كوردینیێ‌ نه‌فرۆشنه‌ مه‌!

كۆڤان مه‌هدی بامرنی

 

جهێ‌ خوه‌شحالیێیه‌ كو زۆر پارت، ئالی، بزاڤ و بزوتنه‌وه‌ ل گۆره‌پانا هه‌رێما كوردستانێ‌ ململانه‌یه‌كا سیاسی دكه‌ن، به‌لێ‌ یا جهێ‌ داخێ‌ بۆ من وه‌ك وه‌لاتییه‌كێ كوردستانێ ئه‌ڤه‌یه‌ كو زۆر جاران مه‌ لسه‌ر كه‌نال و ده‌زگایێن راگه‌هانێ‌ زۆر به‌رێز دیتینه‌ دگه‌ل رێزێن من ره‌نگه‌ (سیاسیێن قه‌ده‌رێ‌) بن كو لسه‌ر ئه‌ڤ كێش و كریز و قه‌یرانێن هه‌ین دناڤا خه‌لكێ‌ كوردستانێ‌ و ده‌ستهه‌لات و میكانزما هه‌لبژارتنا سه‌رۆكێ‌ هه‌رێمێدا‌ خوه‌ وسا دیار دكه‌ن كو ب تنێ‌ ئه‌و پارێزه‌رێن‌ ماف و به‌رژه‌وه‌ندیێن خه‌لكینه‌! هه‌روسا زۆر جاران ده‌مێ‌ هنده‌ك ژ ئه‌ڤان به‌رێزان لسه‌ر كه‌نالێن راگه‌هاندنێ‌ دئاخڤن مرۆڤ وێ‌ هه‌ستێ‌ و هزرێ‌ دكه‌ت ئه‌ڤ به‌رێزه‌ سه‌ركێش و رابه‌رێ‌ هه‌موو شۆره‌ش و راپه‌رین و داستانێن ملله‌تێ‌ كورد بوو -به‌لكی ناڤێ‌ دو شۆره‌شێن كوردی نزانیت- هه‌رچه‌وا بیت، ب تنێ‌ جه‌نابێ‌ وان خه‌باتا چۆل و چیان كریه‌ -ره‌نگه‌ ئێك ده‌مژمێر پێشمه‌رگایه‌تی نه‌كربیت- و ب تنێ‌ ئه‌و كوردپه‌روه‌ر و خه‌مخۆرێن به‌رژه‌وه‌ندیێن ملله‌تێ‌ كورد بووینه‌ و ئه‌م یێن دی ئانكو یێ‌ نه‌ دگه‌ل وان هه‌موو گه‌نده‌ل و دژمن و خوونمێژێن ملله‌تێ‌ خوه‌ بووینه‌، و ئه‌و ب هیچ ره‌نگه‌كێ‌ نه‌ به‌رپرسیارن ژ ئه‌ڤان كاودانان، ره‌نگه‌ پرسیارا بێ‌ به‌رسڤ ئه‌ڤه‌بیت؛ ئه‌رێ‌ باشه‌ ئه‌گه‌ر جه‌نابێ‌ هه‌وه‌ هه‌میان خزمه‌ت و به‌رژه‌وه‌ندییا خه‌لك و هاوه‌لاتی بڤێت، ئه‌گه‌ر هه‌وه‌ هه‌میان دۆز و خه‌باتا ملله‌تی لبه‌ر بیت، ئه‌گه‌ر هه‌وه‌ هه‌میان ماف و به‌رژه‌وه‌ندى و یه‌كسانییا خه‌لك و هاوه‌لاتیێ‌ هه‌رێما كوردستانێ‌ بڤێت، ئه‌رێ‌ پا كییه‌ به‌روڤاژی یێ‌ ئه‌ڤێ‌ چه‌ندێ‌ بڤێت؟.

ملله‌تێ‌ كورد، هند زۆلم و زۆرداری، ئازار، ئه‌نفالكرن و كیمیابارانكرن بسه‌ری هاتینه‌ كو ئه‌ڤرۆ چو (سیاسیێن قه‌ده‌رێ‌) نه‌شێن ب ئاسانی بخاپینیت و به‌رژه‌وه‌ندیێن پارتایه‌تی و كه‌سوكی لسه‌ر بسه‌پینن، د هه‌مان ده‌مدا، یا ژ من وه‌ره‌ خه‌لك و هاوه‌لاتیێ‌ كوردستانێ‌ دزانین كی خه‌باتكه‌ر و خه‌مخوه‌رێ‌ ملله‌تێ‌ كورده‌، خه‌لك گه‌هشتیه‌ وێ‌ تێگه‌هشتنێ‌ كو بزانیت كو زۆر ژ هه‌وه‌یێن هێژا ل هه‌ڤلێر و سلێمانیێ‌ ب تنێ‌ شه‌رێ‌ پله‌ و پایان و لێكڤه‌كرنا پۆست و ئمتیازاتان دكه‌ن و لسه‌ر كیستێ‌ هه‌ژار و به‌لنگازان، ئه‌ڤه‌ ژ لایه‌كیڤه‌. ژ لایه‌كێ‌ دیترڤه‌، هه‌موو كه‌س ژى ل هه‌رێما كوردستانێ‌ دزانن كو گه‌نده‌لییه‌كا پێشچاڤ ل هه‌رێمێ هه‌یه‌، هه‌بوونا په‌رپرسێن نه‌ده‌ستپاك دناڤا حوكمه‌تێن ئێك لدووڤ ئێكێن هه‌رێما كوردستانێدا‌ و دڤێت حوكمه‌تا هه‌رێما كوردستانێ‌ ده‌ست ب چاكسازیان بكه‌ت و… هتد، به‌لێ‌ هه‌ر پارت و لایه‌نێن سیاسیێن هه‌وه‌یێن به‌رێز بێبه‌هر نینن ژ حوكمرانیێ‌، واته‌ هه‌موو ئالیێن سیاسیێن پشكدار د پێكهاته‌یا حوكمه‌تا هه‌رێما كوردستانێدا پشكدار و به‌شدار به‌رپرسن ژ ئه‌ڤان بارودۆخێن‌ خه‌لك و هاوه‌لاتی تێدا دژیت، ئه‌ڤجا هیڤییه‌ و به‌سه‌ كوردینی و كوردپه‌روه‌ریێ‌ نه‌فرۆشنه‌ مه‌ هاوه‌لاتییان .

بابه‌تێن ب ڤێ مژارێ ڤه‌ گرێدای