای